ފުވައްމުލަކު ކަރަންޓަށް ދިމާވި މައްސަލައަށް މިހަފުތާގައި ދާއިމީ ހައްލެއް ލިބޭނެ - މޭޔަރު

މުޅި ފުވައްމުލައް ސިޓީގެ ކަރަންޓަށް ދިމާވި މައްސަލައަށް މި ހަފުތާގައި ދާއިމީ ހައްލެއް ލިބިގެންދާނެ ކަމަށް އެ ސިޓީގެ މޭޔަރު އިސްމާއީލް ރަފީގު ވިދާޅުވެއްޖެއެވެ.

ރައްޖެޓީވީގެ 'ފަލަ ސުރުޚީ' ޕްރޮގްރާމުގައި ވާހަކަދައްކަވަމުން މޭޔަރު ވިދާޅުވީ، ފުވައްމުލަކުން ކަރަންޓު ކެނޑުނީ މެއިން ޓްރާންސްފޯމަރަށް ދިމާވި މައްސަލައެއްގެ ސަބަބުން ކަމަށެވެ. އެ މައްސަލައަށް ވަގުތީ ހައްލެއް މިހާރު ގެނެވިފައިވީ ނަމަވެސް ދާއިމީ ހައްލެއް ހޯދުމުގެ މަސައްކަތް މިހާރު ކުރަމުން އަންނަ ކަމަށް މޭޔަރު ވިދާޅުވިއެވެ.

އައްޑޫ ސިޓީން ޓްރާންސްފޯމަރެއް މިހާރު ގެނެސްފައިވާ ކަމަށާއި، އެ ޓްރާންސްފޯމަރު ގުޅުމުގެ މަސައްކަތް މިހާރު ކުރަމުން އަންނަ ކަމަށާއި، މި ހަފްތާ ތެރޭގައި ޓްރާންސްފޯމަރު ގުޅުމުުގެ މަސައްކަތް ނިމޭނެކަމަށް މޭޔަރު ވިދާޅުވިއެވެ. އޭރުން ކަރަންޓު ކެނޑުމުގައި ދިމާވާ މައްސަލައަށް ދާއިމީ ހައްލެއް ލިބިގެންދާނެއެވެ.

ފުވައްމުލައް ސިޓީގައި ކަރަންޓުގެ ޚިދުމަތް ދިނުމަށް މިހާރު ބޭނުންކުރާ އިންޖީނުގެއާއި، ކަރަންޓު ނެޓްވޯކަށް ދުވަސްވުމުގެ ސަބަބުން ޚިދުމަތް ދިނުމުގައި ތަފާތު ގޮންޖެހުންތަކާ ކުރިމަތިވަމުންދާކަން ފެނަކައިން މީގެ ކުރިންވެސް ވަނީ ބުނެފައެވެ. މޭޔަރު ވެސް ވިދާޅުވީ، ބައު އިންޖީނުގޭގައި މުޅި ރަށަށް ކަރަންޓު ފޯރު ކޮށްދިނުމުގައި ގޮންޖެހުންތަކެއް ހުރި ކަމަށެވެ. މިކަމަށް ހައްލެއް ގެނައުމަށްޓަކައި އައު އިންޖީނުގެއެއް އަޅައި، ނެޓްވޯކް އަޕްގްރޭޑްކުރުމުގެ މަޝްރޫޢެއް ސަރުކާރުން ފެނަކައާ ވަނީ ހަވާލުކޮށްފައެވެ. އެ މަޝްރޫއުގެ އީ.އައި.އޭ މަސައްކަތް މިހާރު ކުރަމުންދާކަމަށާއި، އަމާޒަކީ މަހެއްހާ ދުވަހުގެ ތެރޭގައި އައު އިންޖީނުގޭގެ އަމަލީ މަސައްކަތް ފެށުން ކަމަަށް މޭޔަރު ވިދާޅުވިއެވެ.

ފުވައްމުލަކުގެ ބޮޑު ސަރަހައްދަކުން ކަރަންޓު ކެނޑިފައިވަނީ ހޯމަ ދުވަހުއެވެ.