ކުޑަކުދިން ކުށުގެ ވެއްޓަށް ހުށަހެޅިފައިވާ މިންވަރު ދެނެގަތުމާގުޅޭ ތަމްރީންދިނުމަށް ޚާއްޞަ ޕްރޮގްރާމެއް ފަށައިފި
ކުޑަކުދިންގެ އަދުލުގެ ޤާނޫނު ރައީސުލްޖުމްހޫރިއްޔާ ތަސްދީޤުކުރެއްވީ 2019 ވަނަ އަހަރުގެ ނޮވެމްބަރު މަހުގެ 20 ވަނަ ދުވަހު
މި ތަމްރީން ޕްރޮގްރާމް ހިންގަނީ ޔޫއެންއޯޑީސީއާ އާއި ޑިޕާރޓްމަންޓް އޮފް ޖުވެނައިލް ޖަސްޓިސް ގުޅިގެން
ކުޑަކުދިން ކުށުގެ ވެއްޓަށް ހުށަހެޅިފައިވާ މިންވަރު ދެނެގަތުމަށް ހަދާ "ރިސްކް އެސެސްމަންޓް" އާގުޅޭ ގޮތުން ކޭސް ވޯކަރުންނަށް އިތުރު ތަމްރީނު ދިނުމަށް ޚާއްޞަ ޕްރޮގްރާމެއް ފަށައިފިއެވެ.
ޔޫއެންއޯޑީސީއާ ގުޅިގެން ޑިޕާރޓްމަންޓް އޮފް ޖުވެނައިލް ޖަސްޓިސްއިން ފެށި މިތަމްރީން ޕްރޮގްރާމް ފައްޓަވައިދެއްވީ މިނިސްޓަރ އޮފް ސްޓޭޓް ފޮރ ހޯމް އެފެއާޒް އަލީ ނަޛީރެވެ. މިއީ ކުޑަކުދިންގެ އަދުލުގެ ޤާނޫނަށް އަމަލުކުރަން ފެށުމާއެކު, ޑިޕާރޓްމަންޓް އޮފް ޖުވެނައިލް ޖަސްޓިސްގެ މަސައްކަތްތައް ހަރުދަނާކުރުމަށް ކުރަމުން ގެންދާ މަސައްކަތްތަކުގެ ދަށުން ޔޫއެންއޯޑީސީއާ ގުޅިގެން އެޑިޕާރޓްމަންޓްގެ ޓެކްނިކަލް މުވައްޒަފުން ތަމްރީނުކުރުމަށް ކުރިއަށްގެންދާ ތަމްރީން ޕްރޮގްރާމެކެވެ. މިތަމްރީން ޕްރޮގްރާމްގައި ކިޔަވައިދެއްވަނީ ޔޫއެންއޯޑީސީގެ ތަޖުރިބާކާރު ބޭފުޅުންނެވެ. ރިކްސް އެސެސްމަންޓަކީ ކުށުގެ ވެއްޓަށް ހުށަހެޅިފައިވާ ނުވަތަ ހުށަހެޅުމުގެ ފުރުޞަތު އޮތްކަން ފާހަގަކުރެވިގެން ޑިޕާރޓްމަންޓް އޮފް ޖުވެނައިލް ޖަސްޓިސްއަށް މައްސަލަ ހުށަހެޅުމުން ކުއްޖާގެ ހާލަތު ދެނެގަތުމަށް ހަދާ އެސެސްމަންޓެކެވެ.
ދެ ދުވަހުގެ މުއްދަތަށް ކުރިއަށްގެންދާ މިތަމްރީނު ޕްރޮގްރާމްގެ ބޭނުމަކީ ކުދިންގެ ރައްކާތެރިކަމާއި, މަސްލަހަތަށް އިސްކަންދީގެން އެސެސްމަންޓް ފުރިހަމަކޮށް ކުދިންނަށް އެހީތެރިކަން ފޯރުކޮށްދިނުމުގެ ހުނަރުތައް އިތުރަށް ތަރައްޤީކުރުމެވެ. މިތަމްރީނު ޕްރޮގްރާމްގެ ސަބަބުން ޑިޕާރޓްމަންޓް އޮފް ޖުވެނައިލް ޖަސްޓިސްގެ ކޭސް ވޯކާރސްގެ ޤާބިލްކަން އިތުރުކުރުމަށް އެހީތެރިވެދޭނެއެވެ.
ކުޑަކުދިންގެ އަދުލުގެ ޤާނޫނު ރައީސުލްޖުމްހޫރިއްޔާ ތަސްދީޤުކުރެއްވީ 2019 ވަނަ އަހަރުގެ ނޮވެމްބަރު މަހުގެ 20 ވަނަ ދުވަހުއެވެ.
