މުއިއްޒު ބޭނުންވާ އަމިއްލަ ކުންފުނިތަކަކަށް ޕޮރޮޖެކްޓްތައް ބަހާލުން ބުރާސްފަތި ދުވަހު
5 ނޮވެމްބަރު 2025 | ބުދަ 19:41ޕްރޮޖެކްޓްތައް ހަވާލުކުރަނީ އިއުލާނު ކުރުމެއް ނެތި އަޑި ނޭނގޭ ގޮތައް
ބިޑު ކުރުމެއްނެތި އަމިއްލަ ކުންފުނިތަކަށް މަޝްރޫއުތައް ބަހާލުމަށް ބާއްވާ ރަސްމިއްޔާތުގެ ރިހާސަލުގެ ތެރެއިން
ރައީސް މުޢިއްޒު ބޭނުންވާ އަމިއްލަ ކުންފުނިތަކަށް ބައިވަރު ޕްރޮޖެކްޓްތަކެއް ބަހާލަން ހާއްސަ ރަސްމިއްޔާތެއް ބުރާސްފަތި ދުވަހު ބާއްވަން ނިންމައިފިއެވެ.
އިތުބާރު ހުރި މަސްދަރަކުން ރާއްޖެ އެމްވީ އަށް މައުލޫމާތު ދީފައިވާ ގޮތުގައި މުއިއްޒު އަންގާ ކުންފުނިތަކަށް ޕްރޮޖެކްޓްތައް ހަވާލު ކުރުން އޮންނާނީ ބުރާސްފަތި ދުވަހު ނަސަންދުރާގައި ބާއްވާ ހާއްސަ ރަސްމިއްޔަތެއްގަ އެވެ.
ކުންފުނިތަކާ ހަވާލު ކުރަން ނިންމާފައިވަނީ ރާއްޖޭގެ ރަށްރަށުގައި ސަރުކާރުން ކުރިއަށް ގެންދަން ނިންމާފައިވާ މަޝްރޫއުތަކެވެ. މީގެ ތެރޭގައި ސްކޫލުތައް އެއަރކޯން ކުރުމާއި، އިމާރާތްތައް ކުރުން ފަދަ މަސައްކަތް ހިމެނެއެވެ.
މަޝްރޫއުތައް ހަވާލު ކުރާ އިރު މިކަމަށް އިއުލާނު ކޮށްފައެއް ނުވެއެވެ. އަދި ކުންފުނިތައް ހޮވުނީ އެތެރޭގެ ގުޅުންތަކުގެ ތެރެއިން ކަމަށް ވެސް އެނގިފައެވެ. ރާއްޖޭގެ ތާރީޚުގައި އަމިއްލަ ކުންފުނިތަކަށް އަޑި ނޭނގޭ ގޮތައް މިހާ ގިނަ މަޝްރޫއުތަކެެެއް ބަހާލާ މިއީ ފުރަތަމަ ފަހަރެވެ.
މައުލޫމާތު ލިބިފައިވާ ގޮތުގައި މި ހުރިހާ ޕްރޮޖެކްޓް ތަކަކަށް ފަންޑު ކުރަނި ސަރުކާރުގެ ހިއްސާ އޮންނަ ބޭންކް އެފް މޯލްޑިވްސް އިންނެވެ. އަދި މި ޕްރޮޖެކްޓްތައް ހިންގުމަށް ފައިސާހޯދަން ގެރެންޓީ ދޭ ފަރާތަކީ ފިނޭންސް މިނިސްޓްރީ އެވެ.
އޭގެ އިތުރުން މި ޕްރޮޖެކްޓް ތަކަށް ދޭން ހަމަޖެހިފައިވާ ފައިސާ ބީއެމްއެލް އިން ޖަމާ ކުރަނީ ކުންފުނިތަކާ އެކު ހުޅުވާ އެސްކްރޯ އެކައުންޓް ތަކަށެވެ.
ފިނޭންސް މިނިސްޓްރީން އިންތިޒާމު ކުރާ މި ރަސްމިއްޔާތުގެ ރިހާސަލެއް ބުދަ ދުވަހުގެ ރޭ ނަސަންދުރާ ގައި ވަނީ ބާއްވާފައެވެ.
އަނެއްކޮޅުން އަމިއްލަ ކުންފުނިތަކުގެ ބިލުތަކަށް ސަރުކާރުން ދޭން ޖެހޭ ފައިސާ ދީ ހަލާސް ކުރަން މުޢިއްޒު އަމިއްލަފުޅަށް ކަނޑައެޅުއްވި ސުންގަޑި 5 ނޮވެމްބަރަށް ހަމަވާނެ އެވެ. އަދި މިދިޔަ ރޯދަ މަހުގެ ކުރިން ވިޔަފާރިވެރިންނަށް ފައިސާ ދޫކޮށް ނިންމުމަށް ވެސް މުއިއްޒު ޖެނުއަރީ، 2025، ގައި ވައުދުވެވަޑައިގެންނެވި އެވެ. ނަމަވެސް އެ ވައުދު ފުއްދަވާފައެއް ނުވެ އެވެ. އަދި ނޮވެމްބަރު، 2024، ގެ ކުރިން ފައިސާ ދޫކުރަން ވެސް މުއިއްޒު ކުރިން ވައުދުވެވަޑައިގެންފައިވެ އެވެ.
