އަންނަ އޮކްޓޯބަރު މަހު ރާއްޖޭގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތުގެ ޝެޑިއުލަށް ބަދަލެއް ގެނެސްފިއެވެ.

މިދިޔަ އަހަރުގެ ސެޕްޓެމްބަރު މަހު ބަންގްލަދޭޝްގައި ބާއްވަން އެންމެ ފުރަތަމަ ތާވަލުކުރި މުބާރާތް މިހާރު ވަނީ މި އަހަރުގެ އޮކްޓޯބަރު މަހު ރާއްޖޭގައި ބާއްވަން ނިންމާފައެވެ. ސައުތު އޭޝިއަން ފުޓްބޯލް ފެޑެރޭޝަން (ސާފް) އިން މީގެ ކުރިން އިއުލާނުކުރި ޝެޑިއުލްގައިވާ ގޮތުން މުބާރާތް ކުރިއަށްގެންދިޔުމަށް ހަމަޖެހިފައި އޮތީ އޮކްޓޯބަރު މަހުގެ އެއްވަނަ ދުވަހުން ފެށިގެން 13 ވަނަ ދުވަހުގެ ނިޔަލަށެވެ. އެ ޝެޑިއުލްގައިވާ ގޮތުން ދެ މެޗު ދެމެދުގައި ބައެއް ގައުމުތަކަށް ލިބެނީ ދެ ދުވަހެވެ.

އެކަމަކު ފީފާ އުސޫލުތަކުގެ ތެރެއަށް ފެއްތުމުގެ ގޮތުން މިހާރު ވަނީ ޝެޑިއުލަށް ބަދަލު ގެނެސްފައެވެ. އެގޮތުން މިހާރު މުބާރާތް ކުރިއަށްދާނީ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. މި ޝެޑިއުލްގައިވާ ގޮތުން މަދުވެގެން ދެ މެޗު ދެމެދުގައި ކޮންމެ ގައުމަކަށްވެސް ތިން ދުވަސް ލިބޭނެއެވެ.

ޝެޑިއުލަށް ގެނެވުނު ބަދަލާއެކުވެސް ފުރަތަމަ މެޗުގައި އޮކްޓޯބަރު މަހުގެ އެއްވަނަ ދުވަހުގެ ހަވީރު ރާއްޖެ ނުކުންނާނީ ނޭޕާލާ ދެކޮޅަށެވެ. ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ބަންގްލަދޭޝްއާ ދެކޮޅަށް ނުކުންނައިރު، ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.

ސާފް ސަރަހައްދުގައި ހަތް ގައުމެއް ހިމެނޭއިރު، ބޫޓާނުން ވަނީ މުބާރާތުގައި ވާދަނުކުރާނެކަން އަންގާފައެވެ. ރިޕޯޓުތައް ބުނާ ގޮތުން ބޫޓާނުން އެގޮތަށް ނިންމީ ކޮވިޑް-19 ގެ ސަބަބުން ޒަރޫރީ ނޫން ކަންކަމުގައި ބޫޓާންގެ މީހުންނަށް މި ވަގުތު ދަތުރުކުރުމުގެ ހުއްދަ ނެތުމުންނެވެ. ބޫޓާނުގެ އިތުރުން ދެން މި މުބާރާތުގައި ވާދަނުކުރެވޭނީ ޕާކިސްތާނަށެވެ. ޕާކިސްތާނަށް މުބާރާތުގައި ވާދަނުކުރެވެނީ ފީފާގެ ސަސްޕެންޝަނެއްގައި އޮތުމުންނެވެ.

އެހެންކަމުން މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ. ގްރޫޕް ސްޓޭޖު މެޗުތަކަށްފަހު މުބާރާތުގެ ފައިނަލް މެޗު ކުޅޭނީ އޮކްޓޯބަރު މަހުގެ 16 ވަނަ ދުވަހެވެ.

މި ފަހަރުގެ ސާފް ޗެމްޕިއަންޝިޕް ރާއްޖޭގައި ބާއްވާއިރު، މިއީ ރާއްޖޭގައި މި މުބާރާތް ބާއްވާ ދެވަނަ ފަހަރެވެ. އެގޮތުން 2008 ވަނަ އަހަރުގެ މުބާރާތް ރާއްޖެ އާއި ސްރީ ލަންކާގައި ބޭއްވިއިރު، ރާއްޖެއިން ވަނީ އެ ފަހަރުގެ މުބާރާތް ކާމިޔާބުކޮށްފައެވެ. އެއީ ރާއްޖެއިން ސާފް ޗެމްޕިއަންޝިޕް ކާމިޔާބުކުރި ފުރަތަމަ ފަހަރެވެ. އަދި މި މުބާރާތް އެންމެ ފަހުން ބަންގްލަދޭޝްގައި ބޭއްވިއިރު، ރާއްޖެއިން ވަނީ ޑާކާގައި 2018 ވަނަ އަހަރު ބޭއްވި މުބާރާތުގެ ފައިނަލުގައި އިންޑިއާ ބަލިކޮށް ޗެމްޕިއަންކަން ހޯދާފައެވެ.