އެމްއެމްޕީއާރްސީ ޚިޔާނާތުގެ މައްސަލާގައި ދައުވާކުރާނެ ހެއްކެއް ނެތް ކަމަށް ތަކުރާރުކޮށް ވިދާޅުވަމުން ގެންދަވާ ވާހަކަ އިތުރަށް ޔަގީން ކުރެވިފައިވާ ކަމަށް ސަސްޕެންޝަންގައި ހުންނެވި ޔޫތު މިނިސްޓަރު އަހުމަދު މަހުލޫފު ވިދާޅުވެއްޖެއެވެ.
މަހުލޫފު މިހެން ވިދާޅުވެފައި މިވަނީ ބުރާސްފަތި ދުވަހު ޕްރޮސެކިއުޓަރ ޖެނެރަލް އޮފީހުން ބޭއްވި ނޫސްވެރިންގެ ބައްދަލުވުމުގައި ޕީޖީ ހުސެއިން ޝަމީމު ދެއްކެވި ވާހަކަތަކާ ގުޅިގެންނެވެ. މަހުލޫފުގެ މައްސަލާގައި ފުރަތަމަ އޭނާގެ މައްޗަށް ދައުވާ ނުކުރެވޭނެ ކަމަށް އެ މައްސަލަ ބެލި ޓީމުން ނިންމުމުން އެ މައްސަލަ އެހެން ޓީމަކާ ހަވާލުކޮށްފައިވާ ކަމަށް މައުލޫމާތު ލިބިފައިވެއެވެ. އެކަމާ ގުޅޭގޮތުން ޝަމީމް ވިދާޅުވީ, އެއީ މުޅިން ޞައްޙަ މައުލޫމާތެއް ނޫން ކަމަށާއި، ދައުވާ ކުރިއަސް ނުކުރިއަސް އެކަމުގައި ޒިންމާވާނީ އޭނާ ކަމަށެވެ. 100 ވަރަކަށް ޕޮސެކިއުޓަރުން އުޅޭއިރު، ގިނަ ވާހަކަތައް ދައްކާނެ ކަމަށާއި، މި މައްސަލައިގައި ގޮތް ނިންމާނީ ޝަމީމް ކަމަށެވެ. އަދި ވިދާޅުވީ މި މައްސަލަ ލަސް ވެއްޖެކަމަށް ބުނާ ވާހަކައަށް އިންކާރު ނުކުރާ ކަމަށާއި ދައުވާ ކުރުމާމެދު ގޮތެއް ނުނިންމި 100 ދުވަސް ހޭދަވިޔަސް، ހޯދެން ހުރި ހުރިހާ ހެއްކެއް ނުހޯދެނީސް ގޮތެއް ނުނިންމާނެ ކަމަށެވެ.
ޝަމީމްގެ ވާހަކަތަކާ ގުޅިގެން މަހުލޫފު ވިދާޅުވީ އެމްއެމްޕީއާރްސީ ހިޔާނާތުގެ މައްސަލައިގައި ހެއްކެއް ނެތްކަމަށް ތަކުރާރުކޮށް ވިދާޅުވާ ވިދާޅުވުން ޔަގީންވެފައިވާ ކަމަށެވެ. އަދި 2 އަހަރު ވަންދެން ހެކި ހޯދުމަށް މަސައްކަތް ކުރައްވަނީތޯ މަހުލޫފު ސުވާލުކުރައްވާފައިވެއެވެ.
މިމައްސަލައާ ގުޅިގެން ފުލުހުން ބުނެފައިވަނީ މަހުލޫފުގެ މައްޗަށް ތުހުމަތުކުރެވޭ މައްސަލައިގައި އިތުރު އައު ހެކިތަކެއް ހޯދުމުގެ މަސައްކަތް ފުލުހުން ކުރަމުންނުދާ ކަމަށެވެ. ނަމަވެސް ޕީޖީގެ އެދުމުގެ މަތިން ތަހުގީގުގައި ކުރިން ވެސް ހޯދައިފައި ހުރި ބައެއް ހެކިތަކާ ގުޅޭ ބައެއް ކަންކަން އިތުރަށް ސާފުކޮށްދިނުމަށް ޕީޖީން އެދިފައިވާތީ އެ މަސައްކަތް ފުލުހުން ކުރިއަށް ގެންދާ ކަމަށެވެ.
އެމްއެމްޕީއާރްސީ މެދުވެރިކޮށް ހިންގި ޚިޔާނާތުގެ މައްސަލާގައި ދައުވާކުރަން ޝަރީއަތާ ހަމައަށް ގެންގޮސްފިނަމަ "ދައުލަތް އޮރިޔާން" ވާނެ ކަމަށާއި، ސިޔާސީ ނުފޫޒު ވަދެފައިވާކަމަށް މަހުލޫފު ތުހުމަތުކުރައްވާފައިވެއެވެ. މި ތުހުމަތުތަކަށް ރައްދު ދެއްވައި ޝަމީމް ވިދާޅުވީ މި މައްސަލާގައި ފުރިހަމަ ކުރަން ޖެހޭ މަސައްކަތްތައް ކުރިއަށްދާ ކަމަށެވެ. އެގޮތުން ފުލުހުންނާއެކު މަސައްކަތްތަކެއް ކުރަމުންދާކަން ފީޖީ ފާހަގަކުރެއްވިއެވެ.
މި މައްސަލައިގައި މަހުލޫފު ވިދާޅުވީ، ކުރިން ނިންމަވައިގެން ހުންނެވީ ޕީޖީ އޮފީހުން ގޮތެއް ނިންމުމުން އިސްތިއުފާ ދެއްވުމަށް ކަމަށެވެ. ނަމަވެސް ކަންކަން މިހާ ގޯސްކޮށް ދާތީ ދައުވާ ކުރިޔަސް ދެން އިސްތިއުފާ ދެއްވުމާމެދު ވިސްނަވާނެކަމަށް މަހުލޫފު ވިދާޅުވިއެވެ. އަދި އެކަން ރައީސަށް ވެސް ރަސްމީކޮށް ދަންނަވާނެކަން ފާހަގަކުރައްވައި މަހުލޫފު ވިދާޅުވީ، މަގާމުން ވަކިކުރުމަކީ ރައީސުލްޖުހޫރިއްޔާއަށް ގާނޫނު އަސާސީން މަތިކޮށްފައިވާ ބާރެއް ކަމުން، ގޮތެއް ނިންމަވާނީ ރައީސް ކަމަށެވެ.
