ހިޒްބުﷲ ޖަމާއަތުގެ ރޮކެޓް ހަމަލާތަކެއް އިސްރާއީލަށް
ހިޒްބުﷲ ޖަމާއަތުން ވަނީ އިސްރާއީލަށް 10ށް ވުރެ ގިނަ ރޮކެޓު ފޮނުވާލާފައި
ދެކުނު ލެބަނަން - އިސްރާއިލުން ހަމަލާދިން ސަރަހައްދުން ދުން އަރަނީ | ރޮއިޓާސް
ލެބަނަންގެ ހަނގުރާމަވެރި ޖަމާއަތް، ހިޒްބުﷲ އިން އިސްރާއީލަށް ރޮކެޓް ހަމަލާތަކެއް ދީފިއެވެ.
ރިޕޯޓުތައް ބުނާ ގޮތުން ހިޒްބުﷲ އިން އިސްރާއީލަށް ދިން ރޮކެޓު ހަމަލާތަކަކީ އިސްރާއީލުން ލެބަނަންގެ ދެކުނަށް ދިން ހަމަލާތަކުގެ ބަދަލުގައި ދިން ހަމަލާއެކެވެ.
ހުކުރު ދުވަހު ހިޒްބުﷲ އިން ނެރުނު ބަޔާނެއްގައި ބުނެފައި ވަނީ އެޖަމާއަތުން އިސްރާއީލުގެ ޝެބާ ސަރަހައްދަށް ރޮކެޓް ހަމަލާތަކެއް ދީފައި ކަމަށާއި އެއީ ލެބަނަން އަށް ދިން ހަމަލާތަކުގެ ބަދަލުގައި ދިން ހަމަލާތަކެއް ކަމަށެވެ.
ހިޒްބުﷲ ޖަމާއަތަކީ އިރާނު ސަރުކާރުގެ އެއްބާރުލުން ލިބިފައިވާ ޝިއާ ޖަމާއަތެކެވެ.
ހުކުރު ދުވަހު އިސްރާއީލުންވެސް ލެބަނަންއަށް ހަމަލާދީފައިވާކަމަށް ބުނެފައިވާއިރު، ހަނގުރާމައަކަށް ދާން ބޭނުން ނުވާ ކަމަށްވެސް ވަނީ ބުނެފައެވެ. އަދި ހަނގުރާމައަކަށް ދާނަމަ އެކަމަށް ތައްޔާރުކަމަށް ވަނީ ބުނެފައެވެ.
ހިޒްބުﷲ ޖަމާއަތުން ވަނީ އިސްރާއީލަށް 10ށް ވުރެ ގިނަ ރޮކެޓު ފޮނުވާލާފައެވެ. ބައެއް ރޮކެޓުތައް އިސްރާއީލުގެ ބިމަށް އެރިނަމަވެސް ގިނަ ހަމަލާތައް އެގައުމުގެ ވައިގެ ޑިފެންސް ސިސްޓަމުން ވަނީ ހުއްޓުވާފައެވެ.
މިއީ އިސްރާއީލާ ހިޒްބުﷲ ޖަމާއަތާ ދެމެދު މިގޮތަށް ހަމަލާ ބަދަލުކުރުންތައް ފަށައިގެން ކުރިއަށްދާ ތިން ވަނަ ދުވަހެވެ. މިއާއެކު 2006 ވަނަ އަހަރު ހިޒްބުﷲ ޖަމާއަތާއި އިސްރާއީލާ ދެމެދުގެ އެއް މަހުގެ ހަނގުރާމައަށް ފަހު އައިސްފައިވާ ހަމަޖެހުމަށް ލޮޅުން އަރައި އިތުރު ހަނގުރާމައަކަށް ހިނގައިދާނެ ކަމުގެ ބިރު ވަނީ އުފެދިފައެވެ.
