ކަޅު ބާޒާރުގައި ޑޮލަރު ވިއްކުން ހުއްޓުވަން ސަރުކާރުގެ އެއްބާރުލުން ލިބިއްޖެ
މިކަން ކުރުމަށް ރެގިއުލޭޓަރީ ފްރޭމްވޯރކަށް ބަދަލުގެންނަން ވަނީ ނިންމާފައި
ޑޮލަރު ނޫޓުތަކެއް
ޑޮލަރުގެ ކަޅު ބާޒާރު ހުއްޓުވަން އަޅަން ނިންމާފައިވާ ފިޔަވަޅުތަކަށް ސަރުކާރުގެ އެއްބާރުލުން ލިބިފައިވާކަމަށް އެމްއެމްއޭއިން ބުނެފިއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި އެމްއެމްއޭގެ ޑެޕިއުޓީ ގަވަރުނަރު އަޙުމަދު ޢިމާދު ވިދާޅުވީ ރާއްޖޭގައި ކަޅު ބާޒާރުގައި ޑޮލަރު ވިއްކުމުގެ މައްސަލަ އިންތިހާއަށް ބޮޑުވެފައިވާތީ, އެކްސްޗޭންޖް މާރކެޓުގައި މިހާރު އޮތް ރެގިއުލޭޓަރީ ފްރޭމްވޯރކަށް ބަދަލުގެންނަން މަސައްކަތްތަކެއް ކުރަމުންދާކަމަށެވެ. މިކަމާ ގުޅިގެން ސަރުކާރުގެ ކަމާބެހޭ އިދާރާތަކާ މަޝްވަރާކުރެވިފައިވާ ކަމަށާއި، މިކަން ކުރުމަށް ސަރުކާރުގެ އެއްބާރުލުން ލިބެމުންދާކަމަށެވެ.
މި ފްރޭމްވޯރކަށް ގެންނަ ބަދަލުތައް އިތުރަށް ފުރިހަމަކުރުމަށް ކަމާގުޅުންހުރި ބައިނަލްއަޤްވާމީ މުއައްސަސާތަކާއެކު ވެސް މަޝްވަރާކުރަމުންދާ ކަމަށް ޑެޕިއުޓީ ގަވަރުނަރު ވިދާޅުވިއެވެ. އަދި މިކަން ކުރުމުގައި ދިމާވާނެ ގޮންޖެހުންތައްވެސް ދެނެގަންނަމުންދާކަމަށް އޭނާ ވިދާޅުވިއެވެ.
ޢިމާދު ވިދާޅުވީ މި ބަދަލު ގެނައުމުން ރާއްޖޭގެ ވިޔަފާރިވެރިންނަށް އެކަމުން ކުރާނެ އަސަރު ދެނެގަތުމުގެ މަސައްކަތް މިހާރު ކުރިއަށްދާކަމަށެވެ. މިކަމުގައި ވިޔަފާރިވެރިންގެ މަޝްވަރާވެސް ހޯދަމުންދާކަމަށެވެ.
އިމާދު ވިދާޅުވީ ޑޮލަރުގެ ކަޅު ބާޒާރު ހުއްޓުވަން އަޅަން ނިންމާފައިވާ ފިޔަވަޅުތަކުގެ ސަަބަބުން ވިޔަފާރިވެރިންނަށާއި، އާންމުންނަށްވެސް މިކަމުގެ ފައިދާ ކުރާނެ ކަމަށެވެ. އެހެންކަމުން މިކަން ކުރުމަށް ޚާއްސަ ޕްލޭނެއް މިހާރު އެކުލަވާލާފައިވާކަމަށާއި، މި މައުލޫމާތު ދިނުން ހުރިހާ ލެވެލްއެއްގައި ކުރިއަށްދާނެ ކަމަށެވެ.
މީގެ ކުރިންވެސް ރާއްޖޭގައި ކަޅު ބާޒާރުގައި ޑޮލަރު ވިއްކުން އޮތްއިރު، ކޮވިޑް-19އާ ގުޅިގެން މިހާރު މިކަންތައް މި ވަނީ ކޮންޓްރޯލްކުރަން ދަތިވާ މިންވަރަށް ގޯސްވެފައެވެ. މިކަން ހުއްޓުވަން އެމްއެމްއޭއިން ބަދަލުތަކެއް ގެންނަން ނިންމާފައިވާއިރު، ގެންނަން ނިންމާފައިވަނީ ކޮން ބަދަލުތަކެއްކަމެއް ސާފުވެފައެއް ނުވެއެވެ.
