ކުޑަކުދިންގެ ރައްކާތެރިކަން ކަށަވަރުކުރުން މުއައްސަސާތަކުން ކުރާ މަސައްކަތްތައް މިވަނީ ދައްކުވައިދީފައި: މިނިސްޓަރ
އެފްއޭއެމްއާއި އާރކް ގުޅިގެން ވަނީ ޗައިލްޑް ސޭފްގާރޑިންގ ޕޮލިސީއެއް އެކުލަވާލާފައި
ޖެންޑަރ މިނިސްޓަރ ޢާއިޝަތު މުޙައްމަދު ދީދީ
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)އިން ޗައިލްޑް ސޭފްގާރޑިންގ ޕޮލިސީއެއް އެކުލަވާލުމުން އެއިން ދައްކުވައިދެނީ ކުޑަކުދިންގެ ރައްކާތެރިކަން ކަށަވަރުކުރުމަށް މުއައްސަސާތަކުން ކުރަމުންދާ މަސައްކަތްތައް ކަމަށް ޖެންޑަރ މިނިސްޓަރ ޢާއިޝަތު މުޙައްމަދު ދީދީ ވިދާޅުވެއްޖެއެވެ.
ޖެންޑަރ މިނިސްޓަރ މިފަދައިން ވިދާޅުވީ އެފްއޭއެމްއިން އެކުލަވާލާފައިވާ ޗައިލްޑް ސޭފްގާރޑިންގ ޕޮލިސީ ލޯންޗުކުރުމުގެ ރަސްމިއްޔާތުގައި ވާހަކަދައްކަވަމުންނެވެ. ޖެންޑަރ މިނިސްޓަރ ވަނީ އެފްއޭއެމްއިން ޗައިލްޑް ސޭފްޓީ އިންޓަރވެންޝަންއަށް ދޭ އަހައްމިއްޔަތުކަން ފާހަގަކުރައްވާފައެވެ.
މިކަމަށް ވަކި ޚާއްސަ ކޮމިޓީއެއް އެކުލަވާލައި، ކޮމިޓީގައި ކަމާގުޅުންހުރި މުއައްސަސާތައް ހިމަނައި, ކުދިންނާއި ގުޅިގެން ކުރަމުންދާ މަޝްވަރާތަކަކީ ކުޑަކުދިންނާ ގުޅޭ މަޝްވަރާތަކަކަށް ހެދުމަށް މި ޕޮލިސީގައި ޚާއްސަ އިސްކަމެއް ދީފައިވާކަމަށް މިނިސްޓަރ ފާހަގަކުރެއްވިއެވެ. މީގެ އިތުރުން ކުދިންނާ ގުޅޭ ޚިދުމަތްތަކެއް ދިނުމަށް އެ އިދާރާގައި ޗައިލްޑް ސެންޓަރޑް އޮފިސަރުން ކަނޑައަޅާފައި ތިބިކަންވެސް ފާހަގަކުރެއްވިއެވެ. މިކަން ޕޮލިސީގައި ހިމަނާފައިވުމުން، މިއީ ކުދިންނާ ގުޅިގެން ކުރާ މަސައްކަތްތަކުގެ މުހިންމުކަން އެފްއޭއެމްއިން ދެނެގަންނަކަން ހާމަވާކަމެއް ކަމަށް މިނިސްޓަރ ވިދާޅުވިއެވެ.
މިނިސްޓަރގެ ވާހަކަފުޅުގައި ވަނީ މި ޕޮލިސީ ތަންފީޒުކުރުމުގެ މައްޗަށް އަލިއަޅުވާލައްވާފައެވެ. ކުރިއަށްއޮތީ ބުރަ މަސައްކަތްތަކެއް ކަމަށާއި، މި މަސައްކަތް ތަންފީޒުކުރާނީ ހަމައެކަނި މާލޭގައި ނޫން ކަމަށާއި، އަތޮޅުތެރޭގައި ވެސް މިކަން ތަންފީޒުކުރެވިގެންދާނެ ކަމަށް މިނިސްޓަރ ވިދާޅުވިއެވެ.
މި ޕޮލިސީ ތަންފީޒުކުރުމަށްފަހު ވެސް އިތުރު ބަދަލުތަކެއް ގެންނަންޖެހިއްޖެނަމަ އެ ބަދަލެއް ގެނައުމަކީ ވެސް މުހިންމު ކަމެއް ކަމުގައި މިނިސްޓަރ ވިދާޅުވިއެވެ.
މި ޕޮލިސީއަކީ އެފްއޭއެމްއާއި އެޑްވޮކޭޓިން ދަ ރައިޓްސް އޮފް ޗިލްޑްރަން (އާރކް) ގުޅިގެން އެކުލަވާލާފައިވާ ޕޮލިސީއެކެވެ. މި ޕޮލިސީއަކީ ފުޓުބޯޅައިގެ މައިދާނުގައި ކުޑަކުދިންގެ ކަރާމާތްތައް ރައްކާތެރިކުރުމަށް މަސައްކަތްކުރުމަށް އެކުލަވާލާފައިވާ ޕޮލިސީއެކެވެ.
