މި އަަހަރުގެ ހަޔާ ސެކަންޑަރީ ސްކޫލު ސެޓްފިކެޓް (އެޗްއެސްސީ) ދިވެހި ޕޭޕަރުގައި ހިމަނާފައި އޮތް ކިޔުމުގެ ދޭހައިގައި ބޭއަދަބީ ބަސްތަކެއް ހިމަނާފައިވާ ކަމަށް ބުނެ ދަރިވަރުންނާއި ބެލެނިވެރިން ކަންބޮޑުވުން ފާޅުކުރަން ފަށައިފި އެވެ.

ސޯޝަލް މީޑިއާގައި އާދިއްތަ ދުވަހުން ފެށިގެން ބައެއް ދަރިވަރުންނާއި، ބެލެނިވެރިން އަންނަނީ ދިވެހި ޕޭޕަރުގައި ހިމަނާފައި އޮތް ދޭހައާއި މަޒުމޫނު ލިޔުމަށް ދިން މައުޟޫއާ ގުޅިގެން ކަންބޮޑުވުންތައް ހިއްސާކުރަމުންނެވެ.

އެ ގޮތުން، އެއް ކަމަކަށް ދަރިވަރުން ފާހަގަކުރަނީ، ޕޭޕަރުގައި ހިމަނާފައި އޮތް ދޭހައަކީ، ސަރުކާރު ސްކޫލެއްކަމަށްވާ ސީއެޗްއެސްއީގެ ހުޅުމާލޭ ސްކޫލުގެ ދަރިވަރުންނަށް މީގެ ކުރިން ދީފައިވާ, އަދި ދިވެހި ކޭމްޕުގައި މަޝްވަރާ ވެސް ކޮށްފައިވާ ދޭހައަކަށް ވުމެވެ.

އަނެއް ކަމަކަށް ފާހަގަ ކުރާ ކަންބޮޑުވުމަކީ މި ޓެސްޓް ޕޭޕަރުގައި މަޒުމޫނު ލިޔުމަށް ދީފައިވާ މައުޟޫ ވެސް އެ ސީއެޗްއެސްސީގެ ދަރިވަރުން ކުރިން ހަދާފައިވާ މައުޟޫއަކަށް ވުމެވެ. މީގެ އިތުރުން ވެސް އެ ޕޭޕަރުގައި ބޭއަދަބީ ބަސްތަކެއް ހިމަނާފައިވާ ކަމަށް ބުނެ ވެސް ކަންބޮޑުވުން ފާޅުކޮށްފައި ވެއެވެ.

ހުޅުމާލެ ސީއެޗްއެސްސީ ކުދިން ފަރިތަކޮށްފައިވާ ލިޔުމެއް ދޭހައަކަށް އައުމާއި މަޒުމޫންގެ މައުޟޫއާ ވެސް ދިމާވުމާ ގުޅިފައިވާ އެންމެ ބޮޑު ކަންބޮޑުވުމަކީ އެޗްއެސްސީ ޕޭޕަރު ހެދީވެސް ހުޅުމާލެ ސީއެޗްއެސްސީގެ ޓީޗަރެއް ކަމަށް ވުން ކަމަށް ކަންބޮޑުވުން ފާޅު ކުރާ މީހުން ބުނެއެވެ. އެހެންކަމުން އެއީ ވަކި ސްކޫލެއްގެ ކުދިންތަކަކަށް ފައިދާ ވާގޮތަށް ކޮށްފައިވާ ކަމެއް ކަމަށް ތުހުމަތު ދަނީ ކުރަމުންނެވެ.

ނަމަވެސް މި މައްސަލައާ ގުޅިގެން އެޑިއުކޭޝަން މިނިސްޓަރ އިސްމާއީލް ޝަފީއު ރާއްޖެ އެމްވީއަށް ވިދާޅުވީ އިމްތިހާނުގެ ސައްހަކަން ގެއްލޭ އެއްވެސް ކަމެއް ނެތް ކަމަށާއި، މިނިސްޓްރީގެ އެއްވެސް ކަންބޮޑުވުމެއް މިކަމުގައި ނެތް ކަމަށެވެ.

މިނިސްޓަރ ޝަފީއު ވިދާޅުވީ ސޯޝަލް މީޑިއާގައި ބައެއް ބޭފުޅުން މިކަމުގެ ހަގީގަތް އޮޅޭގޮތަށް ވާހަތައް ފަތުރަމުން ގެންދާ ކަމަށާއި އެއީ ކިޔަވާ ދަރިވަރުންނަށް ވެސް އެކަމުގެ ނޭދެވޭ އަސަރު ކުރާނޭ ކަމެއް ކަމަށެވެ.

މިނިސްޓަރ ޝަފީއު ވިދާޅުވީ މި އަހަރުގެ އެޗްއެސްސީ ދިވެހި ޕޭޕަރުގައި ހިމަނާފައި އޮތް ކިޔުމުގެ ދޭހައަކާ ގުޅިގެން ބެލެނިވެރިންނާއި ދަރިވަރުންގެ އެތައް ކަންބޮޑުވުމެއް އޮތް ނަމަވެސް، އެ ޕޭޕަރުގައި އެއްވެސް މައްސަލައެއް ނެތްކަމަށެވެ.

އަދި ގްރޭޑު 11 ގެ އެޗްއެސްސީ އިމްތިހާނުގެ ދިވެހި ޕޭޕަރު ކޮމްޕްރޮމައިޒް ނުވާ ކަމަށާއި ދޭހަ އެއްގޮތްވީ އިއްތިފާގަކުން ކަމަށް ވެސް މިނިސްޓަރ ޝަފީއު ވަނީ ވިދާޅުވެފަ އެވެ.

މިނިސްޓަރ ޝަފީއު މިފަދައިން ވިދާޅުވި ނަމަވެސް ޕޭޕަރާއި ގުޅިގެން ދަރިވަރުން ސޯޝަލް މީޑިއާގައި ކަންބޮޑުވުން ފާޅު ކުރަމުން ބުނެފައިވަނީ, މިއީ އެހެން ސްކޫލުތަކުގެ ކުދިންނަށް ލިބުނު ވަރަށް ބޮޑު ބޭއިންސާފެއް ކަމަށާއި، ހުޅުމާލެ ސީއެޗްއެސްއީގެ ދަރިވަރުންނަށް ލިބުނު ނުޙައްގު ފައިދާއެއް ކަމަށެވެ. އަދި މީގެ ސަބަބުން ދަރިވަރުންގެ މެދުގައި އޮންނަން ޖެހޭ ހަމަހަމަކަން ގެއްލިފައިވާކަމަށް ވެސް ވަނީ ބުނެފައެވެ.

މީގެ އިތުރުން ރާއްޖެ އެމްވީއާއި ވާހަކަދެއްކި ބެލެނިވެރިޔަކު ބުނީ ސީއެޗްއެސްއީގެ ދަރިވަރުން ލައްވައި، މާ ކުރިން އެ ދޭހަ ހަދުވައިފައި އޮތުމަކީ ވަރަށް ދަށު ދަރަޖައިގެ ކަމެއް ކަމަށާއި، އެ ކަން ބަލައިނުގަނެވޭ ކަމަށެވެ.

އެޗްއެސްސީ ޕޭޕަރުގެ ބައެއް ބައިތައް އިމްތިހާނުގެ ކުރިން ދަރިވަރުންނަށް ޕްރެކްޓިސްކުރަން ދިން ކަމަށް ބުނާ ވާހަކަތައް ސޯޝަލް މީޑިއާގައި ދައުރުވަމުންދާއިރު، މިކަމަށް ވަރަށް ގިނަ ބައެއްގެ ފާޑުކިޔުން ދަނީ އަމާޒުވަމުންނެވެ.