ކިއުބާގެ އައު ސަފީރު މަގާމުގެ ފަތްކޮޅު ރައީސްއަށް އަރުވައިފި
ކިއުބާއިން ރާއްޖެއަށް ކަނޑައަޅުއްވާފައިވާ އައު ސަފީރަކީ މަރްސެލޯ ގޮންޒާލޭސް ގަރީދޯ
ކިއުބާގެ އައު ސަފީރު މަގާމުގެ ފަތްކޮޅު ރައީސަށް އެރުވުން
ކިއުބާ ސަރުކާރުން ދިވެހިރާއްޖެއަށް ކަނޑައެޅުއްވި އައު ސަފީރު އަންދްރޭސް މަރްސެލޯ ގޮންޒާލޭސް ގަރީދޯ، އެމަނިކުފާނުގެ ސަފީރުކަމުގެ ފަތްކޮޅު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް އަރުވައިފިއެވެ.
އާދިއްތަ ދުވަހުގެ މެންދުރު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ރަސްމިއްޔާތުގައި ރައީސުލްޖުމްހޫރިއްޔާ ވަނީ, އެމަނިކުފާނު ސަފީރުކަމާ ހަވާލުވެވަޑައިގަތުމާ ގުޅިގެން މަރުޙަބާ ވިދާޅުވެފައެވެ. އަދި އެމަނިކުފާނު ވަނީ ޚާއްސަކޮށް ސިއްހީ ދާއިރާއިންނާއި ތަޢުލީމީ ދާއިރާއިން ކިއުބާ ސަރުކާރުން ރާއްޖެއަށް ފޯރުކޮށްދެމުންދާ އެހީތެރިކަން ފާހަގަކުރައްވައި އެކަމަށްޓަކައި ޝުކުރުއަދާކުރައްވާފައެވެ. މިގޮތުން ކިއުބާއިން ދަނީ ރާއްޖޭގެ ކުދިންނަށް ލެޓިން އެމެރިކަން ސްކޫލް އޮފް މެޑިސިންއިން ސްކޮލަރޝިޕްގެ ފުރުސަތުތައް ފަހިކޮށްދެއްވަމުންކަމަށާއި، ކިއުބާގެ ޑޮކްޓަރުންގެ ޚިދުމަތްތައްވެސް މީގެ ކުރިން ލިބިފައިވާކަން އެމަނިކުފާނު ފާހަގަކުރެއްވިއެެވެ. އަދި ދެބޭފުޅުން ވަނީ ރާއްޖޭގެ ދަރިވަރުންނަށް ކިއުބާގައި ތައުލީމީ އިތުރު ފުރުސަތުތައް ފަހިކުރެވޭނެ ގޮތްތަކާ ބެހޭގޮތުން މަޝްވަރާކުރައްވާފައެވެ.
ރައީސުލްޖުމްހޫރިއްޔާ ވަނީ އ.ދ. ގެ އާންމު މަޖިލީހުގެ 76 ވަނަ ދައުރުގެ ރައީސްކަން ރާއްޖެއަށް ކަށަވަރުކުރުމަށް ކިއުބާ އިން ދެއްވި އެއްބާރުލެއްވުމަށްޓަކައި ކިއުބާ ސަރުކާރަށް ޝުކުުރުއަދާކުރައްވާފައެވެ.
ކިއުބާގެ އާ ސަފީރުގެ ވާހަކަފުޅުގައި، ކިއުބާއަކީ ރާއްޖޭގެ އެކުވެރިއެއްކަމަށާއި، އަބަދުވެސް ރާއްޖެއާއެކު ގުޅުން ބަދަހިކުރުމަށް މަސައްކަތްކުރާނެކަމުގައި ވިދާޅުވިއެވެ. މިގޮތުން ސަފީރު ވަނީ ކިއުބާގެ ޕާލިމަންޓާއި ރާއްޖޭގެ ޕާލިމަންޓުން ގުޅިގެން މަސައްކަތްކުރުމަށް ޝައުގުވެރިވާކަން ހާމަކުރައްވާފައެވެ.
މީގެ އިތުރުން ވެސް ދެބޭފުޅުން ވަނީ ދެގައުމުގެ ވެސް ކޮވިޑް-19ގެ އެންމެ ފަހުގެ ހާލަތާއި، މި ބަލިމަޑުކަމުން އަރައިގަތުމަށް ކުރަމުންދާ މަސައްކަތާއިބެހޭގޮތުން މަޝްވަރާކުރައްވާފައެވެ. މި ބައްދަލުކުރެއްވުން ނިންމަވާލައްވަމުން ދެބޭފުޅުން ވަނީ ކުރިއަށް އޮތް ދުވަސްތަކުގައި ދެގައުމުން އިސްކަންދޭ ދާއިރާތަކުން ދެގައުމުގެ ގުޅުން އިތުރަށް ބަދަހިވާނެކަމަށް އުންމީދުކުރައްވާކަމުގައި ވިދާޅުވެފައެވެ.
