މާލޭގެ މަގުތަކުގެ މަޝްރޫޢު އެހެން ބަޔަކާ ހަވާލުކުރައްވަން މުޢިއްޒު ބޭނުންފުޅުވާކަމަށް މޫކޭ ތުހުމަތުކުރައްވައިފި
19 އޯގަސްޓު 2021 | ބުރާސްފަތި 12:11ކުރީގެ ވިސްނުންފުޅުގެ ތެރެއިން ޚިޔާނާތާއި ވައްކަމުގައި ކަންކަން ކުރިއަށް ގެންދަންވެއްޖެނަމަ އުނދަގޫ ވާނެ
އާރްޑީސީ އަތުން މަޝްރޫޢު އަތުލުމަށް މޭޔަރ މަސައްކަތް ކުރައްވާ ކަަމަށް ތުހުމަތު ކުރެއްވި
މާލެސިޓީ ކައުންސިލްގެ މޭޔަރ ޑރ. މުޙައްމަދު މުޢިއްޒު މާލޭގެ މަގުތަކުގެ މަޝްރޫޢު އެހެން ބަޔަކާ ހަވާލުކުރައްވަން ބޭނުންފުޅުވާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މެނޭޖިންގ ޑިރެކްޓަރ މޫސާ ޢަލީ މަނިކު (މޫކޭ) ތުހުމަތުކުރައްވައިފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން މޫކޭ ވިދާޅުވީ މިހާރު ކަންތައްތައް ގެންދަވާ މިސްރާބު ގޮސް ނިމޭތަން ވެސް ފެނިވަޑައިގަންނަވާ ކަމަށެވެ. އާރްޑީސީ އަތުން މަޝްރޫޢު އަތުލުމަށް މޭޔަރ މަސައްކަތް ކުރައްވާ ކަމަށާއި, ކްލައިންޓަށް އިޙްތިރާމު ކުރުމުގެ ގޮތުން އެވާހަކަތައް ނުދައްކަވާ މަޑުޖައްސާލި ކަމަށެވެ. އެހެންނަމަވެސް މިއަދު އެކަންތައްތައް ރައްޔިތުންނަށް ސާފުކޮށްދޭން ޖެހޭ ކަމަށާއި, ކުރީގެ ވިސްނުންފުޅުގެ ތެރެއިން ޚިޔާނާތާއި ވައްކަމާއެކު ކަންތައްތައް ކުރިއަށް ގެންދަން ޖެހިއްޖެނަމަ އުނދަގޫ ވާނެ ކަމަށެވެ.
މޫކޭ ވިދާޅުވީ, މުޢިއްޒު އެދިވަޑައިގަންނަވާ ގޮތަށް މާލޭގެ މަގުތަކުގެ މަސައްކަތް އެހެންބަޔަކާ ހަވާލު ކުރާނެ ފޯމިލާއެއް ހޯދައިފިނަމަ މުޢިއްޒުއާ މައްސަލަ ނުޖެހޭނެ ކަމަށެވެ. މުކޭ މިހެން ވިދާޅުވެފައިވާއިރު މުޢިއްޒުއަށް ސަރުކާރުގެ މުއައްސަސާތައް ކަމުނުދާކަން އެމަނިކުފާނު ދަނީ ތަކުރާރުކޮށް ފާހަގަކުރައްވަމުންނެވެ.
މޭޔަރު ކަމަށް ހޮވިވަޑައިގަތުމަށްފަހު މުޢިއްޒު ގެންދަވަނީ މާލޭ ސިޓީގެ ރައްޔިތުންނަށް ބޭނުންވާ ކަންތައްތައް ކޮށްދެއްވުމަށް މަސައްކަތްތައް ކުރައްވަމުންނެވެ. މި މަސައްކަތްތައް ކޮށްދެއްވުމަށްޓަކައި ރައްޔިތުންނާ ބައްދަލުކުރައްވައި ރައްޔިތުންގެ ޚިޔާލުތައް ވެސް ގެންދަވަނީ ހޯއްދަވަމުންނެވެ. އަދި އެ ޚިޔާލުތަކާ ގުޅޭގޮތުން ސަރުކާރުގެ އެކި މުއައްސަސާތަކާއެކު މަޝްވަރާ ބައްދަލުވުންތައް ގެންދަވަނީ ބާއްވަވަމުންނެވެ. އެހެންނަމަވެސް މިފަދަ ބައްދަލުވުންތަކަށްފަހު، މުޢިއްޒުގެ ވާހަކަފުޅުން ހާމަވެގެންދާ އެއްކަމެއް އެބައޮތެވެ. އެއީ ސަރުކާރުގެ މުއައްސަސާތައް އެމަނިކުފާނަށް ކަމުނުދާ ކަމެކެވެ.
ދާދިފަހުން އެމަނިކުފާނު ވަނީ ގިނަ މުއައްސަސާތަކުން ޖެއްސުން ކުރާކަމަށް ތުހުތަމުކޮށް އެގޮތަށް އެކަން ނުކުރުމަށް އިލްތިމާސްކުރައްވާފައެވެ. ގިނަ މުއްސަސާތަކާއެކު މަސައްކަތް ކުރެއްވުމަކީ ވަރަށް ބޮޑު ގޮންޖެހުމަކަށް ވެފައިވާ ކަމަށް މުޢިއްޒު ގެންދަވަނީ ތަކުރާރުކޮށް ވިދާޅުވަމުންނެވެ.
ސަރުކާރުގެ ގިނަ މުއައްސަސާތަކާ ސިޓީ ކައުންސިލާ ދެމެދު މިހާރު ވަނީ މައްސަލަ ޖެހިފައެވެ. އެގޮތުން ގުޅީފަޅުގެ ބިމުގެ މައްސަލާގައި ޕްލޭނިންގ މިނިސްޓްރީއާ ދެބަސް ވެފައިވާއިރު، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)އަށް ދޫކޮށްފައިވާ ބިމެއް މާލެ ސިޓީ ކައުންސިލުން ހުސްކުރި މައްސަލާގައި ސްޓެލްކޯއިން ވެސް ވަނީ ހިތްހަމަނުޖެހުން ފާޅުކޮށްފައެވެ. އަދި އެތަނުގައި ހުރި ބައެއް ސާމާނުތައް ގެއްލިފައިވާއިރު ފެންސުތައް ނަގައިގެން ގެންދިޔަކަމުގެ ތުހުމަތު ވެސް ސިޓީ ކައުންސިލްގެ މައްޗަށް ކުރެވި، އެ މައްސަލަ މިހާރު ވަނީ ފުލުހުންނަށް ހުށަހަޅާފައެވެ.
މީގެ އިތުރުން ވޭސްޓް މެނޭޖްމަންޓް ކޯޕަރޭޝަން (ވެމްކޯ)އާއެކު ބޭއްވި ބައްދަލުވުމަށްފަހު ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)އިން ގޭގެއަށް އަރައި, ކުނި ނަގާނެ ކަމަށް ވިދާޅުވެ މުއިއްޒު ވަނީ ވާހަކަދައްކަވާފައެވެ. މާލޭގެ ކުނީގެ މައްސަލަ ހައްލުކުރުމަށްޓަކައި ގޭބިސީތަކުން ކުނި ނެގުމާއި މާލޭގެ އާންމު ތަންތަނުން ކުނި ނެގުމަށް ކުރަމުންދާ މަސައްކަތް މާލޭގެ މޭޔަރު ޑރ. މުޙައްމަދު މުޢިއްޒަށް އޮޅިވަޑައިގެންފައިވާ ކަމަށާއި، ގޭބީސީތަކުން ކުނި ނެގުމުގެ އިންތިޒާމަށް ބަދަލެއް ގެނައުމަށް މަޝްވަރާ ނުކުރެވޭ ކަމަށް މެނޭޖިން ޑިރެކްޓަރު އާދަމް މުޙައްމަދު ވަނީ ވިދާޅުވެފައެވެ.
މާލޭ ސިޓީގެ މަގުތައް ޒަމާނީ ފެންވަރަށް ތަރައްޤީކުރުުމުގެ މަޝްރޫޢުގެ ދަށުން ހެންވޭރު އުތުރު ސެގްމަންޓްގެ އަމަލީ މަސައްކަތް ފެށުމަށް އަންގާރަ ދުވަހު ރޯޑް ޑިވެލޮޕްމަންޓް ކޯޕަރޭޝަނާއެކު ބޭއްވި ހަފްލާގައި ވެސް މުޢޖއްޒު ވަނީ ބަހުގެ ހޫނު ހަމަލާތަކެއް ރައްދުކުރައްވާފައެވެ. އެމަނިކުފާނު ވިދާޅުވީ, ސަރުކާރުން އެކި ކުންފުނިތައް މެދުވެރިކޮށް "ޖެއްސުން ކުރުމަށް" މަސައްކަތް ކުރާ ކަމަށާއި, އަދި ޙަފްލާ އިން ވެސް އެކަން ފެނިގެންދާ ކަމަށެވެ. ސިޓީ ކައުންސިލްގެ އެއްވެސް ލޯގޯއެއް ހަފްލާގައި ނެތްކަން ފާހަގަކުރައްވައި، ހަފްލާގައި ވާހަކަދެއްކެވުމުގެ ފުރުސަތަކަށް އެދިވަޑައިގެން އާދޭސް ކުރައްވަން ޖެހިވަޑައިގަތް ކަމަށް މުޢިއްޒު ވިދާޅުވިއެވެ.
މި ވާހަކަތަކަށް ރައްދުދެއްވައި އާރްޑީސީގެ މެނޭޖިންގ ޑިރެކްޓަރ މޫސާ ޢަލީ މަނިކު (މޫކޭ) ވިދާޅުވީ އާރްޑީސީން އެގޮތަށް މަސައްކަތް ނުކުރާ ކަމަށެވެ. އަދި ސިޓީ ކައުންސިލާއެކު އެއްބާރުލުން ދީގެން މަސައްކަތް ކުރިއަށް ގެންދެވުމަށް ތައްޔާރަށް ހުންނެވި ކަމަށެވެ. އާރްޑީސީގެ އަމާޒަކީ ސިޓީ ކައުންސިލަށް ޖެއްސުން ކުރުން ނޫންކަން ފާހަގަކުރައްވައި މޫކޭ ވިދާޅުވީ, ކުންފުނީގެ ބޭނުމަކީ ރައްޔިތުންނަށް އަވަސް، ފަސޭހަ ޚިދުމަތެއް ފޯރުކޮށްދިނުން ކަމުގައެވެ.
މޫކޭ މިހެން ވިދާޅުވެފައިވާއިރު މުޢިއްޒު ގެންދަވަނީ ވަރަށް ފާޅުކަން ބޮޑު ގޮތެއްގައި ސަރުކާރުގެ މުއައްސަސާތައް ބަދުނާމުވާ ގޮތަށް ވާހަކަ ދައްކަވަމުންނެވެ.
