އުމުރުން ދުވަސްވީ މީހުންނަށް ސިނޮފަރމް ވެކްސިނުން އެކަށީގެންވާ ވަރަށް އެންޓިބޮޑީސް އުފައްދައެއް ނުދޭ

ޗައިނާގެ ސިނޮފަރމް ވެކްސިނުން އުމުރުން ދުވަސްވީ މީހުންނަށް އެކަށީގެންވާ ވަރަށް އެންޓި ބޮޑީސް އުފައްދައި ނުދޭ ކަމަށް ހަންގޭރީގެ ދިރާސާއަކުން ދައްކައިފިއެވެ.

މި ދިރާސާގައި އުމުރުން ދުވަސްވީ 10،000ށް ވުރެ ގިނަ މީހުން ބައިވެރިވެފައިވާއިރު، މި ދިރާސާގެ ސަބަބުން ހަންގޭރީގެ ސަރުކާރަށް ގިނަ ފާޑުކިޔުންތަކެއް ވެސް ވަނީ އަމާޒުވެފައެވެ.

ހަންގޭރީއަކީ އާބާދީގެ ނިސްބަތުން ކޮވިޑް-19 ޖެހިގެން އެންމެ ގިނަ މީހުން މަރުވި ގައުމެވެ. އަދި އެގައުމަކީ ޔޫރަޕްގެ ގައުމުތަކުގެ ތެރެއިން ކޮވިޑުން ރައްކާތެރިވުމަށް ސިނޮފަރމް ވެކްސިން ބޭނުންކުރި މަދު ގައުމުތަކުގެ ތެރޭގައި ހިމެނޭ ގައުމެކެވެ.

ދިރާސާގައި ބައިވެރިވި އުމުރުން 60 އަހަރުން މަތީގެ މީހުންގެ ތެރެއިން 25.9 އިންސައްތަ މީހުންގެ އެކަށީގެންވާ މިންވަރަށް އެންޓިބޮޑީސް އުފައްދާފައެއް ނުވެއެވެ.

މި ދިރާސާއާއެކު ހަންގޭރީން ވަނީ ސިނޮފަރމް ވެކްސިންގެ ތިންވަނަ ޑޯޒެއް ޖެހުމަށް ނިންމާފައެވެ. ހަންގޭރީގެ ސަރުކާރުން ބުނީ ކުރިޔަށް އޮތް ހަފްތާގެ ތެރޭގައި ސިނޮފަރމް ވެކްސިން ޖެހި މީހުންނަށް ތިންވަނަ ޑޯޒް ދިނުމަށް ނިންމާފައިވާ ކަމަށެވެ.