އަފްޣާނުން އެމެރިކާ ސިފައިން ފައިބާނެ ދުވަހެއް ކަނޑައަޅާނީ ރައީސް
24 އޯގަސްޓު 2021 | އަންގާރަ 08:01އޮގަސްޓު މަހުގެ ނިޔަލަށް އަފްޣާނުގައި ހަރަކާތްތެރިވަމުންދާ އެމެރިކާ ސިފައިން ފައިބާންޖެހޭނެ ކަމުގެ އިންޒާރު ޠާލިބާނުން ވަނީ ދީފައި
ާއަފްޣާނިސްތާނުގައި ހަރަކާތްތެރިވަމުންދާ އެމެރިކާ ސިފައިން
އަފްޣާނިސްތާނުގައި ހަރަކާތްތެރިވާ އެމެރިކާ ސިފައިން އެގައުމުން އެއްކޮށް ފައިބާނެ ދުވަހެއް ކަނޑައަޅުއްވާނީ ރައީސް ޖޯ ބައިޑަން ކަމަށް އެގައުމުގެ ނެޝަނަލް ސެކިއުރިޓީގެ އެޑްވައިޒަރު ޖޭކް ސަލިވަން ވިދާޅުވެއްޖެއެވެ.
ސަލިވަން މިގޮތަށް ވިދާޅުވެފައި މިވަނީ އޮގަސްޓު މަހުގެ ނިޔަލަށް އަފްޣާނުގައި ހަރަކާތްތެރިވަމުންދާ އެމެރިކާ ސިފައިން ނުފައިބައިފި ނަމަ އެކަމުގެ ގޮންޖެހުންތަކާ ކުރިމަތިލާން ޖެހޭނެ ކަމުގެ އިންޒާރު ޠާލިބާނުން ވައިޓްހައުސަށް ދީފައިވަނިކޮށެވެ. ހޯމަ ދުވަހު ސަލިވަން ވަނީ އެމެރިކާގެ ސިފައިން އަފްޣާނުން ފައިބާނެ ދުވަހެއް އެހެން މީހަކަށް ކަނޑަނޭޅޭނެ ކަމަށާއި އެއީ ހަމަ އެކަނި އެ ގައުމުގެ ރައީސަން ނިންމެވޭނެ ނިންމެވުމަށް ކަމަށް ވިދާޅުވެފައެވެ.
ސަލިވަން ވިދާޅުވީ އެމެރިކާއިިން ދަނީ ކާބުލްގައި މިހާރު ހިނގަމުންދާ ކަންތައްތަކާ ގުޅޭގޮތުން ޠާލިބާނުންނާ އެކު މަޝްވަރާތައް ކުރަމުން ކަމަށެވެ.
ވިހި އަހަރު ވަންދެން އަފްޣާނުގައި ހަރަކާތްތެރިވަމުން ދިޔަ އެމެރިކާގެ ސިފައިން އެގައުމުން ފޭބުމުގެ މަސައްކަތްތައް ކުރަން ފެށުމާއެކު ޠާލިބާނުން ވަނީ ވަގުތު ބޭނުން ހިފައި އެ ޖަމާއަތުގެ ހަމަލާތައް ވަރުގަދަކޮށްފައެވެ. އެގޮތުން އަފްޣާނުގެ އެކި ޕްރޮވިންސްތަކުގެ ވެރިކަން ކުރާ ސިޓީތައް އެމީހުންގެ ބާރުގެ ދަށަށް ގެންގޮސްފައެވެ. އަދި ޠާލިބާނުން އަފްޣާނުގެ ވެރިކަން ކުރާ ސިޓީ، ކާބުލް ހިފާފައި ވަނީ މި މަހުގެ ކުރީކޮޅެވެ.
ޠާލިބާނުން އަފްޣާނުގެ ވެރިކަމާ ހަވާލުވެފައިވާއިރު، އެމެރިކާގެ ރައީސް ވަނީ އަފްޣާނުގައި ހަރަކާތްތެރިވާ ސިފައިން އޮގަސްޓު 31ގެ ނިޔަލަށް އެގައުމުން ފޭބުމަށް މަސައްކަތްކުރާނެ ކަމަށް ވިދާޅުވެފައެވެ. ނަމަވެސް އެމެރިކާގެ ހުރިހާ ސިފައިން އެގައުމުން ފައިބާނީ އަފްޣާނުުގައި ތިބި އެމެރިކާގެ ހުރިހާ ރައްޔިތުން ސަލާމަތްކަމާއެކު އެގައުމުން ފޭބުމުން ކަމަށާއި އޮގަސްޓު 31ގެ ނިޔަލަށް އެކަން ނުކުރެވިއްޖެ ނަަމަ ހުރިހާ ރައްޔިތުން އެގައުމުން ބޭލެންދެން ސިފައިން އަފްޣާނުގައި ހަރަކާތްތެރިވަމުންދާނެ ކަމަށް ބައިޑަން ވަނީ ވިދާޅުވެފައެވެ.
