ލަންކާއިން މާލެ އަށް މުދާ ގެނައުމަށް ކޮޗިން ފެރީ ހަމަޖެހިއްޖެ ކަމަށް މޯލްޑިވްސް ސްޓޭޓް ޝިޕިންގ ކޮމްޕެނީން ބުނެފިއެވެ.
އެމްއެސްއެސްއިން ބުނެފައިވަނީ، އިންޑިއާގެ ކޮޗިން އިން ރާއްޖެއަށް ދަތުރުކުރާ ކާގޯ ފެރީ މެދުވެރިކޮށް ލަންކާއިން ރާއްޖެއަށް މުދާ ގެނައުމަށް ހަމަޖެހިގެން ދިޔުމަކީ ލިބުނު ކުރިއެރުމެއް ކަމަށެވެ. މިކަމަށް ފުރަތަމަ ހައިކޮމިޝަންގައި އެދުނީ މި އަހަރުގެ ޖޫން މަހު ކަމަށާއި، މިކަމުގައި އިންޑިއާގެ ސަރުކާރުން ވެދެއްވި އެހީތެރިކަމަށް ޝުކުރުއަދާކުރައްވާ ކަމަށެވެ.
މި ގޮތަށް ހަމަޖެހުމާއެކު ފެރީ ދެން ދަތުރުކުރާނީ އިންޑިއާއިން ކޮލަމްބޯއަށް ދިޔުމަށްފަހު މާލެ އަންނަ ގޮތަށެވެ. މިއީ އިންޑިއާއާއި ރާއްޖެއާ ދެމެދުގައި އޮތް ވިޔަފާރީގެ ގުޅުމަށް ލިބުނު އިތުރު ކުރިއެރުމެށް ކަމަށް އެމްއެސްއެސްއިން ފާހަގަކުރެއެވެ.
އިންޑިއާގެ ޓުޓިކޮރިނުން ރާއްޖެއަށް ކާގޯ ފެރީގެ ޚިދުމަތް ފަށާފައިވަނީ ސެޕްޓެމްބަރު 2020 ގައެވެ. އެއަށްފަހު ހުވަދު އަތޮޅާއި، އައްޑު އަތޮޅަށް ވެސް ވަނީ ދަތުރުތައް ފަށާފައެވެ. މި ދަތުރުތައް ފެށީ ނޮވެމްބަރު 2020 ގައެވެ.
މި ދަތުރު ތަކުގެ ސަބަބުން އެ ސަރަހައްދުގެ ވިޔަފާރިވެރިންނަށް އަގުހެޔޮކޮށް މުދާ ގެނައުމަށް މަގުފަހިވެގެން ދާނެ ކަމަށް ސަރުކާރުން ވަނީ ބުނެފައެވެ. އެސްޓީއޯއިން ބުނެފައިވަނީ އެ ކުންފުނީގެ އަމާޒަކީ ކާގޯ ފެރީން ގެންނަ މުދާ އުތުުރުގެ ރަށްތަކަށް ހެޔޮ އަގުގައި ވިއްކުން ކަމަށެވެ.
