ދިރިއުޅުމަށް ފައްކާވެފައިވާ ދަރިވަރުން ބިނާކުރުމަށް ޓީޗަރުންގެ ދައުރު ބޮޑު: ނައިބު ރައީސް

ސްކޫލް ނިމޭއިރު ދިރިއުޅުމަށް ތައްޔާރުވެ މުޖުތަމައަށް ފައްކާވެފައިވާ ދަރިވަރުން އުފެއްދުމުގައި މުދައްރިސުންގެ ދައުރު މުހިންމުކަމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވިދާޅުވެއްޖެއެވެ.

ނައިބު ރައީސް މިފަދައިން ވިދާޅުވީ ވިލިމާލޭގެ އެކި މުއައްސަސާތަކަށް ޒިޔާރަތްކުރެއްވުމުގެ ތެރެއިން، މުޙްޔިއްދީން ސްކޫލާއި، އެ ސްކޫލްގެ ޕްރީސްކޫލް ކެމްޕަހަށް ކުރެއްވި ޒިޔާރަތަށްފަހު ދެއްކެވި ވާހަކަފުޅުގައެވެ. ނައިބު ރައީސް ވަނީ ގައުމަށް ފައިދާހުރި، މަސައްކަތްތެރި، ސްކޫލް ނިމޭއިރު ދިރިއުޅުމަށް ތައްޔާރުވެ މުޖުތަމައަށް ފައްކާވެފައިވާ ދަރިވަރުން އުފެއްދުމުގައި މުދައްރިސުންގެ ދައުރު ފާހަގަކުރައްވާފައެވެ.

ތައުލީމީ ދާއިރާގެ މީހުންގެ މުސާރައާއި އިނާޔަތްތަކަށް ހެޔޮ ބަދަލުތަކެއް ގެނައުމަށް ރައީސުލްޖުމްހޫރިއްޔާ ވެވަޑައިގެންފައިވާ ވައުދުފުޅުގެ މައްޗަށްވެސް އެމަނިކުފާނު އަލިއަޅުވައިލެއްވިއެވެ. މީގެ އިތުރުން، ޓެލެކިލާހާއި، އިންކްލޫސިވް އެޑިއުކޭޝަނާއި ސެން ދަރިވަރުން، އަދި ތައުލީމީ ދާއިރާއަށް ހެޔޮބަދަލުތައް ގެނައުމަށް ސަރުކާރުން ކުރާ އެކި މަސައްކަތްތަކާއި ގުޅޭގޮތުން މަޝްވަރާކުރެއްވިއެވެ.

މި ބައްދަލުކުރެއްވުމުގައި ސްކޫލުގެ އިސްވެރިން ވަނީ, ހިންގުމަށް ކުރިމަތިވެފައިވާ ދަތިތަކާއި ކުރިއަށް ރާވައި ކުރަމުންގެންދާ މަސައްކަތްތަކުގެ މައުލޫމާތު އެމަނިކުފާނާ ހިއްސާކުރައްވާފައެވެ. އަދި، ދިމާވާ ދަތިތައްވެސް ހިއްސާކުރައްވާފައިވާއިރު، ނައިބު ރައީސް ވަނީ މި ބައްދަލުވުމުގައި ފާހަގަކުރެއްވި ކަންކަން ހައްލުކުރުމުގައި ސަރުކާރުގެ ކަމާބެހޭ ފަރާތްތަކާއެކު މަޝްވަރާކޮށްގެން މަސައްކަތް ކޮށްދެއްވާނެކަމަށް ވިދާޅުވެފައެވެ.

މީގެ އިތުރުން ވިލިމާލެ ހޮސްޕިޓަލަށް ވެސް ޒިޔާރަތްކުރައްވާފައިވާއިރު، މި ޒިޔާރަތުގައި އެ ހޮސްޕިޓަލުގެ އިސްވެރިންވަނީ ހޮސްޕިޓަލުގައި ދިމާވާ ދަތިތައް އެމަނިކުފާނާ ހިއްސާކުރައްވާފައެވެ. ޚާއްސަގޮތެއްގައި، ވިލިމާލެ ހޮސްޕިޓަލުގައި ޖާގައިގެ ދަތިކަންވަނީ ފާހަގަކުރައްވާފައެވެ. ހޮސްޕިޓަލަށް ކުރެއްވި ޒިޔާރަތް ނިންމަވާލެއްވުމަށް ފަހު ނައިބު ރައީސްވަނީ ވިލިމާލެ ފެރީ ޓަރމިނަލްއަށް ވަޑައިގެން، ފެރީއަކަށް އަރާވަޑައިގެން، ޓަރމިނަލްގައި މަސައްކަތް ކުރިއަށްދާގޮތް ބައްލަވައި, އެތަނުގައި މަސައްކަތްކުރާ ބޭފުޅުންނާއި ކުރުކޮށް ވާހަކަފުޅުދައްކަވާލައްވައިފައެވެ.

މިދަތުރުފުޅުގައި، ރައީސުލްޖުމްހޫރިއްޔާގެ ނައިބުގެ އަރިހުގައި މިނިސްޓަރ އޮފް އެޑިއުކޭޝަން ޑރ. ޢާއިޝަތު ޢަލީއާއި، ސްޕެޝަލް އެޑްވައިޒަރ އޮން ސޯޝަލް ޕޮލިސީ ޑރ. މުޞްޠަފާ ލުޠުފީއާއި، މިނިސްޓަރ އެޓް ދަ ޕްރެޒިޑެންޓްސް އޮފީސް، އަޙުމަދު ސަމީރާއި, އެމްޓީސީސީގެ ސީއީއޯ އާދަމް ޢާޒިމް އަދި އެޑިއުކޭޝަން މިނިސްޓްރީގެ އިސްވެރިން ބައިވެރިވެވަޑައިގަތެވެ.