ކާބަން މޮނޮކްސައިޑުން ޓްރީޓްކޮށްފައިވާ މަސް ވިއްކަމުންދާތީ ސަމާލުވުމަށް އިލްތިމާސްކޮށްފި
18 އޯގަސްޓު 2021 | ބުދަ 03:42ރޯ މަހުގެ ތާޒާކަން ގެއްލުނަސް އެކުލަ ބަދަލު ނުވާނެ
ކަނޑުމަސް ވިއްކުމުގެ ތެރެއިން،
ކާބަން މޮނޮކްސައިޑުން ޓްރީޓްކޮށްފައިވާ މަސް ވިއްކަމުންދާތީ ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީން (އެމްއެފްޑީއޭ) އިން އިލްތިމާސްކޮށްފިއެވެ.
އެމްއެފްޑީއޭއިން ބުނީ ރާއްޖޭގެ ބާޒާރުގައި ވިއްކާ ކަނޑުމަހުގެ ބައެއް ބާވަތްތަކުގައި ރަތް ކުލަ ހިފެހެއްޓުމަށް ކާބަން މޮނޮކްސައިޑުން ޓްރީޓްކޮށްގެން، ލޭބަލްގައި އެ މައުލޫމާތު ނުހިމަނާ ވިއްކަމުން ދާކަން އެއޮތޯރިޓީން ނެގި ސާންޕަލް އިން ވަނީ ކަށަވަރުކުރެވިފައި ކަމަށެވެ.
ކާބަން މޮނޮކްސައިޑުން ޓްރީޓްމަންޓް ދިނުމުން ކަނޑުމަހުގެ ބާވަތްތަކަށް ގެނެސްދޭ ތާޒާ ރަތްކުލައަކީ ރޯ މަހުގެ ތާޒާކަން ގެއްލުނަސް، އެ ކުލަ ބަދަލުނުވާ ކުލައެއްކަން ފާހަގަކޮށް އެމްއެފްޑީއޭއިން ބުނީ ރޯމަހުގެ ކުލައަކީ އޭގެ ތާޒާކަން ބެލުމަށް ބަލާ އެއްމިންގަނޑުކަމުން، ކާބަން މޮނޮކްސައިޑުން ޓްރީޓް ކުރުމަކީ މަހުގެ އަސްލު ކުލަ ފޮރުވި، މަސް ގަންނަ ފަރާތްތަކަށް އޭގެ ތާޒާކަން އޮޅޭނެ ކަމެއް ކަމަށެވެ.
އެހެންކަމުން މަސް ވިއްކާ އަދި ގަންނަ މީހުން މިކަމަށް ސަމާލުވުމަށް އެމްއެފްޑީއޭއިން ވަނީ އިލްތިމާސްކޮށްފައެވެ. އަދި މިފަދަ އުފެއްދުންތައް ވިއްކަން ހުރިނަމަ ނުވަތަ ޝައްކުވާނަމަ އެ އޮތޯރިޓީގެ ވައިބަރ ނަންބަރު 7603204 އަށް ފޮޓޯއާއެކު މައުލޫމާތު ހިއްސާކޮށްދިނުމަށް އެމްއެފްޑީއޭއިން އެދިފައިވެއެވެ.
