މާލީ ހާލަތު ރަނގަޅެއް ނޫން، ބޭރުގެ ބަޔަކާ ގުޅިގެން ގައުމީ އެއަރލައިން ހިންގަން މަޝްވަރާކުރަނީ

ގައުމީ އެއަރލައިން މޯލްޑިވިއަންގެ މާލީ ހާލަތު ރަނގަޅުކުރުމަށްޓަކައި ބޭރުގެ ބަޔަކާ ގުޅިގެން އެ އެއަރލައިން ހިންގުމަށް މަޝްވަރާކުރައްވަމުން ގެންދަވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ އައިލެންޑް އޭވިއޭޝަނަކީ ކުރިންވެސް ގެއްލުމުގައި ހިންގަމުން އަންނަ ކުންފުންޏެއް ކަމަށެވެ. ކޮވިޑާ ގުޅިގެން ސަރުކާރަށް ވަރަށް ގިނަ މާލީ ދަތިތައް ކުރިމަތިވި ކަމަށާއި ކުންފުނީގެ މާލީ ހާލަތު ކުރިއަށްވުރެ ރަނގަޅުނުވާ ކަމަށެވެ. އެހެންކަމުން ބޭރުގެ ބައެއް ފަރާތްތަކާއެކު ޖޮއިންޓް ވެންޗަރ ހެދުމަށްޓަކައި މަޝްވަރާ ކުރައްވަމުން ގެންދަވާ ކަމަށް ރައީސް ވިދާޅުވިއެވެ.

ރައީސް އިތުރަށް ވިދާޅުވީ ރާއްޖޭގައި ޤައުމީ އެއަރލައިނެއް އޮންނަން ޖެހޭ ކަމަށް ޤަބޫލުކުރައްވާ ކަމަށާއި، ވައިގެ ދަތުރުފަތުރުގެ ނިޒާމެއް ޤައުމީ އެއަރލައިނެއްގެ ގޮތުގައި އޮންނަން ޖެހޭ ކަމަށެވެ. ޚާއްޞަކޮށް ޑޮމެސްޓިކް ދަތުރުފަތުރުގެ ނެޓްވޯކެއް އޮންނަންޖެހޭކަން ފާހަގަކުރައްވައި ރައީސް ވިދާޅުވީ އޭގެ ސަބަބުން ނުސީދާކޮށް ލިބޭ ވަރަށް ގިނަ ފައިދާތައް އެބަހުރި ކަމަށެވެ. ރާއްޖޭގައި ޚާއްޞަކޮށް ޑޮމެސްޓިކް ދަތުރުފަތުރުކުރުމުގައި ޑިސްކައުންޓް ރޭޓެއްގައި ސަރުކާރުން ސަބްސިޑައިޒްކޮށްގެންނަމަވެސް އެ އެއަރލައިން ދަމަހައްޓަން ޖެހޭ ކަމަށް ރައީސް ވިދާޅުވިއެވެ. މީގެ އިތުރުން ސަރުކާރުން ސީޕްލޭންގެ ޚިދުމަތް ވެސް އިތުރަށް ފުޅާކުރުމަށް އިންވެސްޓް ކުރެވޭނެ ގޮތްތައް ހޯއްދަވަމުން ގެންދަވާ ކަމަށް ރައީސް ވިދާޅުވިއެވެ.

ސަރުކާރު ހިއްސާވާ ކުންފުނިތަކުގެ ކަންތައްތައް ބަލަހައްޓާ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އާންމުކުރި މި އަހަރުގެ ފުރަތަމަ ކުއާޓަރުގެ މާލީ ހިސާބުތައް ދައްކާގޮތުން އައިލެންޑް އޭވިއޭޝަން (އައިއޭއެސް)އަށް ވަނީ 25.3 މިލިއަން ރުފިޔާގެ ގެއްލުން ވެފައެވެ. އެހެންނަމަވެސް 2020 ވަނަ އަހަރު ފުރަތަމަ ކުއާޓާއާ އަޅާބަލާއިރު ކުންފުނީގެ ގެއްލުމުގެ އިންސައްތަ ވަނީ 53 އިންސައްތަ ދަށްވެފައެވެ. އެއީ ކުންފުނީގެ އާމްދަނީ އިތުރުވެ ހިންގުމުގެ ޚަރަދު ކުޑަކުރަމުންނެވެ.

މާލީ ހިސާބުތައް ދައްކާ ގޮތުން ކުންފުނިން ކުރާ ޚަރަދުތަކުގެ ތެރެއިން އެންމެ ގިނަ ފައިސާ ޚަރަދު ވަނީ މުވައްޒަފުންގެ މުސާރަ އާއި އެލަވަންސްއަށެވެ. އެގޮތުން 2020 ވަނަ އަހަރު ފުރަތަމަ ކުއާޓާއާ އަޅާބަލާއިރު މި އަހަރު މި ޚަރަދު ވަނީ 1.7 މިލިއަން ރުފިޔާއަށް އަރާފައެވެ.

މޯލްޑިވިއަނުން ދަނީ މާލެ ހިމެނޭހެން ރާއްޖޭގެ 16 އެއަރޕޯޓަކަށް ދަތުރުތައް ބާއްވަމުންނެވެ. 2000 ވަނަ އަހަރު އުފެއްދި އައިލެންޑް އޭވިއޭޝަންގެ ދަށުން އުދުހޭ ފްލައިޓްތަކުގެ ނަން މޯލްޑިވިއަނަށް ބަދަލު ކުރީ 2008 ވަނަ އަހަރުގެ ތެރޭގައެވެ.