އައްޑޫގެ ބައެއް މުއައްސަސާތަކުގެ އިސްވެރިންނާ ޖެންޑަރ މިނިސްޓަރު ބައްދަލުކުރައްވައިފި
ނާޒުކު ހާލަތްތައް ތަހައްމަލު ކުރަމުންދާ ފަރާތްތަކަށް އިޖުތިމާއީ ރައްކާތެރިކަން ކަށަވަރުކޮށްދިނުމަށް ކުރާ މަސައްކަތްތައް އިތުރަށް ހަރުދަނާ ކުރުމާބެހޭ ގޮތުން ވެސް މަޝްވަރާ ކުރެއްވި
ފުލުހުންނާއެކު ޖެންޑަރ މިނިސްޓަރު ބޭއްވެވި ބައްދަލުކުރެއްވުމުގެ ތެރެއިން
އައްޑޫގެ ބައެއް މުއައްސަސާތަކުގެ އިސްވެރިންނާ، މިނިސްޓަރ އޮފް ޖެންޑަރ, ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދު ދީދީ ބައްދަލުކުރައްވައިފިއެވެ.
ޖެންޑަރ މިނިސްޓްރީން ބުނީ މިނިސްޓަރު، އައްޑޫ އިކްއިޓޯރިއަލް ހޮސްޕިޓަލާއި އައްޑުއަތޮޅުގައި ހުންނަ ހިއުމަން ރައިޓްސް ކޮމިޝަންގެ އޮފީހަށް ޒިޔާރަތް ކުރައްވައި، އެތަންތަނުގެ އިސްފަރާތްތަކާއެކު މަޝްވަރާކުރައްވާފައިވާ ކަމަށެވެ. އެގޮތުން މި ބައްދަލުވުންތަކުގައި މަޝްވަރާ ކުރެއްވީ، ނާޒުކު ހާލަތްތައް ތަހައްމަލު ކުރަމުންދާ ފަރާތްތަކަށް އިޖުތިމާއީ ރައްކާތެރިކަން ކަށަވަރުކޮށް ދިނުމަށް ސަރުކާރާ ގުޅިގެން ކުރާ މަސައްކަތްތައް އިތުރަށް ހަރުދަނާކުރުމާ ބެހޭގޮތުން ކަމަށް ވެސް ވަނީ ބުނެފައެވެ. އަދި ހައިރިސްކް ކޭސްތަކާ ގުޅޭ ގޮތުން ކުރާ މަސައްކަތުގައި ކަންކުރާ އުސޫލުތައް މުޠާލިއާ ކުރުމާ ބެހޭގޮތުން ވެސް، މިނިސްޓަރު އެފަރާތްތަކާ މަޝްވަރާކުރެއްވިއެވެ.
މީގެ އިތުރުން ސައުތު ޕޮލިސް ޑިވިޜަން ކޮމާންޑަރާއި އައްޑޫސިޓީ ޕޮލިސް ސްޓޭޝަންތަކުގެ އިންޗާޖުންނާ ވެސް މިނިސްޓަރު ބައްދަލުކުރެއްވިއެވެ. އައްޑޫސިޓީއަށް މިނިސްޓަރު ކުރެއްވި ޒިޔާރަތުގެ ތެރެއިން ބުރާސްފަތި ދުވަހު ހިތަދޫ ޕޮލިސް ސްޓޭޝަނުގައި ކުރިއަށް ގެންދިޔަ ބައްދަލުވުމުގައި، ގާނޫނާ ހިލާފުވާ ކުޑަކުދިންނާއި އަނިޔާލިބޭ ކުޑަކުދިންގެ މައްސަލަތައް ތަހުގީގުކުރުމުގައި ދިމާވާ މައްސަލަތައް އޮޅުންފިލުއްވައި އެކަންކަން ހައްލުކުރުމަށް ކުރެވެންހުރި ކަންކަމާ ގުޅޭގޮތުން ފުލުހުންނާ މަޝްވަރާކުރެއްވިއެވެ.
އަދި ޖެންޑަރ މިނިސްޓްރީއާއި ފުލުހުން ގުޅިގެން ހާއްސަ މަސައްކަތްތަކެއް ކުރާނެ ދާއިރާތަކެއް ކަނޑައަޅުއްވާފައިވެއެވެ. އެގޮތުން، ކުށުގެ ވެށީގައި އުޅޭ ކުދިންނާއި އަނިޔާލިބޭ ކުދިން ދެނެގަނެ، އެކުދިންގެ ސަލާމަތާއި ރައްކާތެރިކަމަށް ހާއްސަ މަސައްކަތްތަކެއް ކުރުމަށް މަޝްވަރާކުރެއްވިއެވެ. ކުޑަކުދިން ކުށުގެ ވެށިން ދުރުހެލިކުރުވައި އަނބުރާ މުޖުތަމަޢަށް ގެނައުމަށް މަސައްކަތް ކުރުމުގެ އިތުރުން ފުލުހުންނާއި ފެމިލީ އެންޑް ޗިލްޑްރެން ސަރވިސް ސެންޓަރ ހިމެނޭގޮތަށް އާއިލާތަކާއި ކުޑަކުދިންނަށް ހާއްސަކޮށްގެން ހޭލުންތެރިކުރުވުމަށް މަސައްކަތް ކުރުމަށް ވެސް މަޝްވަރާކުރެއްވިއެވެ.
އެ ބައްދަލުވުމުގައި، ސައުތު ސެންޓްރަލް ޕޮލިސް ޑިވިޜަން ކޮމާންޑަރ ސްޕްރިންޓެންޑެންޓް އޮފް ޕޮލިސް އަހުމަދު އާޠިފްއާއި އައްޑޫސިޓީ ޕޮލިސް ސްޓޭޝަންތަކުގެ އިންޗާޖުންގެ އިތުުރުން ޖެންޑަރ މިނިސްޓްރީގެ ބައެއް ބޭފުޅުން ވެސް ބައިވެރިވެޑައިގެންނެވިއެވެ.
