ވިއެޓްނާމް ސަރުކާރުން ދިވެހިރާއްޖެއަށް ކަނޑައެޅުއްވި އައު ސަފީރު ހޯ ތީ ތަން ތުރުޚް، އެކަމަނާގެ ސަފީރުކަމުގެ ފަތްކޮޅު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް އަރުއްވައިފިއެވެ.
އާދިއްތަ ދުވަހުގެ މެންދުރުކުރީގައި ރައީސުލްޖުމްހޫރިއްޔާގެ އޮފީހުގައި ބޭއްވެވި މި ރަސްމިއްޔާތުގައި، ފަތްކޮޅު އެރުއްވުމަށްފަހު، ވިއެޓްނާމްގެ އައު ސަފީރާ ރައީސުލްޖުމްހޫރިއްޔާ ބައްދަލުކުރައްވައި، އެކަމަނާ ސަފީރުކަމާ ހަވާލުވެވަޑައިގަތުމާ ގުޅިގެން މަރުޙަބާ ވިދާޅުވިއެވެ. އަދި، އެމަނިކުފާނު ވަނީ ދެޤައުމުގެ ގުޅުމަށް މިއަހަރު 46 އަހަރު ފުރޭއިރު ދެޤައުމުގެ ގުޅުން އިތުރަށް ވަރުގަދަވާ ފަދަ އެދެވޭ ކަންތައްތަކެއް ކޮށްފައިވާކަން ފާހަގަކުރައްވާފައެވެ. މިގޮތުން ރައީސުލްޖުމްހޫރިއްޔާ ވަނީ ކުރިއަށް އޮތް ދުވަސްތަކުގައި ދެޤައުމުގެ މަތީ ފަންތީގެ ވާހަކަތަކާއި، ޒިޔާރަތްކުރުންތައް މެދުވެރިކޮށް ދެޤައުމުގެ ދޭތެރޭގައި ގުޅުން ބަދަހިކުރެވޭނެ ދާއިރާތައް ދެނެގަތުމާގުޅޭ ގޮތުން ވާހަކަފުޅުދައްކަވާފައެވެ.
ރައީސުލްޖުމްހޫރިއްޔާ އިތުރަށް ދެއްކެވި ވާހަކަފުޅުގައި ރާއްޖޭގައި ކޮވިޑް-19 ކޮންޓްރޯލްކުރުމަށް ވިއެޓްނާމް ސަރުކާރުން ވެދެއްވި އެހީތެރިކަމަށްޓަކައި ޝުކުރުއަދާކުރެއްވިއެވެ. އަދި، ދެޤައުމުގެ ދެމެދުގައި ވިޔަފާރީގެ ދާއިރާއިން އިތުރަށް ގުޅުން ބަދަހިކުރުމަށް ބޭނުންފުޅުވާކަމުގައި ރައީސުލްޖުމްހޫރިއްޔާ ވިދާޅުވިއެވެ. މީގެ އިތުރުން ވެސް އެމަނިކުފާނު ވަނީ ވިއެޓްނާމް ސަފީރުގެ އަރިހުން ރާއްޖެއަށް އާސިއާންގެ އޮބްޒަރވަރ ސްޓޭޓަސް ހޯދުމަށް އެހީތެރިކަން ފޯރުކޮށްދެއްވުމަށް އެދިވަޑައިގެންފައެވެ.
ވިއެޓްނާމް ސަފީރުގެ ވާހަކަފުޅުގައި، ވިއެޓްނާމުން ރާއްޖޭގެ އެކުވެރިއެއްގެ ރޯލު އަބަދުވެސް އަދާކުރާނެކަމަށާއި، ރާއްޖެއަށް ބޭނުންވާ އެހީތެރިކަމާއި އެއްބާރުލުން އަބަދުވެސް އެޤައުމުގެ ފަރާތުން ދޭނެކަމަށް ވިދާޅުވިއެވެ. ރައީސުލްޖުމްހޫރިއްޔާ ވަނީ ބައިނަލްއަޤްވާމީ ދުނިޔޭގެ ގިނަ ކަންކަމުގައި ރާއްޖެއާއި ވިއެޓްނާމްގެ ވިސްނުން އެއްގޮތްކަން ފާހަގަކުރައްވާފައެވެ.
މީގެ އިތުރުން ވެސް ދެބޭފުޅުން ވަނީ މޫސުމަށް އަންނަ ބަދަލުތަކާއި، ދެމެހެއްޓެނިވި ތަރައްޤީ ހިމެނޭހެން އ.ދ. އާ ގުޅޭ ކަންކަމުގައި އެކުގައި މަސްކަތްކުރުމުގެ ޝައުގުވެރިކަން ފާޅުކުރައްވާފައެވެ.
