އިންސާނުންގެ ދަތްޕިލައާ ވައްތަރު ދަތްޕިލައެއް ލިބިގެންވާ މަހެއް!
މި މަހަށް ގިނަ ބައެއްގެ ސަމާލުކަން ވަނީ ހުއްޓިފައި
އެމެރިކާގެ ނޯތު ކެރޮލީނާގެ މަސްވެރިއެއް ބޭނި ޝީޕްސްހެޑް މަސް، މަހުގެ ދަތްޕިލަ އިންސާނުންގެ ދަތްޕިލައާ ވައްތަރުވެ ގިނަ ބައެއްގެ ސަމާލުކަން ވަނީ ހުއްޓިފައެވެ.
އިންސާނުންގެ ދަތްޕިލަޔާ ވައްތަރު ދަތްޕިލައެއް ލިބިފައިވާ މަހެއް އެމެރިކާއިން ފެނިއްޖެއެވެ.
އެންޑީޓީވީ ގައި ރިޕޯޓުކޮށްފައިވާ ގޮތުން މި މަސް ފެނިފައި ވަނީ އެމެރިކާގެ ނޯތު ކެރޮލައިނާގެ މަސްވެރިއަކަށެވެ. އޭނާ ބޭނި މަހުގެ ފޮޓޯތައް ސޯޝަލް މީޑިއާގައި އާންމުވެފައިވާއިރު، އެ މަހަށް ވަނީ ގިނަ ބައެއްގެ ސަމާލުކަން ހުއްޓިފައެވެ.
އެގޮތުން ގިނަ އަދަދެއްގެ މީހުން ވަނީ މަހުގެ ފޮޓޯ ޝެއާކޮށް އެފޮޓޯޔަށް ކޮމެންޓުވެސް ކޮށްފައެވެ. ކޮމެންޓުތަކުގެ ތެރޭގައި "ތިމަންނަގެ ދަތްޕިލައަށް ވުރެ މަހުގެ ދަތްޕިަލަ ފުރިހަމައޭ" ބުނެފައިވާ މީހުންވެސް ގިނައެވެ. އަދި މީގެ މަހެއް ކުރިން ދުވަހަކުވެސް ފެނިފައި ނުވާ ކަމަށް ގިނަ މީހުން ވަނީ ފާހަގަކޮށްފައެވެ. އޭގެ އިތުރުން މަޖާޒީކޮށް ބައެއް މީހުން ވަނީ ރަނގަޅު ދަތުގެ ޑޮކްޓަރެއް ތިމަންނައަށް އެނގެއޭ ބުނެ މަސް ޑޮކްޓަރަށް ދެއްކުމަށްވެސް ގޮވައިފައެވެ.
ފޮޓޯ އާންމުވެ ގިނަ ބައެއްގެ ސަމާލުކަން ލިބިފައިވާ މި މަހަކީ "ޝީޕްސްހެޑް ފިޝް" ގެ ނަން ދީފައިވާ މަހެކެވެ. މީގެ މަސް އާންމު ގޮތެއްގައި ފެނިފައިވަނީ އެމެރިކާގެ ދެކުނު އަދި އުތުރުގެ ކަނޑުގެ ސަރަހައްދުންނެވެ.
