މިފަހުގެ ތާރީޚެއްގައި ދުނިޔޭގެ އިގްތިސާދަށް ދިމާނުވާހާ ބޮޑެތި ގޮންޖެހުންތައް މިހާރު ވަނީ ކުރިމަތިވެފައެވެ. މުޅި ދުނިޔެއަށް ދިމާވެފައިވާ ކޮވިޑްގެ ބަނަ ވިލާގަނޑާއެކު ގައުމުތަކުން ދަނީ އިގްތިސާދީ ގެއްލުންތައް ތަހައްމަލް ކުރަމުންނެވެ. މިއަނދަވަޅުން އަރައިގަތުމަށް އެކި ގައުމުތަކުން ދަނީ އެކި ސްޓްރެޓެޖީ އިޚްތިޔާރު ކުރަމުންނެވެ.
ކޮވިޑްގެ މި ވަބާގައި، ރާއްޖޭގެ އިގްތިސާދަށްވެސް ބޮޑެތި ގެއްލުންތަކެއް ލިބި، ދިވެހި އިގްތިސާދު ނަގައި ކޮޅަށް ޖެހުމަށް ސަރުކާރުން ދަނީ މަސައްކަތްތަކެއް ކުރަމުންނެވެ. އިގްތިސާދު ކޮޅަށް ޖެހޭނެ ކަމުގެ ފެހި ސިގްނަލް މިހާރު ވަނީ ލިބެންވެސް ފަށާފައެވެ.
ސަރުކާރުގެ ހިކުމަތްތެރި ވިސްނުމާއެކު، ރާއްޖޭގެ އިގްތިސާދުގެ ބޮޑު ބައެއް ހިއްސާކުރާ ފަތުރުވެރިކަމަށް ހުޅުވާލި ފުރުސަތުގެ ސަބަބުންނެވެ. މީގެ ނަތީޖާއެއްގެ ގޮތުން ރާއްޖެއަށް އަންނަ ފަތުރުވެރިންގެ އަދަދު ދުވަހެއް ދުވަހަކަށް އަންނަނީ އިތުރުވަމުންނެވެ. ފެންނަމުން މިދާ ހެޔޮ ބަދަލުތަކާއެކު ރާއްޖޭގެ އިގްތިސާދު އިހު އޮތް ގޮތަށް ބަދަލުވެދާނެ ކަމުގެ އުންމީދު ވަނީ އާލާވާން ފަށާފައެވެ.
ކޮންމެއަކަސް ކޮވިޑް19ގެ އެންމެ ނުރައްކާތެރި ހާލަތުން އަރައިގަނެވުނު ކަމުގެ އިހުސާސް ކުރެވުނު ނަމަވެސް، މި ކާރިސާގެ ސަބަބުން ގައުމަށް ކުރިމަތިވެފައިވާ ބޮޑެތި ގޮންޖެހުންތަކުން އަރައިގަނެވޭތަން އަދި ފެނިގެނެއް ނުދެއެވެ.
ކޮވިޑާއި ގުޅުންހުރި ހަރުކަށި ލޮކްޑައުންތަކާއެކު، ވިޔަފާރިތައް ބަންދުކުރަންޖެހި އަލުން ހުޅުވުމުގެ ފުރުސަތު ލިބިގެންދިޔަތާ މިވީ މަހެއްހާ ދުވަހެވެ. ކޮވިޑުގެ ބިޔަރާޅުތައް ވިޔަފާރިތަކަށް ބިންދާލުމާއެކު، އެކަމުން ސަލާމަތްވުމަށް ވިޔަފާރިތަކުން އެކި ނަންނަމުގައި ލޯނު ނަގަން ފެށިއެވެ. މި ލޯނުތައް ދައްކަން ޖެހުމުގެ ބުރަވެސް ހަމަ އުފުލަން ޖެހޭނީ އެ ވިޔަފާރިތަކުންނެވެ. ވިޔަފާރިތައް ހަމައަކަށް އެޅުވުމަށް ވިޔަފާރިވެރިން ކުރަމުން އަންނަ މަސައްތާއެކު ޑޮލަރުގެ އަގު ކަޅު ބާޒާރުގައި އުފުލި، މުދަލުގެ އަގުވެސް މިހާރު ވަނީ އުފުލިފައެވެ.
މިއީ، ކޮވިޑާއެކު ރާއްޖެއަށް ބޭރު ފައިސާ ވަންނަން ހުރި ދޮރާށި ބަންދު ވުމުގެ ނަތީޖާކަމަށްވެސް ވެދާނެއެވެ. ކަޅު ބާޒާރުގައި ޑޮލަރުގެ އަގު އުފުލުނަސް ވިޔަފާރިތަކުން ރާއްޖެއަށް މުދާ އެތެރެކުރަމުން އަންނައިރު، ކަޅު ބާޒާރު ނައްތާލުމަށް އެއްވެސް ބަޔަކު ވާހަކަ ދައްކާ ތަނެއް ނުފެނެއެވެ. ޑޮލަރުގެ ޑިމާންޑު މިހާ ބޮޑުވެފައި މިވަނީ ޓޫރިޒަމް ދަށްވުމުން ކަމަށްވުމަކީ އެކަށީގެންވާ ކަމެކެވެ.
ޑޮލަރުގެ މައްސަލަ އިންތިހާއަށް ބޮޑުވެފައިވާއިރު، މައްސަލަ ހައްލުކުރަން އެކަށީގެންވާ މަސައްކަތްތަކެއް ކުރާތަނެއް ނުފެނެއެވެ. އެއްކޮޅުން ވިޔަފާރިވެރިންނާއި އާންމުން ޑޮލަރު ނުލިބިގެން އަގުބޮޑުކޮށްވެސް ޑޮލަރު ގަންނަން ޑޮލަރު ފަހަތުން ދުވަނީއެވެ. ދައުލަތަށް ލިބެމުންއައި އާމްދަނީ އެކީއެކަށް ހުއްޓުމަަކަށް އައިސްފައިވީ ނަމަވެސް ތަރައްގީގެ މަޝްރޫއުތައް ބާރު ސްޕީޑްގައި ކުރިއަށްވެސް ގެންދަނީއެވެ.
މިހުރިހާ ކަމެއް މިހެން އޮތް އިރު، މުދަލުގެ އަގު އުފުލި، ވިޔަފާރިވެރިންނާއި، ރައްޔިތުން ހަނާވަމުންދާއިރު، މިވާހަކަ ދައްކާނެ ބަޔަކު ނެތެވެ. މިކަމަކީ ހަގީގަތުގައިވެސް ކަންބޮޑުވާން ޖެހޭ ކަމެކެވެ. ޑޮލަރު ގަތުމަށްޓަކައި، އެކި ކޮމިއުނިޓީ ހަދައިގެން ބޮޑު އަގުގައި ފައުޅުކަން ބޮޑު ގޮތެއްގައި ޑޮލަރު ވިއްކަމުންދާއިރު، މިކަން ހަމައަކަށް އަޅުވަން އެއްވެސް ކަމެއް ނުކުރެއޭވެސް ދެންނެވިދާނެއެވެ.
އެހެންނަމަވެސް، ފާއިތުވެދިޔަ ތަނުގައި ބޭއްވި މަދު ޕްރެސް ކޮންފަރެންސްތަކުގައި، ޑޮލަރުގެ މައްސަލަ ހައްލުކުރުމަށް މަސައްކަތް ކުރައްވަމުން ގެންދަވާކަމަށް މާލީ ވަޒީރު ވިދާޅުވެފައި އެބަހުއްޓެވެ. މިގޮތުން އެންމެފަހުން ވިދާޅުވެފައިވަނީ، ޑޮލަރުގެ މަސަލައަށް އަދި ހައްލު އައިސްފައި ނުވަނީ، އެމްއެމްއޭއާއި ގުޅިގެން ކުރައްވަމުން ގެންދަވާ މަސައްކަތްތައް އަދި ނިންމަވާ ލެވިފައި ނުވާތީ ކަމުގައެވެ. އެމަސައްކަތް މިއަހަރު ފެބްރުއަރީ މަހުން ފެށިގެން ކުރިޔަށްދާކަމަށްވެސް ވިދާޅުފައި ވެއެވެ.
ޑޮލަރުގެ ވަރުގަދަ ކަޅު ބާޒާރެއް ރާއްޖޭގައި އުފެދި، ޑޮލަރުގެ އަގު އިންތިހާއަށް އުފުލިގެން ގޮސްފައިވާއިރު، މުއައްސަސާތައް ހިމޭނުން ތިބުމަކީ ހައްލު ގެނެވޭނެ ގޮތެއް ނޫނެވެ އިދިކޮޅު ކޯލިޝަނުން ވެސް މިވާހަކަ ދައްކާތަނެއް ނުފެނެއެވެ. މިއަށްވުރެ އެ މީހުންނަށް މުހިއްމީ ކުރީގެ ރައީސް ޔާމީން މިނިވަން ކުރުމަށް ގޮވާލުން ކަމަށް ވެދާނެއެވެ.
