މަޖިލީހަށް ހުށައަޅާ ބިލުތަކަށް ކްލަބްހައުސްގައި ޚިޔާލު ފާޅުކުރުމުގެ ފުރުސަތު އެމްޑީޕީ ޕީޖީން ފަހިކޮށްދީފި

ރައްޔިތުންގެ މަޖިލީހަށް ހުށައަޅާ ބިލުތަކަށް ކްލަބްހައުސްގައި ޚިޔާލު ފާޅު ކުރުމުގެ ފުރުސަތު އެމްޑީޕީ ޕީޖީ ގްރޫޕުން ފަހިކޮށްދީފިއެވެ.

އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން އެމްޑީޕީ ޕީޖީ ގްރޫޕުގެ ލީޑަރު، މެދު ހެންވޭރު ދާއިރާގެ މެމްބަރު ޢަލީ ޢާޒިމް ވިދާޅުވީ، މިއީ މަޖިލީހަށް ހުށައަޅާ ބިލުތަކާމެދު ރައްޔިތުންގެ ޚިޔާލާއި މަޝްވަރާ ހޯދައި، ރައްޔިތުންގެ ބައިވެރިވުން އިތުރު ކުރުމުގެ މަޤްޞަދުގައި އެމްޑީޕީ ޕީޖީ ގްރޫޕުން އިންތިޒާމު ކޮށްގެން ހިންގާ ކަމެއް ކަމަށެވެ. އެގޮތުން އާދީއްތަ ދުވަހުގެ ރޭ, މި ހަރަކާތުގެ ފުރަތަމަ ސެޝަން ކްލަބްހައުސް މެދުވެރިކޮށް އެމްޑީޕީ ޕީޖީން ކުރިއަށް ގެންދާނެކަން ޢާޒިމް ފާހަގަ ކުރެއްވިއެވެ.

ޢާޒިމް ވިދާޅުވީ، ސަރުކާރުން ފޮނުވާ ބިލުތަކާ ގުޅިގެންވެސް ޓެކްނިކަލް މަޢުލޫމާތުތައް ފޯރުކޮށްދިނުމަށް ސަރުކާރުގެ ވުޒާރާތަކުން ބައިވެރިވާނެ ކަމަށެވެ. އެގޮތުން އާދީއްތަ ދުވަހުގެރޭ މަޝްވަރާ ކުރުމަށް ހަމަޖެހިފައިވަނީ އީ-ޓްރާންސެކްޝަންއާބެހޭ ބިލާއި ގުޅިގެންކަން ފާހަގަ ކުރައްވައި ޢާޒިމް ވިދާޅުވީ، ކްލަބްހައުސްގައި ކުރިއަށްދާ ބައްދަލު ކުރެއްވުމުގައި އެމްއެމްއާއި، އިކޮނޮމިކް މިނިސްޓްރީގެ އިތުރުން، ޓެކްނޮލޮޖީ މިނިސްޓްރީންވެސް ބައިވެރިވާނެ ކަމަށެވެ.

އަދި ބިލުތަކާއި ގުޅޭ ފަންނީ ވާހަކަ ދެއްކެވުމަށް ބައިވެރިވެވަޑައިގަންނަވާ ބޭފުޅުންގެ އިތުރުން، ސިޔާސީ ގޮތުންނާއި، ބިލު ހުށައަޅުއްވާ މެމްބަރުންގެ ހައިސިއްޔަތުންވެސް އެކި ބޭފުޅުން ބައިވެރިވެވަޑައިގަންނަވާނެ ކަމަށެވެ. އާންމުކޮށް ހުޅުވާލައިގެން ކުރިއަށްދާ މި ބައްދަލު ކުރެއްވުމުގައި ރައްޔިތުން ބައިވެރިވުމަށް ޢާޒިމް ވަނީ އެދިވަޑައިގެންފައެވެ.