ޕާކިސްތާނުން ދިވެހި ސިވިލް ސަރވިސްއަށް ބައެއް ތަކެތި ހަދިޔާކޮށްފި

ޕާކިސްތާނުން ދިވެހި ސިވިލް ސަރވިސްއަށް ބައެއް ތަކެތި ހަދިޔާކޮށްފިއެވެ.

ޕާކިސްތާން ހައިކޮމިޝަންގެ ފަރާތުން ސިވިލް ސަރވިސް ކޮމިޝަނަށް ޑިވެލޮޕްމަންޓް އެސިސްޓެންސްގެ ގޮތުގައި ހަދިޔާކުރެއްވީ، އޮފީސް އިކުއިޕްމަންޓުތަކެކެވެ. ޕާކިސްތާންގެ ފަރާތުން މިތަކެތި ހަދިޔާކޮށްފައިވަނީ ސިވިލް ސަރވިސް ކޮމިޝަނުގައި ބޭއްވި ޚާއްސަ ރަސްމިއްޔާތެއްގައި، ޕާކިސްތާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ވައިސް އެޑްމިރަލް އަތާރް މުޚްތާރެވެ. ސިވިލް ސަރވިސް ކޮމިޝަންގެ ފަރާތުން މިތަކެއްޗާ ހަވާލުވެވަޑައިގަތީ އެކޮމިޝަންގެ ރައީސް މުޙައްމަދު ނާސިހެވެ.

މި ރަސްމިއްޔާތުގައި ވާހަކަފުޅު ދައްކަވަމުން ސަފީރު ވިދާޅުވީ، ޕާކިސްތާން ސަރުކާރުގެ ފަރާތުން ހަދިޔާކުރި މިތަކެއްޗާއެކު ރައްޔިތުންނާ ގުޅުންހުރި ޚިދުމަތްތައް ފޯރުކޮށްދިނުމަށް ސިވިލް ސަރވިސް ކޮމިޝަނުން ކުރައްވާ މަސައްކަތްތަކަށް އިތުރު ކުރިއެރުންތަކެއް ލިބިގެންދާނެކަމަށް އުއްމީދުކުރައްވާ ކަމަށެވެ. ރާއްޖެއާއި ޕާކިސްތާނާދެމެދު އޮތް ޒަމާންވީ ގާތްގުޅުން ފާހަގަކުރައްވައި، މިގުޅުން އެކި ރޮނގުތަކުން އިތުރަށް ފުޅާކުރުމަށް ޝައުގުވެރިވެލައްވާކަން ވަނީ ފާހަގަކުރައްވާފައެވެ. އަދި ޕާކިސްތާން ސަރުކާރުން ރާއްޖެއަށް ތައުލީމީ ދާއިރާއިންނާއި، ސިއްޙީ ދާއިރާއިން އެހީތެރިކަން ފޯރުކޮށްދިނުމުގައި ދެމި ހުންނާނެކަމުގައި ވިދާޅުވިއެވެ. ރާއްޖޭގެ ސިވިލް ސަރވިސްއާއި ޕާކިސްތާނުގެ ސިވިލް ސަރވިސްއާ ދެމެދު ގާއިމުވެފައިވާ ގުޅުމުގެ ސަބަބުން މުވައްޒަފުންނަށް ތަމްރީނު ޕްރޮގްރާމްތައް ހިންގުމުގައި އެހީތެރިކަން ލިބިގެންދާނެކަމަށް ވިދާޅުވިއެވެ.

ރާއްޖޭގެ ސިވިލް ސަރވިސްގެ ކަންކަން ހަރުދަނާކޮށް ޑިޖިޓަލައިޒްކުރުމަށް ކުރާ މަސައްކަތަށް އެހީވުމުގެ ގޮތުން ޕާކިސްތާނުން ހަދިޔާކުރި ތަކެތީގެ ތެރޭގައި 75 އިންޗީގެ ސްމާރޓް ޓީވީއަކާއި، 16 ކޮމްޕިއުޓަރު ސިސްޓަމާއި، 6 މޮނީޓަރުގެ އިތުރުން 3 ލެޕްޓޮޕް ހިމެނެއެވެ.