ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނައި އިސްލާހާ ތަޢާރަޒްވާ ކަންކަން ހުރުމާއެކު, ދިވެހިރާއްޖޭގެ ފަޅުރަށްރަށާބެހޭ ގާނޫނަށް އިސްލާހު ގެނައުމުގެ ބިލް މަޖިލީހަށް ހުށަހަޅާ ބިލްގެ ބަހުސް ފަށައިފިއެވެ.
ހޯމަ ދުވަހުގެ ޖަލްސާއަށް ސަރުކާރުގެ ފަރާތުން މިބިލް ހުށަހަޅުއްވާފައިވަނީ ބާރަށު ދާއިރާގެ މެމްބަރ އަޙުމަދު ޢަބްދުﷲ އެވެ. ބިލް ހުށަހަޅުއްވަމުން އޭނާ ވިދާޅުވީ, މިބިލް ހުށަހަޅުއްވަނީ ކުރިން ގާނޫނު އޮތްގޮތުން ލާމަރުކަޒީ ގާނޫނަށް ގެނައި އިސްލާހުތަކާއި ގެނައި ބަދަލުތަކާ ފުށުއަރާ މާއްދާތަކެއް ގާނޫނުގައި ހުރުމުން, 2 ގާނޫނު އެއްގޮތްކުރުމަށް ކަމަށެވެ. އެގޮތުން ފަޅުރަށްރަށާބެހޭ ގާނޫނުގެ 13 މާއްދާއަކަށް އިސްލާހު ގެނައުމަށް ހުށަހަޅުއްވާކަމަށް އޭނާ ވިދާޅުވިއެވެ.
އެބަދަލުތައް ގެންނަން ޖެހެނީ މިހާރު އަމަލުކުރަމުންދާ ލާމަރުކަޒީ ގާނޫނުގެ ދަށުން ކައުންސިލްތަކުގެ އިޚްތިޞާޞްގައިވާ ރަށްރަށުގެ ކަންކަން ކުރުމުގެ ބާރު ލިބިގެންވަނީ އެކައުންސިލަކަށް ކަމުގައިވާތީއެވެ. އަޙުމަދު ވިދާޅުވީ ގާނޫނަށް ގެނެވޭ ބަދަލުތަކުގެ ތެރޭގައި ކައުންސިލްތަކުގެ އިޚްތިޞާޞްގައި ހިމެނޭ ރަށްތައް ވަރުވާއަށް ކުއްޔަށް ދިނުމާއި ވަކިކުރުމާ ގުޅޭގޮތުން ހިންގަންޖެހޭ ކަންކަން ކުރުމުގެ ބާރު ކައުންސިލްތަކަށް ލިބިދޭނެ ކަމަށެވެ. ހަމައެއާއެކު މިއިސްލާހު ގެނައުމުން, ދަނޑުވެރިކަމާބެހޭ ވުޒާރާއިން ކަނޑައަޅުއްވާ އުސޫލުތަކުގެ ތެރެއިން ރަށްތައް ކުއްޔަށް ދިނުމުގެ ބާރު ކައުންސިލްތަކަށް ލިބިދޭނެ ކަމަށެވެ.
މި ގާނޫނަށް ގެނެވޭ އިސްލާހުތަކުގެ ތެރޭގައި، ދަނޑުވެރިކަމާއި އެނޫން ކަންކަމަށް ފަޅުރަށްތައް ކުއްޔަށް ދިނުމާއި ވަކިކުރުން، މިނިސްޓްރީން ކަނޑައަޅާ ގަވާއިދާ އެއްގޮތްވާ ގޮތުގެމަތިން ހިންގާ ފަރާތަކަށް ވާނީ ކައުންސިލްތައް. ޢިއްޒަތްތެރި ރައީސް! ކައުންސިލްތަކުގެ އިޚްތިޞާޞްތަކުގެ ތެރެއިން، އިންޑަސްޓްރިއަލް މަސައްކަތްތަކުގެ ބޭނުމަށް ސަރުކާރުން ކަނޑައަޅުއްވައިފިނަމަ އެރަށެއްގެ އިޚްތިޞާޞް ހިމެނޭ ކައުންސިލުން ވަކިކުރުމާއި، އެނޫން ރަށްތައް ބޭނުންކުރުމާއި، އެގްރިމެންޓް ކުރުމުގެ ބާރު ކައުންސިލްތަކަށް ލިބިގެންދާނެ. ޢިއްޒަތްތެރި ރައީސް. ވަރުވާއަށް ލިޔެގެން އުޅޭ ފަރާތްތަކުގެ މަސްއޫލިއްޔަތުތަކާއި ޒިންމާތަކާއި އަދި އެފަރާތްތަކުން އަދާކުރަންޖެހޭ ގާނޫނީ ޒިންމާތައް އަދާކުރާނެ ގޮތާއި އަދި އެކަންކަމާގުޅިގެން ހެދޭ ގަވާއިދުތަކާއި ހަމަތައް ގަވާއިދުގައި ބަޔާންކުރެވިގެން ވާނެ.އަޙުމަދު ޢަބްދުﷲ / ބާރަށު ދާއިރާގެ މެމްބަރ
މީގެއިތުރުން ކުއްޔަށް ހިފާ ފަރާތަކުން ތިން ވަނަ ފަރާތަކަށް ރަށް ދޫކުރުމާއި އެކަމުގައި އަމަލުކުރަންވީ ގޮތް މިއިސްލާހުތަކުގެ ތެރޭގައި ހިމެނިގެންދާނެ ކަމަށް އޭނާ ވިދާޅުވިއެވެ.
މިބިލަށް ބަޙުސްކުރެއްވި ބައެއް މެމްބަރުން ވަނީ, އެ ރަށެއް ކައުންސިލްގެ އިޚްތިޞާޞުން ނެގުމުގެ ބާރު މިނިސްޓްރީއަށް ލިބޭ ގޮތަަށް ގާނޫނަށް ހުށައަޅާފައިވާތީ ކަންބޮޑުވުން ފާޅުކުރައްވާފައެވެ. އެގޮތުން އިންޑަސްޓްރިއަލް ބޭނުމަށް ދޫކުރަން ކަނޑައަޅާފައިވާ ފަޅުރަށަކީ ސިޓީއެއް ނުވަތަ ރަށެއްގެ އިޚްތިޞާޞްގެ ތެރޭގައި ހިމެނޭ ރަށަކަށް ވާނަމަ، އެ ރަށެއް ކައުންސިލްގެ އިޚްތިޞާޞުން ވަކި ކުރަން ޖެހޭނެ ކަމަށް ބަޔާންކޮށްފައިވާ މާއްދާގެ ސަބަބުން ކައުންސިލަށް ދޭން ޖެހޭ ބާރުތައް ހަނިވާ ކަމަށް އެ މެމްބަރުން ގަބޫލުކުރައްވައެވެ. އެއީ އެ އިސްލާހުގައި، ރަށްތައް އިޚްތިޞާޞުން ވަކިކުރާއިރު، ކައުންސިލްގެ ލަފާ ހޯދަން ޖެހޭނެ ކަމަށް ބަޔާންކޮށްފައިނުވާތީ ކަމަށް މެމްބަރުން ފާހަގަކުރެއްވިއެވެ.
