ފަތުރުވެރިކަމުގެ ދާއިރާ އަނބުރާ އިޢާދަކުރުމަށް ސަރުކާރުން ކުރި މަސައްކަތުގެ ނަތީޖާ މިހާރު ފެންނަން ފަށާފައިވާ ކަމަށް ރައީސް އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ ފަތުރުވެރިކަމުގެ ދާއިރާގައި މަސައްކަތްކުރާ މީހުންގެ ތެރެއިން 93 ޕަސެންޓް މީހުން ވެކްސިން ޖަހައި ދެ ޑޯޒް ހަމަކޮށްފައިވާ ކަމަށެވެ. އަދި ބޯޑަރ ކޮންޓްރޯލްގައި މަސައްކަތްކުރާ ހުރިހާ މުވައްޒަފުން ވެކްސިން ފުރިހަމަކޮށްފައިވާ ކަމަށެވެ.

ރައީސް ވިދާޅުވީ ކޮވިޑުގެ ޙާލަތާއެކު ދިގު މުއްދަތަކަށް ގެސްޓްހައުސްތައް ބަންދުވެފައި ހުރުމަށްފަހު، އަލުން ހުޅުވައިލެވި ޚިދުމަތް ދޭން ފެށިފައިވާ ކަމަށެވެ. މިހާރު ރާއްޖޭގައި ހިންގަމުންދާ ރިޒޯޓުތަކުގެ 95 ޕަސެންޓް މުޅިން ހުޅުވާފައިވާ ކަމަށެވެ. މީގެ އިތުރުން މިހާތަނަށް 655,000 ޓޫރިސްޓުން ރާއްޖެއަށް ޒިޔާރަތްކޮށްފައިވާ ކަމަށް ވެސް ރައީސް ވިދާޅުވިއެވެ.

ރައީސް ވިދާޅުވީ ކޮވިޑުގެ ބަލިމަޑުކަން މުޅި ދުނިޔެއަށް ކުރިމަތިވުމާއެކު، އަޅުގަނޑުމެން ވެސް މި ހޭދަކުރީ ވަރަށްދަތި އުނދަގުލުގައި ކަމަށެވެ. އަދި ދުނިޔޭގައި ކޮވިޑް ފެތުރެން ފެށިއިރު، ރާއްޖެއަކީ މިފަދަ ބަލިމަޑުކަމަކާ ކުރިމަތިލުމުގެ އެއްވެސް ވަސީލަތެއް ޤާއިމުކުރެވިފައިވާ ޤައުމެއް ނޫން ކަމަށެވެ. އަދި އަޅުގަނޑުމެންގެ ފުރަތަމަވެސް އަމާޒަކަށްވީ، މި ބައްޔަށް ފަރުވާދެވޭވަރަށް ރާއްޖޭގެ ޞިއްޙީ ނިޒާމުގެ ޤާބިލުކަން އިތުރުކުރެއްވުން ކަމަށާއި، މި ބަލިމަޑުކަމާ ގުޅިގެން ރައްޔިތުންނަށް ކުރިމަތިވާނެ އިޖުތިމާޢީ އަދި އިޤްތިޞާދީ ދަތިތައް ވީހާވެސް ކުޑަކުރުމަށް ސަރުކާރުން ކޮށްދެވެންހުރި ކަންތައްތައް ކޮށްދެއްވުން ކަމަށެވެ. ރައީސް ވިދާޅުވީ މާތްﷲގެ އިރާދަފުޅުން ކޮވިޑުގެ ޙާލަތު ކޮންޓްރޯލް ކުރެވި، އާ ޢާންމު ޙާލަތަކަށް ދަތުރުކުރުމުގެ ފުރުޞަތު ލިބިފައިވާ ކަމަށެވެ.

މީގެ އިތުރުން ރާއްޖޭގެ އިޤްތިޞާދީ ޙަރަކާތްތައް ފެށި، ކުދި ވިޔަފާރިތައް ހުޅުވާލައި، ވަޒީފާތައް އިޢާދަވާން ފަށާފައިވާ ކަމަށާއި، ދިރިއުޅުން އާރާސްތުކުރުމުގެ މަސައްކަތް ފެށިފައިވާ ކަމަށެވެ. މިކަން މިގޮތުގައި ދެމެހެއްޓޭނީ، ހުރިހާ ރައްޔިތުން އެކުގައި ގުޅިގެން ވެކްސިން ޖެހުމަށް މިކުރާ މަސައްކަތް ކާމިޔާބުކޮށް، ރާއްޖެއަކީ 12 އަހަރުން މަތީގެ ހުރިހާ އެންމެން ވެކްސިން ޖަހާފައިވާ އާބާދީއެއް ދިރިއުޅޭ ޤައުމަކަށް ހެދިގެން ކަމަށް ރައީސް ވިދާޅުވިއެވެ. ރައީސް ވިދާޅުވީ އެމަނިކުފާނުގެ މިއަދުގެ ވެސް އިލްތިމާސަކީ، ހުރިހާ ރައްޔިތުން ވެސް ވީހާ އަވަހަކަށް ވެކްސިން ޖަހައި ނިންމުން ކަމަށެވެ.

މގެ އިތުރުން މި ހަފްތާގެ ތެރޭގައި އޮފީސްތަކުގެ މުވައްޒަފުން އޮފީހަށް ނުކުމެ މަސައްކަތް ކުރަން ފަށާފައިވާ ކަމަށާއި، ކެފޭ، ރެސްޓޯރެންޓް، ސެލޫން އަދި ޖިމާއި އެހެނިހެން ވިޔަފާރިތައް، ޢާންމު ޙާލަތުގެ ގަޑިތަކާ އެއްގޮތަށް ހުޅުވައި، މިހާރު މިވަނީ ޚިދުމަތް ދޭން ފަށާފައި ކަމަށެވެ. މީހުން އެއް ރަށުން އަނެއް ރަށަށް ދަތުރުކުރުމަށް ވަރަށްގިނަ ލުއިތަކެއް ދެވިފައިވާ ކަމަށާއި، މި ދެވުނު ލުއިތަކާ އެކީގައި، އިޤްތިޞާދީ ޙަރަކާތްތައް ރަނގަޅުވާން ފަށާފައިވާ ކަމަށެވެ.

ރައީސް ވިދާޅުވީ އެކްސްޕޯޓްގެ މިންވަރު، މިދިޔަ އަހަރުގެ ޖުލައިމަހާ އަޅައިބަލާއިރު، މިހާރުވަނީ 19 ޕަސެންޓް އިތުރުވެފައި ކަމަށެވެ. އިމްޕޯޓުގެ މިންވަރު، މިދިޔަ އަހަރުގެ ޖުލައިމަހާ އަޅައިބަލާއިރު، 45 ޕަސެންޓް އިތުރުވެ، މި އަހަރުގެ ޖުލައިގެ ނިޔަލަށް ދައުލަތުގެ ޖުމްލަ އާމްދަނީ، މިދިޔަ އަހަރުގެ މި މުއްދަތާ އަޅައިބަލާއިރު، 14 ޕަސެންޓް އިތުރުވެފައިވާ ކަމަށެވެ. އަދި މި މުއްދަތުގެ ތެރޭގައި، ހަމައެކަނި ޓެކްސްގެ ގޮތުގައި ލިބުނު އާމްދަނީ، މިދިޔަ އަހަރުގެ މި މުއްދަތާ އަޅައިބަލާއިރު، 23 ޕަސެންޓް އިތުރު ކަމަށް ރައީސް ވިދާޅުވިއެވެ.