ފުވައްމުލައް ސިޓީން އިތުރު 5 މީހަކު ޕޮޒިޓިވްވެ، ޖުމްލަ 880ށް އަރައިފިއެވެ.

ފުވައްމުލައް ހޮސްޕިޓަލުން ބުނީ އާދިއްތަ ދުވަހުގެ ހަވީރު 5:00ން ހޯމަ ދުވަހުގެ ހަވީރު 5:00ށް އިތުރު 45 ސާމްޕަލެއް ނަގާފައިވާ ކަމަށާއި، އޭގެ ތެރެއިން އިތުރު 5 މީހަކު ޕޮޒިޓިވްވެފައިވާ ކަމަށެވެ. އެއީ 5 ދިވެހިން ކަމަށް ހޮސްޕިޓަލުން މައުލޫމާތު ދެއެވެ.

ހޮސްޕިޓަލުން އާއްމުކޮށްފައިވާ ތަފާސްހިސާބުތަކަށް ބަލާއިރު މިހާތަނަށް 880 މީހަކު ބައްޔަށް ޕޮޒިޓިވްވެފައިވެއެވެ. އަދި 828 މީހަކު ބަލިން ރަނގަޅުވެފައިވެއެވެ. މޮނިޓަރިންއަށް 765 ގެއެއް ލާފައިވާއިރު، 316 މީހުން ހައިރިސްކް ކޮންޓެކްޓުންގެ ގޮތުގައި ފާހަގަކޮށްފައިވެއެވެ. ހޮސްޕިޓަލުން ބުނީ 53 އެކްޓިވް ކޭސް ހިމެނޭ ކަމަށާއި، ފެސިލިޓީގައި 3 މީހަކު އެޑްމިޓްކޮށްގެން ފަރުވާ ދެމުންދާ ކަމަށެވެ.

މީގެ އިތުރުން އަންގާރަ ދުވަހުގެ ހެނދުނު 9:00ގައި ފުވައްމުލަކު އަތޮޅު ހޮސްޕިޓަލަށް ގެންދެވުނު 94 އަހަރުގެ ދިވެހި ފިރިހެނެއް ވަނީ ނިޔާވެފައެވެ. މިއީ ރާއްޖޭގައި ކޮވިޑް ޖެހިގެން ނިޔާވި 222 ވަނަ މީހާއެވެ.

ފުވައްމުލައް ހޮސްޕިޓަލުން ބުނީ ސާމްޕަލިންގެ މަސައްކަތަށް ޚާއްސަ ސަމާލުކަމެއް ދޭ ކަމަށެވެ. އެގޮތުން މިހާތަނަށް 19583 ސާމްޕަލެއް ނަގާފައިވާ ކަމަށެވެ. އަދި 64 ސާމްޕަލެއް ނަތީޖާ ނުލިބޭ ކަމަށް އެ ހޮސްޕިޓަލުން ބުނެއެވެ.

ހޮސްޕިޓަލުން ބުނީ ކޮވިޑް-19ން ދިފާއުވުމަށް ޚާއްސަ މަސައްކަތްތަކެއް ކުރަމުންދާ ކަމަށެވެ. އެގޮތުން ވެކްސިން ޖެހުމަށް ބާރު އަޅާކަން ފާހަގަކޮށް ހޮސްޕިޓަލުން ބުނީ މިހާތަނަށް 4945 މީހުން ވެކްސިންގެ ދެވަނަ ޑޯޒު ފުރިހަމަކޮށްފައިވާ ކަމަށެވެ. އަދި 5992 މީހަކު ވެކްސިންގެ ފުރަތަމަ ޑޯޒު ޖަހާފައިވެއެވެ.

ފުވައްމުލައް ސިޓީގައި ކޮވިޑް-19 ކޮންޓްރޯލްކުރުމަށް ގިނަ ފިޔަވަޅުތަކެއް އަޅާފައިވާއިރު، ބަލީގެ ހާލަތު ރަނގަޅުވަމުން އަންނާތީ މިހާރު އަޅާފައިވާ ފިޔަވަޅުތަކަށް އަންނަނީ ލުއިތައް ދެމުންނެވެ. ފިޔަވަޅުތަކަށް ލުއި ދިން ނަމަވެސް ބަލިން ރައްކާތެރިވުމަށް ކުރަން ޖެހޭ އެންމެހައި މަސައްކަތްތައް ކުރުމަށް އިލްތިމާސްކޮށްފައިވެއެވެ. ފުވައްމުލައް ދެވަނަ ފަހަރަށް މޮނިޓަރިންގެ ހާލަތަށް ގެނެސްފައިވަނީ ރޯގާގެ އަލާމާތް ހުރުމުގެ ސަބަބުން މެއި މަހުގެ 5 ވަނަ ދުވަހު ފުލޫ ކުލިނިކަށް ދެއްކި މީހަކު ޕޮޒިޓިވްވުމާ ގުޅިގެންނެވެ.