ރާއްޖޭގެ ކުރީގެ އިންޑިއަން ހައި ކޮމިޝަނަރު އަޔަލެންޑްގެ ހައި ކޮމިޝަނަރުކަމަށް އައްޔަނު ކުރެއްވުމުން ރައީސް ނަޝީދުގެ ތަހުނިޔާ

މީގެ ކުރިން އިންޑިއާއިން ރާއްޖެއަށް ކަނޑައަޅުއްވާފައި ހުންނެވި ހައި ކޮމިޝަނަރު، އަކިލޭޝް މިޝްރާ، އަޔަލެންޑުގެ ހައި ކޮމިޝަނަރުކަމަށް އައްޔަނުކުރުމާ ގުޅިގެން ރާއްޖޭގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ހައި ކޮމިޝަނަރަށް މަރުހަބާ ދަންނަވައިފިއެވެ.

ރައީސް ނަޝީދު، ހައި ކޮމިޝަނަރު މިޝްރާއަށް މަރުހަބާ ދަންނަވާފައި ވަނީ ޓުވިޓާގައެވެ. އެގޮތުން ޓުވިޓާގައި ހައި ކޮމިޝަނަރު ކުރެއްވި ޓުވީޓެއް ރީޓުވީޓުކޮށް ހައި ކޮމިޝަނަރަށް މަރުހަބާ ދެންނެވުމަށް ފަހު ރައީސް ނަޝީދު ވަނީ މިޝްރާ ރާއްޖޭގައި ކުރެއްވި ފަދަ ރަނގަޅު ޚިދުމަތެއް އަޔަލެންޑުގައި ކުރައްވާނެކަމުގެ ޔަގީންކަން އެމަނިކުފާނަށް އެބައޮތްކަމަށް ވިދާޅުވެފައެވެ. އަދި އަޔަލެންޑަކީ ރީތި ތަނެއް ނަމަވެސް ގުދުރަތީ ރީތިކަމަށް ބަލާއިރު، އެންމެ ރީތި ތަނަކީ ރާއްޖެ ކަމަށް ރައީސް ނަޝީދު ވަނީ އެމަނިކުފާނުގެ ޓުވީޓުގައި ވިދާޅުވެފައެވެ.

ރައީސް ނަޝީދުގެ ޓުވީޓުގައި ރާއްޖޭގެ ގުތުރަތީ ރީތިކަމުގެ ވާހަކަ ދައްކަވާފައި ވަނީ ހައި ކޮމިޝަނަރުކަން ކުރުމަށް އަޔަލެންޑަށް ދިއުމުގެ ފުރުސަތު ލިބުނަކަން ހިއްސާކުރައްވައި ކުރެއްވި ޓުވީޓުގައި ދުނިޔެ މަތީގެ ސުވަރުގޭގެ ގޮތުގައި އޮތް ރާއްޖެއިން ގުދުރަތީ ރީތިކަމަށް މަޝްހޫރު އަދި އެންމެ އެކުވެރި މީހުން ދިރިއުޅޭ ގައުމަށް ބަދަލުވުމަށް ހަމަޖެހިފައިވާކަމަށް ވިދާޅުވުމުންނެވެ.

ޝްރީ އަކިލޭޝް މިޝްރާ އަކީ 2016 ވަނަ އަހަރުގެ ޖެނުއަރީން 2019 ވަނަ އަހަރުގެ ފެބްރުއަރީ މަހަށް އިންޑިއާއިން ރާއްޖެއަށް ކަނޑައަޅުއްވާފައި ހުންނެވި ހައި ކޮމިޝަނަރެވެ.