ރެނާޓޯ ހޯދުމުގެ ރޭހުގެ ކުރީގައި ލިވަޕޫލް

މި ފަހަރުގެ ޔޫރޯ ފުޓްބޯޅަ މުބާރާތުގައި ވިދާލި ޕޯޗުގަލުގެ މިޑްފީލްޑަރު ރެނާޓޯ ސަންޗޭސް ހޯދުމުގެ ރޭހުގެ ކުރީގައި އުޅެނީ ލިވަޕޫލް ކަމަށް ރިޕޯޓުތައް ބުނެފިއެވެ.

މީގެ ފަސް އަހަރު ކުރިން ޕޯޗުގަލުން ޔޫރޯ ކާމިޔާބުކުރިއިރު ވިދާލި ރެނާޓޯ ވަނީ މި ފަހަރުގެ ޔޫރޯގައިވެސް މޮޅު ކުޅުމެއް ދައްކާއެވެ. އެއާއެކު ފްރާންސްގެ ލިލްއަށް ކުޅެމުން އަންނަ އުމުރުން 24 އަހަރުގެ ރެނާޓޯ ހޯދަން ޔޫރަޕުގެ ބޮޑެތި ކުލަބުތަކުން އަންނަނީ ފާރަލަމުންނެވެ.

ރިޕޯޓުތައް ބުނާ ގޮތުން މި ފަހަރުގެ ޓްރާންސްފާ ބާޒާރުގައި ރެނާޓޯ ހޯދަން އެންމެ ބޮޑަށް މަސައްކަތްކުރަމުން އަންނަނީ ލިވަޕޫލާއި ބާސެލޯނާއިންނެވެ. ޔޫރަޕުގައި ރެނާޓޯގެ ޑިމާންޑް ބޮޑުވެފައިވާއިރު، ލިލްއިން ރެނާޓޯ ވިއްކަން ކަނޑައަޅާފައިވާ އަގަކީ 40 މިލިޔަން ޕައުންޑެވެ. އެހެންކަމުން މާލީ ގޮތުން އަޑިއަޅާލާފައިވާ މި ދަނޑިވަޅުގައި ބާސާއިން ރެނާޓޯ ނުގެންނާނެ ކަމަށް ދާދި ފަހުން ވަނީ ރިޕޯޓުކޮށްފައެވެ.

އެއާއެކު މި ފަހަރުގެ ޓްރާންސްފާގައި ރެނާޓޯ ބަދަލުވުން އެންމެ ގާތީ ލިވަޕޫލަށް ކަމަށް ރިޕޯޓުތައް ބުނެއެވެ. އަދި ޓްރާންސްފާ ބާޒާރު ބަންދުވުމުގެ ކުރިން، ރެނާޓޯގެ ޑީލުގެ ކަންކަން ނިންމުމުގެ މަސައްކަތް ލިވަޕޫލުން މިހާރު ކުރަމުން އަންނަ ކަމަށްވެސް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.

ބެންފީކާ ޓީމުން ފާހަގަވި ރެނާޓޯ 2016 ވަނަ އަހަރުގެ ޔޫރޯއަށްފަހު ބަދަލުވީ ޖަރުމަނުގެ ޗެމްޕިއަން ބަޔާން މިއުނިކަށެވެ. އެ ޓީމުގައި ރެނާޓޯ ތިން ސީޒަން ހޭދަކުރިއިރު، އޭނާ ވަނީ ބަޔާނުގެ ލޯނު އެއްބަސްވުމެއްގެ ދަށުން އިނގިރޭސި ޕްރިމިއާ ލީގުގެ ސްވަންސީ ސިޓީއަށް ކުޅެފައެވެ.

އެއަށްފަހު ރެނާޓޯ ލިލްއަށް ބަދަލުވީ 2019 ވަނަ އަހަރު 21 މިލިޔަން ޕައުންޑަށެވެ. އޭނާ އަކީ ލިލްގެ ތާރީޚުގައި އެ ޓީމަށް ސޮއިކުރި އެންމެ އަގުބޮޑު ކުޅުންތެރިޔާއެވެ. އެ ފަހަރު ރެނާޓޯ ވަނީ ލިލްއާއެކު ހަތަރު އަހަރުގެ އެއްބަސްވުމެއް ހަދާފައެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ހޫނު މޫސުމުގައެވެ.

މިދިޔަ ސީޒަނުގައި ލިލްއިން ފްރެންޗް ލީގު ކާމިޔާބު ކުރިއިރު ރެނާޓޯ ވަނީ އެ ޓީމުގައި މޮޅު ކުޅުމެއް ދައްކާފައެވެ. ނަމަވެސް ދާދި ފަހުން ލިބުނު އަނިޔާއެއްގެ ސަބަބުން ރެނާޓޯ ވަނީ ހަ ހަފުތާއަށް ކުޅުމާ ދުރަށްދާން ޖެހިފައެވެ.