18 އަހަރުން ދަށުގެ ސާފް ޗެމްޕިއަންޝިޕަށް ގައުމީ ޓީމް ފުރައިފި

ބޫޓާންގައި ބާއްވާ 18 އަހަރުން ދަށުގެ ދެވަނަ ސާފް ޗެމްޕިއަންޝިޕުގައި ބައިވެރިވާ ރާއްޖޭގެ 18 އަހަރުން ދަށުގެ ގައުމީ ފުޓުބޯޅަ ޓީމު ބޫޓާނަށް ފުރައިފިއެވެ.

ހުކުރު ދުވަހުގެ ހެދުނު ގައުމީ ޓީމު ބޫޓާނަށް ފުރާފައިވާއިރު މި މުބާރާތުގެ ކުޅުން ފެށުމަށް ހަމަޖެހިފައިވަނީ މި މަހުގެ 18 ވަނަ ދުވަހުއެވެ. ބައިވެރިވާ ޓީމުތަކުގެ އަދަދު މަދުވުމާ ގުޅިގެން ދެކުނު އޭޝިއާގެ ފުޓުބޯޅައިގެ މައި އިދާރާއިން ވަނީ މި މުބާރާތުގެ ފޯމެޓަށް ބަދަލު ގެނެސްފައެވެ. އެގޮތުން ސްރީ ލަންކާ މުބާރާތުން ވަކިވުމާ ވިދިގެން މި މުބާރާތް މިހާރު ކުރިއަށް ގެންދިއުމަށް ނިންމާފައިވަނީ ލީގު އުސޫލުންނެވެ. އެގޮތުން ލީގު އުސޫލުން ކުޅުން ކުރިއަށް ގެންދިއުމަށްފަހު ޕޮއިންޓް ތާވަލުގެ އެއްވަނައިގައި އޮންނަ ޓީމަށް ޗެމްޕިއަންކަން ލިބިގެންދާނެއެވެ.

ރާއްޖޭގެ 18 އަހަރުން ދަށުގެ ޓީމުގެ ކޯޗު އިހުސާން އަބްދުލް ޢަނީ (ސާންތި) ބުނެފައިވަނީ މި މުބާރާތަކީ ކުޅުންތެރިންނަށް ރަނގަޅު ތަޖުރިބާއަކަށް ވެގެން ދާނެ މުބާރާތެއް ކަމަށާއި ރާއްޖޭގެ ޓީމުގެ އަމާޒަކީ ޕޮއިންޓް ހޯދެން ހުރި ހުރިހާ މެޗަކުން ޕޮއިންޓް ހޯދައި އެންމެ ދަށްވެގެން މުބާރާތުގެ ތިންވަނަ ހޯދުން ކަމަށެވެ. ހަމައެހެންމެ ސާންތި ބުނެފައިވަނީ އޭނާގެ ކުޅުންތެރިން ވަރަށް ރަނގަޅަށް ފަރިތަކުރުންތަކުގައި ބައިވެރިވި ކަމަށާއި ތައްޔާރުވާން ލިބުނު ވަގުތާ އަޅާބަލާއިރު މުބާރާތަށް ފުރިހަމައަށް ތައްޔާރުވެވިފައިވާ ކަމަށެވެ.

މި މުބާރާތުގައި ވާދަކުރާ ރާއްޖޭގެ ޓީމަށް ގިނަދުވަހު ރަނގަޅަށް ތަމްރީންކުރެވި ރަނގަޅު ފުރުސަތުތަކެއް ތަނަވަސްކޮށް ދެވިއްޖެނަމަ އެ ޓީމުގެ ކުޅުންތެރިންނަކީ ގައުމަށް ރީތި ނަން ހޯދައިދެވޭ ފެންވަރު ކުޅުންތެރިން ކަމަށެވެސް ސާންތީ ބުންޏެވެ.

މުބާރާތް ރޭވިފައިވާ ގޮތުން މިހާރު ވާދަކުރާނީ ރާއްޖެ، ނޭޕާލް، ބޫޓާން އިންޑިއާ އަދި ބަނގްލަދޭޝްއެވެ. މުބާރާތުގެ ފުރަތަމަ މެޗުގައި މި މަހުގެ 18 ވަނަ ދުވަހު ރާއްޖެ ނުކުންނާނީ މުބާރާތް ބާއްވާ ގައުމު ކަމަށްވާ ބޫޓާންއާ ދެކޮޅަށެވެ.

މި މުބާރާތުގައި ރާއްޖެއިން ވަނީ މީގެކުރިންވެސް ވާދަކޮށްފައެވެ. 2015 ވަނަ އަހަރު ބޭއްވި މުބާރާތުގެ ގްރޫޕް ސްޓޭޖުގައި ރާއްޖެ ވަނީ އަފްޣާނިސްތާން އަދި އިންޑިއާއާ ދެކޮޅަށް ކުޅުނު މެޗުތަކުން ބަލިވެފައެވެ.