ހެއްކާބެހޭ 45 އަހަރުވީ ޤާނޫނު އުވާލުމަށް، ހެއްކާބެހޭ އައު ބިލެއް އޭޖީ އޮފީހުން ފޮނުވައިފި
ހެކިބަސް ނެގުމުގެ މަރުޙަލާތައްވެސް ބަޔާން ކޮށްފައިވޭ
ބަންޑާރަނައިބު އިބްރާހީމް ރިފްޢަތު
މިހާރު އަމަލު ކުރަމުންދާ, ހެއްކާބެހޭ ޤާނޫނުގެ ބަދަލުގައި ޒަމާނާ އެކަށީގެންވާ އުސޫލުތައް އެކުލެވޭ, ހެއްކާބެހޭ ބިލެއް ރައީސް އޮފީހަށް ފޮނުވައިފިއެވެ.
އެކަމާ ގުޅޭގޮތުން ބަންޑާރަނައިބު (އޭޖީ) އޮފީހުން ބުނީ، ހެއްކާބެހޭ އުސޫލުތައް މިހާރު ތަންފީޒު ކުރެވެމުން ދަނީ ޤާނޫނު ނަންބަރު 24/76 (ހެއްކާބެހޭ ޤާނޫނު)އާއި، ޤާނޫނު ނަންބަރު 14/72 (އަންހެނުންގެ ހެކިބަހުގެ ޤާނޫނު)ގެ ދަށުން ކަމަށެވެ. އެގޮތުން މި ބިލަކީ ޤާނޫނު އަސާސީގެ 42ވަނަ މާއްދާއިން ކަށަވަރު ކޮށްދީފައިވާ "އިންސާފުން ޝަރީއަތް ކުރެވުމުގެ ޙައްޤު" އެ ގޮތުގައި ކަށަވަރު ކޮށްދިނުމަށް ބޭނުންވާ މައިގަނޑު އެއް އަސާސްކަމަށްވާ, ހެކީގެ އުސޫލުތައް ބަޔާންކުރާ ތަފްސީލީ އަދި ޒަމާނީ ޤާނޫނީ އޮނިގަނޑެއް ތަޢާރަފު ކުރުމަށްޓަކައި ހުށައަޅާ ބިލެއްކަމަށް އެއޮފީހުން މައުލޫމާތު ދެއެވެ.
ބަންޑާރަނައިބުގެ އޮފީހުން ބުނީ، މި ބިލުގައި ހެކީގެ ބާވަތްތަކާއި، ހެކި ދަރަޖަ ކުރެވިގެންވާ ގޮތާއި، ކަމެއް ސާބިތު ކުރުމަށް ހެކި ބޭނުންވާ ނިސްބަތާއި، ހެކި ހުށައެޅުމާއި، ހެކި ބަލައިގަތުމާއި، ވަޒަން ކުރުމުގައި އަމަލު ކުރަންޖެހޭ އުސޫލުތަކާއި، އެނޫންވެސް އާންމު އުސޫލުތަކާއި މިންގަނޑުތައް ކަނޑައަޅާފައިވާނެ ކަމަށެވެ.
މި ޤާނޫނު ހިނގާނެ ދާއިރާތައްވެސް އެ އޮފީހުން ވަނީ ބަޔާންކޮށްފައެވެ. އެގޮތުން ދިވެހިރާއްޖޭގެ ހުރިހާ ކޯޓުތަކެއްގައި ހިނގާ މަދަނީ އަދި ޖިނާއީ މައްސަލަތަކާއި، ޓްރައިބިއުނަލްގައި ހިނގާ މައްސަލަތަކާއި، ދައުލަތުގެ އިދާރާތަކުން ތަހުގީގުކުރާ ނުވަތަ ފިޔަވަޅު އަޅާ މައްސަލަތަކާއި، ދައުލަތުގެ އިދާރާއަކުން ތައުދީބީ ފިޔަވަޅު އެޅުމުގެ ބާރު އޮވެގެން ބަލާ މައްސަލަތަކުގެ މައްޗަށް މި ޤާނޫނު ހިނގާނެކަމަށް އޭޖީ އޮފީހުން މައުލޫމާތު ދެއެވެ.
އޭޖީ އޮފީހުން ވަނީ ވަސީލަތަށް ބުރަވެ ހެކި ބައި ކުރެވޭ ގޮތާއި، ދަރަޖައަށް ބުރަވެ ހެކި ބައިކުރެވޭ ގޮތްތަކާއި، ގުޅުމަށް ބުރަވެ ހެކި ބައި ކުރެވޭ ގޮތްތައް މި ބިލުގައި ބަޔާންކޮށްފައެވެ. އަދި ޝަފަހީ ހެއްކާއި، ކިތާބީ ހެކީގެ އިތުރުން، މާއްދީ ހެއްކަކީ ކޮބައިކަންވެސް ވަނީ ބަޔާންކޮށްފައެވެ.
އޭގެ އިތުރުން، ހެކިބަސް ނެގުމުގެ މަރުޙަލާތައްވެސް ބަޔާންކޮށްފައިވާއިރު، އެގްޒެމިން ކުރުމުގެ މަރުޙަލާއާއި، ކްރޮސް-އެގްޒެމިން ކުރުމުގެ މަރުޙަލާގެ އިތުރުން، ރީ-އެގްޒެމިން ކުރުމުގެ މަރުޙަލާ ބަޔާންކޮށްފައިވެއެވެ. އަދި ހެކި ވަޒަން ކުރުމާއި، ހެކީގެ ގޮތުގައި ހުށައެޅޭނެ، އިމްތިޔާޒް ލިބިގެންވާ ކަންކަންވެސް ވަނީ ބަޔާންކޮށްފައެވެ.
އޭޖީ އޮފީހުން މައުލޫމާތު ދޭ ގޮތުގައި މި ބިލު ޤާނޫނަކަށް ވުމާއެކު ކުރިން އަމަލު ކުރަމުން އައި ހެއްކާބެހޭ ޤާނޫނާއި އަންހެނުންގެ ހެކިބަހުގެ ޤާނޫނު އުވިގެންދާނެއެވެ.
