މާލެ ސިޓީ ކައުންސިލްގެ ނުރުހުން އެޗްޑީސީއަށް
އެއީ ލާމަރުކަޒީ ގާނޫނަށް ގޮންޖެހުމަށްފަހު ބޭއްވި ބައްދަލުވުމެއް
މާލެ ސިޓީގެ މޭޔަރު ޑރ މުޙައްމަދު މުޢިއްޒު
ހުޅުމާލޭގެ ބީޗް ސަރަހައްދު ތަރައްގީ ކުރުމަށް ރައްޔިތުންގެ ޚިޔާލު ހޯދުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ބޭއްވި ބައްދަލުވުމަކީ ލާމަރުކަޒީ ގާނޫނުގެ ރޫހާ ޚިލާފަށް ބޭއްވި ބައްދަލުވުމެއް ކަމަށް މާލެ ސިޓީ ކައުންސިލުން ބުނެފިއެވެ.
ބުރާސްފަތި ދުވަހު މާލެ ސިޓީ ކައުންސިލުން ނެރުނު ނޫސްބަޔާނުގައި ބުނެފައިވަނީ ހުޅުމާލޭގެ ބީޗް ސަރަހައްދު ތަރައްގީ ކުރުމާބެހޭ ގޮތުން ހުޅުމާލޭގެ ރައްޔިތުންގެ ޚިޔާލު ހޯދުމަށް އެޗްޑީސީގެ ފަރާތުން 11 އޮގަސްޓް 2021 ވަނަ ދުވަހުގެ ރޭ ކުލަބު ހައުސް މެދުވެރިކޮށް ބޭއްވި ބައްދަލު ވުމަކީ އެކޯޕަރޭޝަނަށް ލިބިގެން ނުވާބާރެއް ބޭނުންކޮށް، ލާމަރުކަޒީ ގާނޫނުގެ ރޫހާ ޚިލާފަށް، ލާމަރުކަޒީ ގާނޫނަށް ގޮންޖެހުމަށްފަހު ބޭއްވި ބައްދަލުވުމެއް ކަމަށެވެ.
އެ ބައްދަލުވުން މާލޭ ސިޓީ ކައުންސިލުން ހަރުކަށި އިބާރާތުން ކުށްވެރިކޮށް ބުނެފައިވަނީ މާލޭ ސިޓީގެ ތަރައްގީއަށް ގެންނަންޖެހޭ ބަދަލުތަކާއި މާލޭއަށް ގެންނަން ފެންނަ ޕްލޭންތަކާ ބެހޭގޮތުން މާލޭ ސިޓީގެ ރައްޔިތުންނާއި ބައްދަލުކޮށް ޚިޔާލު ހޯދުމަކީ، (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު)ގެ 110 ވަނަ މާއްދާ އިން މާލޭ ސިޓީ ކައުންސިލަށް މަތިކޮށްފައިވާ ގާނޫނީ ވާޖިބަކަށް ވާއިރު ހުޅުމާލޭގެ ބިޗް ސަރަހައްދު ޕްލޭން ކުރުމާ ބެހޭގޮތުން އެޗްޑީސީގެ ފަރާތުން 11 އޮގަސްޓް 2021 ވަނަ ދުވަހުގެ ރޭ މާލޭ ސިޓީ ކައުންސިލާއި އެއްވެސް މަޝްވަރާ ކުރުމެއް ނެތި ކުލަބު ހައުސް މެދުވެރިކޮށް ހުޅުމާލޭގެ ރައްޔިތުންގެ ޚިޔާލު ހޯދުމަށް ބޭއްވި ބައްދަލުވުމަކީ ކައުންސިލުން ބަލައިގަންނާނެ ބައްދަލުވުމެއް ނޫން ކަމަށެވެ.
ކައުންސިލުން ބުނީ އެފަދަ ބައްދަލުވުންތައް އެއްވެސް ހައިސިއްޔަތެއް ނެތް ފަރާތަކުން ބާއްވާކަމީ ކަންބޮޑުވާ ކަމެއް ކަމަށެވެ. މާލޭ ސިޓީގެ ތަރައްގީގެ ޕްލޭން ތައްޔާރުކުރުމާ ބެހޭގޮތުން މިހާރު ވެސް ކައުންސިލްގެ ފަރާތުން މާލޭ ސިޓީގައި ހިމެނޭ ހުރިހާ އަވަށެއްގައި ދިރިއުޅޭ ރައްޔިތުންގެ ޚިޔާލު ހޯދުމުގެ ބައްދަލުވުންތައް ކުރިއަށްދާ ކަމަށް ކައުންސިލްގެ ބަޔާނުގައި ބުނެފައިވެއެވެ.
އެގޮތުން ހުޅުމާލޭގެ ރައްޔިތުންނާއި ބައްދަލުކުރުން ވެސް ތާވަލު ކުރެވިފައިވާ ދަނޑިވަޅެއްގައި މިފަދަ ބައްދަލުވުމެއް ބޭއްވުމުގެ ސަބަބުން ރައްޔިތުންގެ މެދުގައި ނުތަނަވަސްކަމެއް އުފެދިފައިވާތީ، މިފަދަ ބައްދަލުވުންތައް ނުބޭއްވުމަށް ކައުންސިލުން ވަނީ ގޮވާލާފައެވެ.
