ރައީސް ޞާލިޙު ތިމަރަފުށީ ކައުންސިލާ ބައްދަލުކުރައްވައިފި
ކައުންސިލުން ހުށަހެޅި ކަންކަން ހައްލުކޮށްދެއްވާނެ ކަމަށް ރައީސް ވިދާޅުވި
ރައީސް ތިމަރަފުށީ ކައުންސިލް މެންބަރުންނާ ބައްދަލު ކުރެއްވުން
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކޮޅުމަޑުލަށް ކުރައްވަމުން ގެންދަވާ ދަތުރުފުޅުގެ ތެރެއިން ތިމަރަފުށީ ކައުންސިލާ ބައްދަލުކުރައްވައިފިއެވެ.
މި ބައްދަލުކުރެއްވުން އޮތީ ތިމަރަފުށީ ކައުންސިލް އިދާރާގައެވެ. ތިމަރަފުށީ ކައުންސިލާއެކު ބޭއްވި ބައްދަލުވުމުގައި އެ ކައުންސިލުން ވަނީ ދިމާވެފައިވާ ބައެއް ދަތިތަކާއި ގުޅޭ ގޮތުން ރައީސަށް މައުލޫމާތު ދެއްވާފައެވެ. ރައީސް ވަނީ ކައުންސިލުން ހުށަހެޅި ކަންކަން ހައްލުކޮށްދެއްވާނެކަމުގެ ޔަގީންކަން ދެއްވާފައެވެ. ތިމަރަފުށީ ކައުންސިލްގައި ބޭއްވެވި މި ބައްދަލުކުރެއްވުމުގައި ތިމަރަފުށީ ކައުންސިލުގެ މެންބަރުން ވަނީ ރަށް ގިރުމުގެ މައްސަލައާއި، ރަނގަޅު ސިއްހީ ނިޒާމެއް ނެތުމާއި، ފަތުރުވެރިކަން ތަރައްގީ ކުރުމާއި، މަގު ހެދުމުގެ މަސައްކަތާއި، ބަނދަރު ބޮޑުކުރުމުގެ މަސައްކަތް އަދި އިޤްތިޞާދީގޮތުން ނަފާ ހޯދުމުގެ ކަންކަމާ ގުޅޭގޮތުން ވަނީ ރައީސާ މަޝްވަރާ ކުރައްވާފައެވެ.
މި ބައްދަލުކުރެއްވުމުގައި ރައީސް ވަނީ ކައުންސިލުން ހުށަހެޅި ކަންކަން ހައްލުކޮށްދެއްވާނެކަމުގެ ޔަގީންކަށް ދެއްވާފައެވެ. އަދި ތިމަރަފުށީގެ ތަރައްގީގެ މަޝްރޫއުތައް ރޭވިފައިވާ ގޮތާއި, މިހާރު ކުރެވޭނެ ކަންކަމާއި, މެދުރާސްތާ އަދި ދުރު ރާސްތާގައި ކުރެވޭ ކަންކަމާ ގުޅޭގޮތުން ރައީސް ވަނީ މަޝްވަރާ ކުރައްވާފައެވެ. ރައީސް ވަނީ ތިމަރަފުއްޓަށް ގިނަ ކަންކަން ކޮށްދެއްވާނެ ކަމަށް ވިދާޅުވެ, މިހާރު ހުރި ދަތިތައް ހައްލު ކޮށްދެއްވާނެ ކަމަށް ވިދާޅުވެފައެވެ. ރައީސް ވަނީ ތިމަރަފުށީގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުންނާވެސް ބައްދަލު ކުރައްވައި އެ ކޮމިޓީގެ ކަންބޮޑުވުންތައް ވެސް އައްސަވާފައެވެ.
ރައީސް ތިމަރަފުއްޓަށް ވަޑައިގެންނެވުމުން އެރަށުގެ ރައްޔިތުންގެ ފަރާތުން ވަނީ ރައީސާއި އެމަނިކުފާނާއެކު ވަޑައިގެންނެވި ވަފުދުގެ ޝަރަފުގައި ފަރިއްކޮޅެއް ވެސް ދެއްވާފައެވެ.
ރައީސުލްޖުމްހޫރިއްޔާގެ މި ދަތުރުފުޅުގައި ކޮޅުމަޑުލުގެ ހަތް ރަށަކަށް ޒިޔާރަތްކުރެއްވުމަށް ހަމަޖެހިފައިވެއެވެ. މި ރަށްރަށަށް ކުރައްވާ ޒިޔާރަތްތަކުގައި އެމަނިކުފާނު ވަނީ އެރަށްރަށުގެ ބައެއް ތަންތަނަށް ޒިޔާރަތްކުރައްވައި އެތަންތަނުގެ ހާލަތު ބައްލަވާލައްވައި، ބައެއް މުއައްސަސާތަކުގެ އިސްވެރިންނާއި، ކައުންސިލްތަކާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި، މަސްވެރިންނާއި، ދަނޑުވެރިންނާއި, އަދި ވިޔަފާރިވެރިންނާ ބައްދަލުކުރެއްވުމަށް ހަމަޖެހިފައެވެ. މީގެ އިތުރުން ވެސް ރައީސުލްޖުމްހޫރިއްޔާގެ މި ދަތުރުފުޅުގައި އެ އަތޮޅު އޮމަދޫ ބަނދަރު ހުޅުއްވައިދެއްވައި، އެރަށު ރައްޔިތުންނާ ބައްދަލުކުރެއްވުމަށް ވަނީ ހަމަޖެހިފައެވެ.
އެމަނިކުފާނުގެ މި ދަތުރުފުޅުގައި ފުރަތަމަ ވަޑައިގަތީ ތިމަރަފުށްޓަށެވެ. އަދި އެއަށްފަހު ކިނބިދޫއަށާއި، އޮމަދޫއަށާއި، ވޭމަންޑޫއަށާއި, ވަންދޫއަށާއި، ކަނޑޫދޫއަށާއި، ގާދިއްފުށްޓަށް އެމަނިކުފާނު ވަޑައިގަތުމަށް ހަމަޖެހިފައިވެއެވެ.
ރައީސުލްޖުމްހޫރިއްޔާގެ މި ދަތުރުފުޅު ނިންމަވާލެއްވުމަށްފަހު މާލެ ވަޑައިގަތުމަށް ހަމަޖެހިފައިވަނީ އަންނަ ބުރާސްފަތި ދުވަހުގެ ރެއެވެ.
