ރައީސް ޞާލިޙު ތިމަރަފުއްޓަށް ވަޑައިގެންފި
މިރޭ ތިމަރަފުށީ ކައުންސިލާ ރައީސް ބައްދަލު ކުރައްވާނެ
ރައީސް ޞާލިޙު ތިމަރަފުއްޓަށް ވަޑައިގަތުން
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ކޮޅުމަޑުލުގެ ބައެއް ރަށްރަށަށް ކުރައްވާ ދަތުރުފުޅުގެ ފުރަތަމަ މަންޒިލެއްގެ ގޮތުން ތިމަރަފުއްޓަށް ވަޑައިގެންފިއެވެ.
ރައީސް ތ. އަތޮޅަށް ކުރައްވާ މި ދަތުރުފުޅުގައި ތ. އަތޮޅުގެ 7 ރަށަކަށް ވަޑައިގެންނެވުމަށް ވަނީ ނިންމަވާފައެވެ. އޭގެ ތެރޭގައި ތިމަރަފުށި، ކިނބިދޫ، އޮމަދޫ، ވޭމަންޑޫ، ވަންދޫ، ކަނޑޫދޫ އަދި ގާދިއްފުށި ހިމެނެއެވެ.
ރައީސް މި ދަތުރުފުޅުގެ ތެރެއިން އަންގާރަ ދުވަހުގެރޭ ތިމަރަފުށީ ކައުންސިލާ ބައްދަލު ކުރައްވާ ގޮތަށް ވަނީ ހަމަޖެހިފައެވެ. މީގެ އިތުރުން ތިމަރަފުށީގެ ވިޔަފާރިވެރިންނާވެސް ރައީސް ބައްދަލުކުރައްވާނެއެވެ.
ރައީސް މި ރަށްރަށަށް ކުރައްވާ ޒިޔާރަތްތަކުގައި އެމަނިކުފާނު އެރަށްރަށުގެ ބައެއް ތަންތަނަށް ޒިޔާރަތްކުރައްވައި އެތަންތަނުގެ ހާލަތު ބައްލަވާލައްވައި، ބައެއް މުއައްސަސާތަކުގެ އިސްވެރިންނާއި ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިތުރުން، މަސްވެރިންނާއި، ދަނޑުވެރިންނާއި ވިޔަފާރިވެރިންނާ ބައްދަލުކުރެއްވުމަށް ހަމަޖެހިފައެވެ. މީގެ އިތުރުން ވެސް ރައީސުލްޖުމްހޫރިއްޔާގެ މި ދަތުރުފުޅުގައި އެ އަތޮޅު އޮމަދޫ ބަނދަރު ހުޅުއްވައިދެއްވައި އެރަށު ރައްޔިތުންނާ ބައްދަލުކުރެއްވުމަށް ވަނީ ހަމަޖެހިފައެވެ.
ރައީސްގެ މި ދަތުރުފުޅާ ގުޅޭގޮތުން ރާއްޖެ އެމްވީއާ ވާހަކަ ދައްކަވަމުން، ރައީސް އޮފީހުގެ ތަރުޖަމާނު މަބްރޫކް ޢަޒީޒު ވިދާޅުވީ, ލާމަރުކަޒީ ގާނޫނުގެ ދަށުން ފުރަތަމަ ފަހަރަށް ކައުންސިލަރުން އައްޔަންކޮށް އެ ގާނޫނުގެ ދަށުން ކައުންސިލްތައް ހިނގަމުން ދާއިރު, ކައުންސިލްތަކަށް ލިބިފައިވާ ބާރުގެ ދަށުން ކައުންސިލްތައް ހިނގަމުން ދިއުމަކީ ރައީސްގެ އަމާޒެއް ކަމަށާއި، މީގެ ކުރިން ވެސް ރައީސް ވަނީ ވަރޗުއަލްކޮށް ކައުންސިލްތަކާ ބައްދަލުކުރައްވާފައި ކަމަށެވެ. އަދި ރައީސްގެ މި ދަތުރުފުޅުގެ އެއް އަމާޒަކީ ކައުންސިލްތަކާ ގާތުން ބައްދަލު ކުރައްވައި މަޝްވަރާ ކުރެއްވުން ކަމަށެވެ.
މަބްރޫކް ވިދާޅުވީ ކޮވިޑް-19އާ ގުޅިގެން ރާއްޖޭގެ އެކި ހިސާބުތަކުގައި ކުރިއަށްދާ ތަރައްގީގެ މަޝްރޫއުތައް މިވީ ދޮޅު އަހަރުގެ ތެރޭގައި ރައީސް ވަޑައިގެން ބެއްލެވިފައި ނެތުމާއެކު ރައީސް ކުރައްވާ މި ދަތުރުފުޅުގެ އަނެއް އަމާޒަކީ ތަރައްގީގެ ކަންކަން ގާތުން ބެއްލެވުން ކަމަށެވެ.
ރައީސުލްޖުމްހޫރިއްޔާގެ މި ދަތުރުފުޅު ނިންމަވާލެއްވުމަށްފަހު މާލެ ވަޑައިގަތުމަށް ހަމަޖެހިފައިވަނީ އަންނަ ބުރާސްފަތި ދުވަހުގެ ރެއެވެ.
