ދީނުގެ އަސާސްތަކާ އެއްގޮތަށް ސަރުކާރުން އަމަލުކުރާހާ ހިނދަކު ކޯލިޝަންގައި ދެމިއޮންނާނަން: ޢިމްރާން

ސިޔާސީ މައިދާނުގައި, އިސްލާމް ދީނުގެ އަސާސްތަކާއި އެއްގޮތަށް ރާއްޖޭގެ ސިޔާދަތު ރައްކާތެރިކުރުމަށް މި ސަރުކާރުން މަސައްކަތްކުރާހާ ހިނދަކު އަދާލަތު ޕާޓީން ކޯލިޝަންގައި ދެމި އޮންނާނެ ކަމަށް ހޯމް މިނިސްޓަރ އަދި ޢަދާލަތު ޕާޓީގެ ރައީސް ޢިމްރާން ޢަބްދުﷲ ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވީ އެ ޕާޓީގެ 16ވަނަ އަހަރީ ދުވަހުގެ މުނާސަބަތުގައި ބޭއްވި ޙަފްލާގައި ވާހަކަދައްކަވަމުންނެވެ. މިނިސްޓަރގެ ވާހަކަފުޅުގައި ވަނީ އެ ޕާޓީއަކީ ރާއްޖޭގެ ސިޔާސީ މައިދާނަށް އުފަންވި 3 ވަނަ ސިޔާސީ ޕާޓީކަން ފާހަގަކުރައްވާފައެވެ.

އެމަނިކުފާނު ވިދާޅުވީ ޢަދާލަތު ޕާޓީ ދެމިއޮންނަނީ އިސްލާމް ދީނުގެ ހައްގުގައި ނިންމަންޖެހޭ ނިންމުންތައް ނިންމުމަށާއި, ދިވެހިރާއްޖޭގެ އިސްތިޤްލާލަށް ލޮޅުން އަރާފަދަ ކަމެއް ވިޔަ ނުދޭން ކަމަށެވެ. 2005ވަނަ އަހަރު އެ ޕާޓީ އުފެދުނީއްސުރެ ގެންގުޅެމުން އަންނަ ހަރުދަނާ ސިޔާސަތުތަކުގެ ސަބަބުން މިއަދު ޢަދާލަތު ޕާޓީ ވަނީ ސަރުކާރުގެވެސް ވަރަށް މުހިންމު ބައިވެރިއަކަށް ވެފައި ކަމަށް ޢިމްރާން ވިދާޅުވިއެވެ.

އިމްރާން ވިދާޅުވީ, އަދާލަތު ޕާޓީއަކީ މިއަދުގެ ކޯލިޝަން ސަރުކާރުގެ ބައިވެރިއަކަށް ވާއިރު، އިސްލާމް ދީނުގެ އަސާސްތަކާއި ރާއްޖޭގެ ސިޔާދަތުތައް ދަމަހައްޓަން މި ސަރުކާރުން މަސައްކަތްކުރާހާ ހިނދަކު އެ ޕާޓީ ކޯލިޝަންގައި ދެމި އޮންނާނެ ކަމަށެވެ. އަދި ސަރުކާރުން މިކަންކަމާ ޚިލާފުވާނަމަ ކޯލިޝަނުން ވަކިވާން ފަހަތަކަށް ނުޖެހޭނެ ކަމަށެވެ.

ޢިމްރާން ވިދާޅުވީ ޢަދާލަތު ޕާޓީ އުފެދިގެން މި ފާއިތުވި 16 އަހަރުގެ ތެރޭގައި އެ ޕާޓީން ވަނީ ޕާޓީގެ ހިންގުން ހަރުދަނާ ކުރުމަށް ގިނަ މަސައްކަތްތަކެއް ކޮށްފައި ކަމަށެވެ. އެގޮތުން ޕާޓީގެ އެކި މަގާމުތައް އުފައްދައި މަގާމުތަކަށް ބޭފުޅުން ޢައްޔަންކޮށްފައިވާ ކަމަށެވެ. އަދި އެ ޕާޓީގެ ސްޓްރެޓެޖިކް އެކްޝަން ޕްލޭން އެކުލަވާލުމަށް މިހާރު މަސައްކަތް ކުރައްވަމުންދާ ކަމަށެވެ. މިކަންކަމުގައި އެ ޕާޓީން ވަނީ އެހެނިހެން ސިޔާސީ ޕާޓީތަކަށް ނަމޫނާ ދައްކާފައިކަމަށްވެސް މިނިސްޓަރ ވިދާޅުވިއެވެ.

މި ވާހަކަފުޅަށްފަހު ޢިމްރާން ވަނީ ޢަދާލަތު ޕާޓީއާ ގުޅުމުގެ ފުރުސަތު އަބަދުވެސް އޮންނާނެކަން ފާހަގަކުރައްވާފައެވެ. ވަކިން ޚާއްސަކޮށް ޒުވާނުންނަށް އެ ޕާޓީއާ ގުޅުމުގެ ފުރުސަތު އޮތް ކަމަށް އެމަނިކުފާނު ވިދާޅުވިއެވެ. މިހާރު ޕާޓީގައި ތިބި މެމްބަރުންނަށް ބަލައިލި ނަމަވެސް ތަޢުލީމީ، ޒުވާން ގިނަ މެމްބަރުން ތިބިތަން ފެންނާނެ ކަމަށް ޢިމްރާން ވިދާޅުވިއެވެ.

އަދާލަތު ޕާޓީ އުފެދުމަށް 16 އަހަރު ފުރިފައިވާއިރު، އަދާލަތު ޕާޓީއަކީ ރާއްޖޭގައި އެންމެ ފުރަތަމަ އުފެދުނު ސިޔާސީ ޕާޓީތަކުގެ ތެރެއިން މިއަދާ ހަމައަށްވެސް ދެމިއޮތް ޕާޓީތަކުގެ ތެރޭގައި ހިމެނޭ ޕާޓީއެކެވެ.