ސަވާދީއްތަ ދަތުރުގެ އޮފިޝަލް މީޑިއާ ޕާޓްނަރަކަށް ރާއްޖެޓީވީ
ރާއްޖެޓީވީގެ ފަރާތުން ސޮއިކުރެއްވީ ޑެޕިއުޓީ ޗީފް އޮޕަރޭޓިން އޮފިސަރ ނާޒްމީ ސައީދު
ސަވާދީއްތަ ދަތުރުގެ މީޑިއާ ޕާޓްނަރަށް ވުމުގެ އެއްބަސްވުމުގައި ސޮއިކުރުމަށް ބޭއްވި ހަފުލާގެ ތެރެއިން
މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމެންޓް ކޯޕަރޭޝަން (އެމްއައިޓީޑީސީ) އިން ބާއްވާ "ސަވާދީއްތަ ދަތުރު" ޔޮޓް ރިލޭގެ މީޑިއާ ޕާޓްނަރަކަށް ރާއްޖެޓީވީ ހަމަޖައްސައިފިއެވެ.
ސަވާދީއްތަ ދަތުރު ޔޮޓް ރިލޭ ހޯމަ ދުވަހު އިފްތިތާހު ކޮށްފައިވާއިރު، މީޑިއާ ޕާޓްނަރ އެއްބަސްވުމުގައި ރާއްޖެޓީވީގެ ފަރާތުން ސޮއިކުރެއްވީ ޑެޕިއުޓީ ޗީފް އޮޕަރޭޓިން އޮފިސަރ ނާޒްމީ ސައީދު އެވެ. އަދި އެމްއައިޓީޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ މުހައްމަދު ރާއިދުއެވެ.
އެގްރިމެންޓުގައި ސޮއިކުރައްވައި ވާހަކަދައްކަވަމުން ރާއިދު ވަނީ މި ރިލޭގެ މީޑިއާ ޕާޓްނަރަކަށް ރާއްޖެޓީވީ ހިޔާރުކުރެއްވީ މިފަދަ ބޮޑު ހަރަކާތެއް ކަވަރުކޮށް ރައްޔިތުންނާ ހިސާބަށް އެންމެ ފުރިހަމަ ގޮތުގައި ގެނެސްދެވޭނީ ރާއްޖެޓީވީއަށް ކަމަށް ވާތީކަމަށް ވިދާޅުވެފައެވެ. އަދި މިއިވެންޓް އެންމެ ފުރިހަމަ ގޮތުގައި ރާއްޖެޓީވީން ކުރިއަށް ގެންދާނެ ކަމުގެ ފުރިހަމަ އިތުބާރު އެބައޮތްކަމަށް ރާއިދު ވަނީ ވިދާޅުވެފައެވެ.
މި އިވެންޓަކީ ރާއްޖޭގެ އިތުރުން ދުނިޔޭގެ ފެންވަރުގައި ވެސް ފާހަގަކޮށްލެވޭނެ އިވެންޓަކަށް ވެގެންދާނެ ކަމަށް ރާއިދު ވަނީ ފާހަގަކުރައްވާފައެވެ.
ސަވާދިއްތަ ދަތުރު ބޭއްވުމަށް ހަމަޖެހިފައި ވަނީ އަންނަ އަހަރުގެ ފެބްރުއަރީ މަހުއެވެ. މި ރިލޭގައި ރާއްޖޭގެ ފަސް އަތޮޅެއްގެ 15 ރަށަކަށް ދަތުރުތައް ކުރަން ރާވާފައިވެއެވެ. މިއީ ރާއްޖޭގައި ބޭއްވޭ ފުރަތަމަ އިންޓަނޭޝަނަލް ޔޮޓް ރިލޭއެވެ.
އެމްއައިޓީޑީސީގެ ސަވާދީއްތަ ދަތުރު ބާއްވަނީ މިނިސްޓްރީ އޮފް އަރޓްސް ކަލްޗަރ އެންޑް ހެރިޓޭޖް އަދި އެމްއެންޑީއެފްގެ ސިވެކް ކުންފުންޏާ ގުޅިގެންނެވެ. އަދި އެމްޓީޑީސީގެ އަމާޒަކީ މިރިލޭ ކޮންމެ އަހަރަކު ވެސް ސިލްސިލާކޮށް ކުރިއަށް ގެންދިއުމެވެ.
