ސާފް ޗެމްޕިއަންޝިޕުގެ ބިޑް ކާމިޔާބުކުރުމުން ރައީސްގެ މަރުޚަބާ އެފްއޭއެމަށް

މި އަހަރު ބޭއްވުމަށް ހަމަޖެހިފައިވާ 13 ވަނަ ސާފް ޗެމްޕިއަންޝިޕަށް ރާއްޖެއިން ކުރި ބިޑް ކާމިޔާބުކުރުމާއެކު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މަރުޚަބާ ދަންނަވައިފިއެވެ.

މި އަހަރުގެ ސާފް ޗެމްޕިއަންޝިޕް ބާއްވަން ފުރުސަތު ހުޅުވާލުމާއެކު ރަސްމީކޮށް ބިޑުކުރީ ރާއްޖޭގެ އިތުރުން ނޭޕާލެވެ. ހޯމަ ދުވަހު އޮންލައިންކޮށް ބޭއްވި ސައުތު އޭޝިއަން ފުޓްބޯލް ފެޑެރޭޝަން (ސާފް) ގެ ހިންގާ ކޮމިޓީގެ ބައްދަލުވުމުގައި ވަނީ މި އަހަރުގެ މުބާރާތް ރާއްޖޭގައި ބޭއްވުމަށް ފާސްކޮށްފައެވެ. އަދި މި ބައްދަލުވުމުގައި ވަނީ މި މުބާރާތް މި އަހަރުގެ އޮކްޓޯބަރު މަހުގެ އެއްވަނަ ދުވަހުން ފެށިގެން 13 ވަނަ ދުވަހުގެ ނިޔަލަށް ބޭއްވުމަށްވެސް ނިންމާފައެވެ.

އެއާއެކު ހޯމަ ދުވަހު ކުރެއްވި ޓްވީޓެއްގައި ރައީސް ޞާލިޙް ވިދާޅުވީ ސާފް ޗެމްޕިއަންޝިޕް ރާއްޖޭގައި ބާއްވަން ބާއްވަން ފުރުސަތު ލިބުމަކީ ބޮޑު އުފަލެއް ކަމަށެވެ. އަދި މި މުބާރާތް ރާއްޖޭގައި ބޭއްވުމަށްޓަކައި އެފްއޭއެމާ ގުޅިގެން މަސައްކަތް ކުރި އެންމެހާ ބޭފުޅުންނަށް މަރުޚަބާ ދަންނަވާ ކަމަށްވެސް ވިދާޅުވިއެވެ.

ސާފް ޗެމްޕިއަންޝިޕުގެ ބިޑް ކާމިޔާބުކުރުމާއެކު ނައިބު ރައީސް ފައިސަލް ނަސީމުވެސް ވަނީ ވަނީ އެފްއޭއެމާއި އެ ކަމުގައި ޝާމިލުވި އެންމެހާ ބޭފުޅުންނަށް މަރުޚަބާ ދަންނަވާފައެވެ. އަދި ވިދާޅުވީ މިއީ ކާމިޔާބު އިވެންޓަކަށް ވާނެކަމުގެ އުއްމީދު އެބައޮތް ކަމަށެވެ.

އަދި ކުޅިވަރާ ބެހޭ ވަޒީރު އަޙްމަދު މަޚްލޫފް ކުރެއްވި ޓްވީޓެއްގައި ވިދާޅުވީ ސާފް ޗެމްޕިއަންޝިޕް ރާއްޖޭގައި ބާއްވަން ބާއްވަން ފުރުސަތު ލިބުމަކީ އުފާވެރި ޚަބަރެއް ކަމަށެވެ. އަދި މި ބިޑް ކާމިޔާބުކުރުމަށް އެފްއޭއެމުގެ ރައީސް ބައްސާމް އަދީލް ޖަލީލް ކުރެއްވި މަސައްކަތް ފާހަގަކުރައްވާ ވަޒީރު ވަނީ މަރުޚަބާ ދަންނަވާފައެވެ.

މީގެ އިތުރުން ސާފް ޗެމްޕިއަންޝިޕުގެ ބިޑް ކާމިޔާބުކުރުމާއެކު އެފްއޭއެމުގެ ރައީސް ބައްސާމް ކުރެއްވި ޓްވީޓެއްގައި ވަނީ މި ބިޑް ކާމިޔާބުކުރުމަށް ރައީސް ޞާލިޙާއި ކުޅިވަރާ ބެހޭ ވަޒީރު އަޙްމަދު މަޚްލޫފް ދެއްވި އެއްބާރުލެއްވުމަށް ޝުކުރުއަދާކުރައްވާފައެވެ.

މި ފަހަރުގެ ސާފް ޗެމްޕިއަންޝިޕް ރާއްޖޭގައި ބާއްވައިރު، މިއީ ރާއްޖޭގައި މި މުބާރާތް ބާއްވާ ދެވަނަ ފަހަރެވެ. އެގޮތުން އެންމެ ފުރަތަމަ ސާފް ޗެމްޕިއަންޝިޕް ރާއްޖޭގައި ބާއްވާފައިވަނީ 2008 ވަނަ އަހަރެވެ. އެ އަހަރު މުބާރާތް ބޭއްވީ ރާއްޖެ އާއި ސްރީ ލަންކާ ގުޅިގެންނެވެ.