ފުވައްމުލަކުގެ ކަރަންޓަށް ދިމާވި މައްސަލަ ހައްލުވެއްޖެ
6 އޯގަސްޓު 2021 | ހުކުރު 13:09އަލުން ކަރަންޓު ފޯރުކޮށްދީފައި ވަނީ 4500 ކިލޯވޮޓްގެ ޓްރާންސްފޯމަރެއް ބެހެއްޓުމަށްފަހު
ފުވައްމުލައް ސިޓީގެ ގާތްގަނޑަކަށް 80 އިންސައްތަ ސަރަހައްދަކުންވަނީ ކަރަންޓު ކެނޑިފައި
ފުވައްމުލައް ސިޓީގެ ކަރަންޓަށް ދިމާވި މައްސަލަ ހައްލުވެއްޖެއެވެ.
ފުވައްމުލަކުގައި ކަރަންޓު ފޯރުކޮށްދޭން ބޭނުންކުރި ޓްރާންސްފޯމަރަށް ދިމާވި މައްސަލައަކާ ގުޅިގެން އެ ސިޓީގެ ބޮޑު ބަޔަކުން ކަރަންޓު ކެނޑުމަށް ދިމާވި މައްސަލަ ހައްލުކޮށް އަލުން ކަރަންޓު ވަނީ ފޯރުކޮށްދީފިއެވެ. އެ ސިޓީއަށް އަލުން ކަރަންޓު ފޯރުކޮށްދީފައި ވަނީ އައްޑޫ ސިޓީން އައު ޓްރާންސްފޯމަރެއް ގެންގޮސް ގުޅައިގެން ކަމަށް ކައުންސިލުން މައުލޫމާތުދެއެވެ. ކުރިން ބޭނުން ކުރަމުން އައީ، 2500 ކިލޯވޮޓްގެ ޓްރާންސްފޯމަރެކެވެ. އަލުން ކަރަންޓު ފޯރުކޮށްދީފައި ވަނީ 4500 ކިލޯ ވޮޓްގެ ޓްރާންސްފޯމަރެއް އިންސްޓޯލް ކުރުމަށް ފަހުގައެވެ.
ފުވައްމުލައް ސިޓީގައި ކަރަންޓުގެ ޚިދުމަތް ދިނުމަށް މިހާރު ބޭނުންކުރާ އިންޖީނުގެއާއި، ކަރަންޓު ނެޓްވޯކަށް ދުވަސްވުމުގެ ސަބަބުން ޚިދުމަތް ދިނުމުގައި ތަފާތު ގޮންޖެހުންތަކާ ކުރިމަތިވަމުންދާކަން ފެނަކައިން މީގެ ކުރިންވެސް ވަނީ ބުނެފައެވެ. އެ ސިޓީގެ މޭޔަރު އިސްމާއީލް ރަފީގް ވިދާޅުވީ، ބައު އިންޖީނުގެއިން މުޅި ރަށަށް ކަރަންޓު ފޯރު ކޮށްދިނުމުގައި ގޮންޖެހުންތަކެއް ހުރި ކަމަށެވެ. މިކަމަށް ހައްލެއް ގެނައުމަށްޓަކައި އައު އިންޖީނުގެއެއް އަޅައި، ނެޓްވޯކް އަޕްގްރޭޑްކުރުމުގެ މަޝްރޫއެއް ސަރުކާރުން ފެނަކައާ ވަނީ ހަވާލުކޮށްފައެވެ. އެ މަޝްރޫއުގެ އީ.އައި.އޭ މަސައްކަތް މިހާރު ކުރަމުންދާކަމަށާއި، އަމާޒަކީ މަހެއްހާ ދުވަހުގެ ތެރޭގައި އައު އިންޖީނުގޭގެ އަމަލީ މަސައްކަތް ފެށުން ކަމަަށް މޭޔަރު ވިދާޅުވިއެވެ.
ފުވައްމުލަކުގެ ބޮޑު ސަރަހައްދަކުން ކަރަންޓު ކެނޑިފައިވަނީ މި މަހުގެ 2ވަނަ ދުވަހުއެވެ.
