ރެއާލް މެޑްރިޑާއެކު ހަދާފައި އޮތް އެއްބަސްވުން ފްރާންސްގެ ތަޖުރިބާކާރު ފޯވާޑް ކަރީމް ބެންޒެމާ އާކޮށްފިއެވެ.
ލިޔޯނުން ކެރިއަރު ފެށި އުމުރުން 33 އަހަރުގެ ބެންޒެމާ ރެއާލަށް ބަދަލުވީ 2009 ވަނަ އަހަރު 35 މިލިޔަން ޔޫރޯއަށެވެ. ރެއާލުގެ އެއްބަސްވުން ބެންޒެމާ މީގެ ކުރިން އާކޮށްފައިވަނީ 2020 ވަނަ އަހަރުގެ ފެބްރުއަރީ މަހުގެ ތެރޭގައެވެ. އެ ފަހަރު އޭނާ ވަނީ ރެއާލާއެކު ދެ އަހަރުގެ އެއްބަސްވުމެއް ހަދާފައެވެ. އެހެންކަމުން ރެއާލާއެކު ބެންޒެމާ މީގެ ކުރިން ހަދާފައި އޮތް އެއްބަސްވުން ހަމަވަން އޮތީ އަންނަ އަހަރުގެ ހޫނު މޫސުމުގެ ނިޔަލަށެވެ.
އެކަމަކު ހުކުރު ދުވަހުގެ ވަގުތެއްގައި ބެންޒެމާ ވަނީ އެ އެއްބަސްވުން އިތުރު އެއް އަހަރަށް އާކޮށްފައެވެ. އެހެންކަމުން އައު އެއްބަސްވުމާއެކު 2023 ވަނަ އަހަރުގެ ހޫނު މޫސުމުގެ ނިޔަލަށް ބެންޒެމާ ރެއާލުގައި މަޑުކުރާއެވެ. އަދި އެއާއެކު ބެންޒެމާއަށް ވަނީ ރެއާލުގައި 14 އަހަރު ހޭދަކުރުމުގެ ފުރުސަތު ލިބިފައެވެ.
މިހާތަނަށް ބެންޒެމާ ރެއާލުގައި 12 އަހަރު ހޭދަކޮށްފައިވާއިރު، އޭނާ ވަނީ އެ ކުލަބަށް ކުޅެދިން 560 މެޗުގައި 281 ލަނޑު ޖަހާފައެވެ. އެއާއެކު ބެންޒެމާ ވެފައިވަނީ ރެއާލުގެ ތާރީޚުގައި އެ ޓީމަށް ފަސްވަނައަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާއަށެވެ.
ރެއާލާއެކު ބެންޒެމާ މިހާތަނަށް ގިނަ ކާމިޔާބީތަކެއް ހޯދާފައިވާއިރު، އޭގެ ތެރޭގައި ސްޕެނިޝް ލީގު ތިން ފަހަރު ހިމެނެއެވެ. އަދި އޭނާ ވަނީ ރެއާލާއެކު ސްޕެނިޝް ކަޕާއި ސްޕެނިޝް ސުޕަ ކަޕް ދެ ފަހަރު ކާމިޔާބުކޮށްފައެވެ. މީގެ އިތުރުން ބެންޒެމާ ވަނީ މިހާތަނަށް ރެއާލާއެކު ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕަ ކަޕް ތިން ފަހަރު އަދި ފީފާ ކުލަބު ވޯލްޑް ކަޕް ހަތަރު ފަހަރު ކާމިޔާބުކޮށްފައެވެ.
ރެއާލުގެ އެއްބަސްވުން ބެންޒެމާ އާކުރިއިރު، ދާދި ފަހުން އެ ޓީމަށް ކުޅެމުން އަންނަ ބެލްޖިއަމުގެ ގޯލްކީޕަރު ތިބައޫ ކޯޓުއާވެސް ވަނީ އެއްބަސްވުން އާކޮށްފައެވެ.
