ރެއާލުގެ އެއްބަސްވުން ކޯޓުއާ އާކޮށްފި

ރެއާލް މެޑްރިޑާއެކު ހަދާފައި އޮތް އެއްބަސްވުން ބެލްޖިއަމުގެ ގޯލްކީޕަރު ތިބައޫ ކޯޓުއާ އާކޮށްފިއެވެ.

އުމުރުން 29 އަހަރުގެ ކޯޓުއާ ރެއާލަށް ބަދަލުވީ ޗެލްސީ ދޫކޮށް 2018 ވަނަ އަހަރުގެ އޯގަސްޓް މަހުގެ ތެރޭގައި 35 މިލިޔަން ޕައުންޑަށެވެ. އެ ފަހަރު އޭނާ ވަނީ ރެއާލާއެކު ހަ އަހަރުގެ އެއްބަސްވުމެއް ހަދާފައެވެ. އެހެންކަމުން އެ އެއްބަސްވުމުގެ މުއްދަތު ހަމަވަން އޮތީ 2024 ވަނަ އަހަރުގެ ހޫނު މޫސުމުގައެވެ.

ނަމަވެސް ހޯމަ ދުވަހު ކޯޓުއާ ރެއާލުގެ އެއްބަސްވުން އާކުރިއިރު، އޭނާ ވަނީ އެ ޓީމާއެކު ފަސް އަހަރުގެ އައު އެއްބަސްވުމެއް ހަދާފައެވެ. އަދި އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ހޫނު މޫސުމުގައި ކަމަށްވެސް އެ ކުލަބުން ވަނީ ބުނެފައެވެ.

އެއްބަސްވުން އާކުރުމަށްފަހު ކޯޓުއާ ބުނީ ރެއާލަށް ކުޅުމަކީ ފަޚުރެއް ކަމަށާއި، ބޭނުމަކީ ކުރިއަށް އަޮތް ތަނުގައިވެސް ރެއާލުގެ ޖާޒީގައި މޮޅު ކުޅުމެއް ދެއްކުން ކަމަށެވެ. އަދި އައު އެއްބަސްވުމަކީ މިދިޔަ ސީޒަންތަކުގައި ދެއްކި ކުޅުމުގެ ނަތީޖާ ކަމަށާއި، އެހެންކަމުން އިތުރަށް މަސައްކަތްކޮށް، ދުނިޔޭގެ އެއްވަނަ ކުލަބާއެކު އިތުރު ކާމިޔާބީތަކެއް ހޯދަން ބޭނުންވާ ކަމަށްވެސް ވަނީ ބުނެފައެވެ.

ރެއާލުގެ އެއްބަސްވުން ކޯޓުއާ އާކުރިއިރު، މިދިޔަ ހޮނިހިރު ދުވަހު ސްޕެނިޝް ލީގުގައި ޑެޕޯޓިވޯ އަލަވޭސް އަތުން ރެއާލް މޮޅުވި މެޗަކީ ލީގުގައި ރެއާލަށް ކޯޓުއާ ކުޅެދިން 100 ވަނަ މެޗެވެ. އަދި އޭނާ ވަނީ މިހާތަނަށް ރެއާލަށް ޖުމްލަ 130 މެޗު ކުޅެދީފައެވެ. ރެއާލުގައި ކޯޓުއާ މޮޅު ކުޅުމެއް ދައްކަމުން އަންނައިރު، އޭނާ ވަނީ އެ ޓީމާއެކު ސްޕެނިޝް ލީގާއި، ސްޕެނިޝް ސުޕަ ކަޕް އަދި ފީފާ ކުލަބު ވޯލްޑް ކަޕުވެސް ކާމިޔާބުކޮށްފައެވެ.

ބެލްޖިއަމުގެ ގައުމީ ފުޓްބޯޅަ ޓީމުގެ ގޯލުވެސް ބަލަހައްޓަމުން އަންނަ ކޯޓުއާ ވަނީ މިހާތަނަށް ގައުމީ ޓީމުގެ ޖާޒީގައި 89 މެޗު ކުޅެފައެވެ. އަދި 2018 ވަނަ އަހަރު ރަޝިއާގައި ބޭއްވި ފީފާ ވޯލްޑް ކަޕުގެ ތިންވަނަ ބެލްޖިއަމުން ހޯދިއިރު، ކޯޓުއާ ވަނީ އެ މުބާރާތުގެ އެންމެ މޮޅު ގޯލްކީޕަރުގެ މަގާމު ހޯދާފައެވެ.