ވަޒީފާ ގެއްލުނު މީހުންނަށް އެހީވުމަށް 19 މިލިއަން ޑޮލަރު ދޫކޮށްފައިވޭ: ވޯލްޑް ބޭންކް

ދިވެހިރާއްޖެއިން ކޮވިޑް-19ގައި ވަޒީފާގައި ގެއްލުނު 18،000ށް ވުރެ ގިނަ މީހުންނަށް އެހީތެރިކަން ފޯރުކޮށްދީފައިވާ ކަމަށް ވޯލްޑް ބޭންކުން ބުނެފިއެވެ.

ސާކުގެ ގައުމުތަކަށް ވޯލްޑް ބޭންކުން ކަނޑައަޅާފައި ހުންނަވާ ނާއިބުރައީސް ހާޓްވިގް ޝަފާ ވިދާޅުވީ ކޮވިޑް-19ގައި ވަޒީފާގައި ގެއްލުނު 18،000ށް ވުރެ ގިނަ މީހުންނަށް ވޯލްޑް ބޭންކްގެ ފަރާތުން އެހީތެރިކަން ފޯރުކޮށްދީފައިވާ ކަމަށެވެ. އެގޮތުން އިންކަމް ސަޕޯޓް އެލަވަންސްގެ ގޮތުގައި 19 މިލިއަން ޑޮލަރު އެހީގެ ގޮތުގައި ދޫކޮށްފައިވާ ކަމަށް އޭނާ ވިދާޅުވިއެވެ.

މީގެ ތެރެއިން ޚާއްސަ އިސްކަމެއް ދީފައިވަނީ އަންހެނުންނާއި، އަމިއްލަ މަސައްކަތް ކުރާ މީހުންނަށް ކަމަށް ވެސް އޭނާ ވިދާޅުވިއެވެ.

ރާއްޖޭގެ ހާލަތާ ބެހޭ ގޮތުން ވޯލްޑް ބޭންކުން ބުނެފައިވަނީ މާލީ ހާލަތާއި ދަރަނި ބެލެހެއްޓުން މެނޭޖުކޮށްގެން، އިގުތިސޯދީ ކުރިއެރުމާއި ތަރައްގީ ރާއްޖެއަށް ގެނެވޭނެ ކަމަށާއި، ދަތިހާލަތުގައި ވެސް ކާމިޔާބީއާ ހަމައަށް ވާސިލްވެވިދާނެ ކަމަށެވެ. އަދި ރާއްޖޭގެ އިގުތިސޯދު މިހާރު އޮތީ ކުރީގެ ހާލަތަށް ދިއުމުގެ މަގުމަތީގައިކަން ފާހަގަކޮށްފައިވެއެވެ. އެއީ ކޮވިޑް-19އާ ގުޅިގެން ރާއްޖެއިން އެޅި ހަރުދަނާ ފިޔަވަޅުތަކާއި، މިހާލަތުގައި ފަތުރުވެރިކަމުގެ ސިނާއަތް ކުރިއެރުވުމަށް ރާއްޖެއިން ކުރަމުންދާ މަސައްކަތްތަކު ސަބަބުން ކަަމަށް ވޯލްޑް ބޭންކުން ބުނެފައިވެއެވެ.

މީގެ އިތުރުން ކުދި އަދި މެދު ފަންތީގެ ވިޔަފާރިތައް ނެގެހެއްޓުމަށް ކުރަމުންދާ މަސައްކަތްތައް ވެސް ވޯލްޑް ބޭންކުން ފާހަގަކޮށްފައިވެއެވެ.

ކޮވިޑް-19އާ ގުޅިގެން ވޯލްޑް ބޭންކުން ދަނީ ރާއްޖެއަށް އެކި ދާއިރާތަކުން އެހީތެރިކަން ފޯރުކޮށްދެމުންނެވެ. އެގޮތުން ކޮވިޑް-19 އާ ގުޅިގެން ވަޒީފާއަށް އަސަރުކޮށްފައިވާ ފަރާތްތަކަށް އެހީވުމުގެ ގޮތުން ރާއްޖެއަށް މީގެ ކުރިން 12.8 މިލިއަން ޑޮލަރު ވެސް ދީފައިވެއެވެ. ޖުމްލަ 182 މިލިއަން ޑޮލަރުގެ އަގުހުރި 10 މަޝްރޫއެއް ވޯލްޑް ބޭންކުން ރާއްޖޭގައި ހިންގަމުންދާއިރު، ރާއްޖެއަށް އެހީތެރިވުމުގެ ގޮތުން 7.3 މިލިއަން ޑޮލަރުގެ އަވަސް އެހީގެ ޕެކޭޖެއް ވޯލްޑް ބޭންކުން ވަނީ މިދިޔަ އޭޕްރީލް މަހު ރާއްޖެއަށް ފޯރުކޮށްދީފައެވެ.