ލ. ފޮނަދޫ މަގު ހެދުމުގެ ދެވަނަ ފިޔަވަހީގެ އަމަލީ މަސައްކަތް އީއައިއޭ ރިޕޯޓު ނިމުނުހާ އަވަހަކަށް ފަށާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ބުނެފިއެވެ.

ލ. ފޮނަދޫ މަގު ހެދުމުގެ ފުރަތަމަ ފިޔަވަހީގެ އަމަލީ މަސައްކަތް އެމްޓީސީސީން ފެށީ 2017 ވަނަ އަހަރުއެވެ. ނަމަވެސް މަސައްކަތް ހުއްޓި ދިގު މުއްދަތެއް ފާއިތުވީ ފަހުން، އަލުން އެމްޓީސީސީއާ ހަވާލުކޮށްގެން މަސައްކަތް ފެށީ 2019 ވަނަ އަހަރުގެ ޖޫންމަހުއެވެ. މިދިޔަ ޑިސެމްބަރުމަހު ވަނީ މަގުތަކުގައި ތާރުއެޅުމުގެ މަސައްކަތް ފަށާފައެވެ.

ލ. ފޮނަދޫ މަގުތައް ޒަމާނީ ފެންވަރަކަށް ތަރައްގީކުރުމުގެ ފުރަތަމަ ފިޔަވަހީގެ މަސައްކަތް މިހާރު ނިމުމަކާ ގާތްވެފައިވާއިރު، މި މަޝްރޫއުގެ ދެވަނަ ފިޔަވަހީގެ މަސައްކަތް އެމްޓީސީސީން މިހާރު ވަނީ ފަށާފައެވެ. މިކަމާއި ގުޅޭގޮތުން މީޑިއާތަކަށް މައުލޫމާތުދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ މި މަސައްކަތުގެ ޑިޒައިން މަސައްކަތް މިހާރު ނިމިފައިވާ ކަމަށެވެ. މިހާރު ކުރިއަށްދަނީ އީއައިއޭ ރިޕޯޓު ނިންމުމުގެ މަސައްކަތް ކަމަށާއި، މި ރިޕޯޓު އަންނަ ސެޕްޓެމްބަރު މަހުގެ ކުރިން ނިމޭނެ ކަމަށް އާޒިމް ވިދާޅުވިއެވެ. އީއައިއޭ ރިޕޯޓު ތައްޔާރުކޮށް ނިމުނުހާ އަވަހަކަށް ދެވަނަ ފިޔަވަހީގެ އަމަލީ މަސައްކަތް ފެށޭނެ ކަމަށް އާޒިމް ވަނީ ވިދާޅުވެފައެވެ.

ފޮނަދޫ މަގު ހެދުމުގެ ފުރަތަމަ ފިޔަވަހީގެ މަސައްކަތުގެ ތެރެއިން މިހާރު ނުނިމި ވަނީ ޕޭވްމެންޓް ނިންމުމުގެ މަސައްކަތާއި، މަގުތަކުގެ ފެން ހިންދާ ނިޒާމު ގާއިމްކުރުމުގެ މަސައްކަތެވެ. މި މަސައްކަތްތައް އަންނަ އޮކްޓޯބަރު މަހުގެ ނިޔަލަށް ނިންމާލެވޭނެ ކަމަށް އާޒިމް ވިދާޅުވިއެވެ. ފޮނަދޫ މަގު ހެދުމުގެ ފުރަތަމަ ފިޔަވަހީގައި އެރަށުގެ 13 މަގެއް ހަދާފައިވާކަމަށް އާޒިމް ވިދާޅުވިއެވެ.

ފޮނަދޫގެ މަގުތައް ތަރައްގީކުރުމާއި ގުޅޭގޮތުން ފޮނަދޫ ކައުންސިލްގެ ރައީސް އަހުމަދު ރިޔާޒް ވިދާޅުވީ ފޮނަދޫގެ މަގުތައް ހަދާއިރު ގިނަ ބަޔަކު އާންމުކޮށް ބޭނުންކޮށް އުޅޭ މަގުތައް ހެދުމަށް ޚާއްސަ ސަމާލުކަމެއް ދީފައިވާކަމަށެވެ. މީގެތެރޭގައި އޮފީސްތައް ހުންނަ މަގުތަކާއި، ރަށުގެ ބޮޑެތި މަގުތައް ހެދުމަށް ޚާއްސަ އިސްކަމެއް ދޭ ކަމަށް ރިޔާޒް ވިދާޅުވިއެވެ. ރިޔާޒް ވިދާޅުވީ މަގުތައް ނުހެދި މިވީ ދުވަސްތަކުގައި ފެން ބޮޑުވުމާއި، އަދިވެސް އެފަދަ އެތައް ދައްޗަކާއި ކުރިމަތިލާންޖެހުނު ކަމަށެވެ.

ލ. ފޮނަދޫ މަގު ހެދުމުގެ ދެވަނަ ފިޔަވަހީގެ މަސައްކަތް މިނިސްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ އިން އެމްޓީސީއާ ހަވާލުކޮށްފައިވަނީ މިއަހަރުގެ ޖެނުއަރީ މަހުގެ 20 ވަނަ ދުވަހުއެވެ. މި މަޝްރޫއުގެ ދަށުން 3.64 ކިލޯ މީޓަރުގެ ސަރަހައްދެއްގައި ތާރު އެޅުމާއި، ފެން ހިންދާ ނިޒާމެއް ގާއިމްކުރުމާއި، ސްޕީޑް ބްރޭކަރު ހަރުކުރުމާއި، މަގުމަތީ ނިޝާން ހަރުކުރުމާއި، މަގުބައްތި ހަރުކުރުމުގެ މަސައްކަތް އެމްޓީސީސީއާ ވަނީ ހަވާލުކޮށްފައެވެ. މި މަޝްރޫއަކީ 53.99 މިލިއަން ރުފިޔާގެ މަޝްރޫއެކެވެ.