ކުޅިވަރުގެ މައިދާނުގައި ކުޑަކުދިންނަށް ހާމަކަން ބޮޑު ގޮތެއްގައި ރައްކާތެރިކަން އޮންނަންޖެހޭނެކަމަށް ރައީސުލްޖުމްހޫރިއްޔާގެ އަނބިކަނބަލުން (ފަރސްޓްލޭޑީ) ފަޒްނާ އަޙުމަދު ވިދާޅުވެއްޖެއެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޗައިލްޑް ސޭފްގާރޑިންގ ޕޮލިސީ އިފްތިތާޙު ކުރުމުގެ ރަސްމިއްޔާތު ޝަރަފުވެރިކުރައްވައި ދެއްކެވި ވާހަކަފުޅުގައި ފަރސްޓްލޭޑީ ވަނީ ކުޅިވަރުގެ މުހިއްމުކަމަށް އަލިއަޅުވާލައްވާފައެވެ. އެގޮތުން ކުޅިވަރަކީ އޭގެ ޒާތުގައިވެސް ރައްކާތެރިކަމާއި ހިމާޔަތް ލިއްބައިދޭ އެއްޗެއްކަން ފަޒްނާ ފާހަގަ ކުރެއްވިއެވެ.
ކުޅިވަރުގެ މާހައުލަކީވެސް ހިމާޔަތްލިބޭ، ރައްކާތެރި މާޙައުލަކަށް ވާން ޖެހޭކަން ފާހަގަ ކުރައްވައި ފަޒްނާ ވިދާޅުވީ، ކުޅިވަރުގެ މާހައުލުގައި ކުދިންނަށް ދިމާވާ ދަތިތައް ހިއްސާ ކުރުމަށް ބައެއް ފަހަރު ޖެހިލުންވާކަމަށް, ކަމުގެ ތަޖުރިބާކާރުން ފާހަގަކުރާ ކަމަށެވެ. އަދި އެކަމަށް މެދުވެރިވާ ސަބަބުތަކަށްވެސް ފަޒްނާގެ ވާހަކަފުޅުގައި އަލިއަޅުވާލެއްވިއެވެ. ފަޒްނާ ވިދާޅުވީ، ކުޅިވަރުގެ ތެރޭގައިވެސް އެކިކަހަލަ ނަފްސާނީ، ޖިސްމާނީ އަދި ޖިންސީ އަނިޔާ ކުރުން ފަދަ ކަންކަން އެކި ކަންކޮޅުތަކުގައި ހިނގާ ކަމަށެވެ.
އޭގެ އިތުރުން، "ޗައިލްޑް ސޭފްގާރޑިންގ ޕޮލިސީ"ގެ ފައިދާ ވާނީ ހަމައެކަނި ކުދިންނަށް ނޫންކަންވެސް ފަޒްނާގެ ވާހަކަފުޅުގައި ވިދާޅުވިއެވެ. އެގޮތުން ކުދިންގެ ކޯޗުންނާއި މެނޭޖްމަންޓަށްވެސް އެކަމުގެ ފައިދާތައް ކުރާނެކަމަށް ފަޒްނާ ވިދާޅުވިއެވެ. ޚާއްސަ ގޮތެއްގައި މިފަދަ ޕޮލިސީއެއް އޮތުމުން، އެކި ހާލަތްތަކުގައި އަމަލުކުރަންޖެހޭ ގޮތް ފެންނަން އޮންނާނެކަން ފަޒްނާ ފާހަގަ ކުރެއްވިއެވެ.
އޭގެ އިތުރުން، ކުއްޖަކާ ގުޅޭ މައްސަލައެއް ހުށައެޅުމުން އެކަމާ ގުޅޭ މައުލޫމާތުތަކާއި އެކަމަށް އިޖާބަދޭނެ ގޮތް މެނޭޖްމަންޓަށް އެނގިފައި އޮތުން މުހިންމުކަމަށްވެސް ފަޒްނާ ވިދާޅުވިއެވެ. ފަޒްނާ ވަނީ އެފްއޭއެމްއިން އާރކްއާ ގުޅިގެން ފަށާފައި މިވާ މަސައްކަތުގެ ފޮނި ނަތީޖާ ފެންނާނެކަމަށް އުއްމީދު ކުރައްވާކަން ފާހަގަ ކުރައްވައި، އެހެން ކުޅިވަރު އެސޯސިއޭޝަން ތަކުންވެސް މި ކަންކަން ބަލައިގަންނާނެކަމަށް އުއްމީދު ކުރައްވާކަމަށް ވިދާޅުވެފައެވެ.
