"ފެހި ޤާނޫނު އަސާސީއަށް 13 އަހަރު - އާންމުންގެ އިތުބާރު ހޯދަން ގިނަ މަސައްކަތްތަކެއް ކުރަންޖެހޭ"
އައު ޤާނޫނު އަސާސީން ކަށަވަރު ކޮށްދެނީ ޒިންމާދާރު ކުރުވުމާއި، ބާރުތައް ވަކިކުރުން
ބަންޑާރަނައިބު އިބްރާހީމް ރިފްޢަތު
ރާއްޖޭގައި މިހާރު އަމަލުކުރަމުންދާ ފެހި ޤާނޫނު އަސާސީ ތަޞްދީޤުކޮށް އެއަށް އަމަލުކުރަން ފެށިތާ 13 އަހަރު ފުރިފައިވާއިރު، އައު ޤާނޫނު އަސާސީގެ ސަބަބުން ބާރުތައް ވަކިކުރެވިގެން ދިޔަކަމަށް ބަންޑާރަނައިބު އިބްރާހީމް ރިފްޢަތު ވިދާޅުވެއްޖެއެވެ.
އައު ޤާނޫނު އަސާސީއަށް 13 އަހަރު ފުރުމާ ގުޅިގެން ބަންޑާރަނައިބު ކުރެއްވި ޓްވީޓެއްގައި ވިދާޅުވީ، އައު ޤާނޫނު އަސާސީން ކަށަވަރު ކޮށްދެނީ ޖަވާބުދާރީ ކުރުވުމާއި، ބާރުތައް ވަކިކުރެވޭނެ ނިޒާމެއް ކަމަށެވެ. އެކަމަށްޓަކައި މިނިވަން މުއައްސަސާތަކެއް ޤާއިމުކުރެވިގެންދާކަން އޭނާ ފާހަގަ ކުރެއްވިއެވެ.
ރިފްޢަތު ވިދާޅުވީ، ހަމަހަމަކަމާއެކު އެކަންކަން ކުރެވިގެންދާ ކަމުގެ ޔަޤީންކަން ރައްޔިތުންނަށް ފޯރުކޮށްދިނުމަށާއި، އާންމުންގެ އިތުބާރު ހޯދުމަށް ގިނަ މަސައްކަތްތަކެއް ކުރަންޖެހޭނެ ކަމަށެވެ. އަދި މިއީ ދިމިޤްރާތީ ނިޒާމަށް މުހިއްމު ކަމެއްކަންވެސް އޭނާ ފާހަގަ ކުރެއްވިއެވެ.
2008 ވަނަ އަހަރުގެ އޮގަސްޓު މަހުގެ 7 ވަނަ ދުވަހުގެ ހެނދުނު 10:32 ގައި އޭރުގެ ރައީސުލްޖުމްހޫރިއްޔާ މައުމޫން އަބްދުލްޤައްޔޫމް ތަޞްދީޤް ކުރެއްވިި ޤާނޫނު އަސާސީއަކީ ރާއްޖޭގެ ތާރީޚުގައި އެކުލަވާލެވުނު 7 ވަނަ ޤާނޫނު އަސާސީއެވެ. އައު ޤާނޫނު އަސާސީއާއެކު ދައުލަތުގެ މުޅި ނިޒާމު ބަދަލުވިއެވެ. ވެރިޔަކު އިންތިޚާބުކުރާ ގޮތް ބަދަލުވިއެވެ. ގިނަ ސިޔާސީ ޕާޓީތައް އެކުލެވޭ ވާދަވެރި ވެއްޓެއް ފެނިގެންދިޔަ އެވެ. ތިން ބާރު ވަކިވެގެން ދިޔައެވެ.
