މެމްބަރު އިކުރާމް ދެއްކެވީ ޒިންމާދާރުކަންކުޑަ ވާހަކައެއް - ރައީސް ނަޝީދުގެ ވަކީލުން

ރައްޔިތުންގެ މަޖިލީހުގެ މެމްބަރު އިކުރާމް ޙަސަން، ރައީސް ނަޝީދާ ގުޅޭގޮތުން ދެއްކެވީ ޒިންމާދާރުކަންކުޑަ ވާހަކަފުޅެއްކަމަށް އެމަނިކުފާނުގެ ވަކީލުން ބުނެފިއެވެ.

ރައީސް ނަޝީދުގެ ވަކީލުންގެ ފަރާތުން ނެރުނު ނޫސް ބަޔާނުގައި ބުނެފައިވަނީ، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ރާއްޖެ ވަޑައިނުގެންނެވޭނެ ސަބަބެއް މިހާރަކު ނެތްކަމަށް ދިއްގަރު ދާއިރާގެ މެމްބަރު އިކްރާމް ޙަސަން މިއަދު ރައްޔިތުންގެ މަޖިލީހުގައި ވިދާޅުވުމުން ރައީސް ނަޝީދުގެ ފަރާތުން ކަންބޮޑުވުން ފައުޅުކުރައްވައިފިއެވެ.

ޓެރަރިސްޓް ހަމަލާއަށް ފަހު ސަރުކާރުން އަޅާފައިވާ ފިޔަވަޅުތަކާއެކު، ރައީސް ނަޝީދަށް ކުރިއަށް ވުރެ ބޮޑަށް މިހާރު ސެކިއުރިޓީ ލިބިވަޑައިގަންނަވާނެ ކަމަށް އިކްރާމް ވިދާޅުވިއިރު، އެ މަނިކުފާނުގެ ހަށިކޮޅަށް ބޮމުގެ ހަމަލާދިން އެތިފަހަރު، ރާވައި ފަންޑުކުރި ފަރާތްތައް އަދި ހައްޔަރުކޮށްފައި ނުވާކަމުގައި ފުލުހުން އިއުތިރާފުވެފައިވާ ކަމަށެވެ. ރައީސް ނަޝީދު ރާއްޖެ ވަޑައިގަތުމުގެ މާހައުލު އޮތީ އަމާންކޮށް ކަމުގައި ދޭހަވާ ގޮތަށް އިކްރާމް ވާހަކަ ދެއްކެވުމަކީ، ރައީސް ނަޝީދުގެ ފުރާނަފުޅަށް މިހާރުވެސް އޮތް ނުރައްކާގެ ސީރިއަސްކަމަށް އެއްވެސް ފަރުވާލެއްނެތި ދެއްކެވި ޒިންމާދާރުކަން ކުޑަވާހަކައެއްކަމަށް ބަޔާނުގައި ބުނެފައިވެއެވެ. އަދި މެންބަރުގެ ދާއިރާގެ ރައްޔިތުންގެ ތާއީދުނެތް، ވިޔާނުދާ ވާހަކަފުޅެއް ކަމަށް ފާހަގަކޮށް ބުނެފައިވަނީ، ރައީސް ނަޝީދަށް ކުރިމަތި ކުރުވި ހަމަލާއިން އެ މަނިކުފާނުގެ ހިމަގޮހޮރަށް ދާންދެން ފޫއަޅުވާލާފައި ވަނިކޮށް، އީދުއަސްހައްދައިގެން، ހުވަފެން ދައްކައިގެން ރައީސް ނަޝީދު ރާއްޖެ ގެނެވޭތޯ ގަދައެޅުމަކީ، އެ މަނިކުފާނުގެ ހައްޓާއި ލެޔަށް ނުރައްކާވާ ގޮތަށް، އެ ނުރައްކަލަށް ހިތްވަރު ދިނުމުގެ ގޮތުން ކުރާ ކަމެއް ކަމުގައެވެ.

އަންގާރަ ދުވަހުގެ އޮތް ރައްޔިތުންގެ މަޖިލީހުގެ ޖަލްސާގައި އިކްރާމް ވިދާޅުވެފައިވަނީ، ރައިސް ނަޝީދަކީ، ވަރަށް ރަނގަޅު މަސައްކަތްތަކެއް ކުރައްވާ ބޭފުޅެއް ކަމަށާއި، ދުރުގައި ހުންނަވައިގެން މަސައްކަތް ކުރެއްވުމަށްވުރެ ބޮޑަށް ރައްޖެ ވަޑައިގެެން ރިޔާސަތުގައި އިންނަވައިގެން މަސައްކަތް ކުރައްވާ މަންޒަރު ދެކެން ބޭނުންވާ ކަމަށެވެ.