ފުވައްމުލަކުގެ ތާރީޚާއި ސަޤާފަތް ފަތުރުވެރިންނަށް ދައްކުވައިދޭން ޖެހޭ– އިސްމާޢީލް ރަފީޤް
3 އޯގަސްޓު 2021 | އަންގާރަ 17:21ފުވައްމުލަކުގެ ފަރަކީ ދުނިޔޭގެ ފެންވަރުގެ ޑައިވިންގ ސްޕޮޓެއް
ފުވައްމުލައް ސިޓީ
ފުވައްމުލަކަކީ މުއްސަނދި ތާރީޚަކާއި ސަޤާފަތެއް އޮތް ރަށެއް ކަމަށާއި، އެރަށަށް ޒިޔާރަތްކުރާ ފަތުރުވެރިންނަށް އެކަންކަން ދައްކުވައިދޭން ޖެހޭ ކަމަށް ފުވައްމުލަކު ސިޓީގެ މޭޔަރު އިސްމާޢީލް ރަފީޤް ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި ވާހަކަ ދައްކަވަމުން ރަފީޤް ވިދާޅުވީ ފުވައްމުލަކަކީ ޒަމާންވީ ތާރީޚަކާއި، ސަޤާފަތެއް ލިބިފައިވާ ރަށެއް ކަމަށާއި، އެގޮތުން ތާރީޚީ ބިނާތަކާއި ތަންތަން ފަތުރުވެރިންނަށް ދައްކައި, އެއިން ނަފާ ހޯދާނެ ގޮތްތައް ހޯދަމުން އަންނަ ކަމަށެވެ.
ފުވައްމުލަކަށް ކޮންމެ އަހަރަކުވެސް އެކި ބޭނުންތަކަށް ގިނަ ފަތުރުވެރިން ޒިޔާރަތްކުރަމުން އަންނަކަމަށާއި، ޚާއްސަކޮށް ދުނިޔޭގެ ފެންވަރުގެ ޑައިވިން ސްޕޮޓަކަށް ފުވައްމުލަކު ވުމާއިއެކު ފަތުރުވެރިން އަންނަ އަދަދު އަންނަނީ އިތުރުވަމުން ކަމަށް އޭނާ ވިދާޅުވިއެވެ.
ރަފީޤް ވިދާޅުވީ، ފުވައްމުލަކުގައި ހުރި ތާރީޚީ ބިނާތަކަށް އެކިވަރުގެ ގެއްލުން ވެފައި އެބަހުރި ކަމަށާއި، ނަމަވެސް ސިޓީ ކައުންސިލުން އެތަންތަން މަރާމާތު ކުރުމުގެ މަސައްކަތް ކުރަމުން އަންނަ ކަމަށެވެ.
ފަތުރުވެރިން އަންނަ އަދަދު އިތުރުވަމުން އަންނާތީ, އައު ލޭންޑް ޔޫސް ޕްލޭން ހަދާއިރު، ގެސްޓް ހައުސް ހެދުމަށް ބިންތަކެއް ކަނޑައެޅިގެންދާނެ ކަމަށާއި، ގެސްޓް ހައުސްގެ ވިޔަފާރިއާއެކު ފުވައްމުލަކުގެ އިޤްތިޞާދު އިތުރަށް ކުރިއަރާނެ ކަމަށެވެ.
ފުވައްމުލަކީ ކޮންމެ އަހަރަކުވެސް އެތައް ހާސް ފަތުރުވެރިން ޒިޔާރަތްކުރާ ރަށެކެވެ. ފަތުރުވެރިންގެ އިތުރުން އެރަށަށް ޒިޔާރަތްކުރާ ދިވެހީންގެ އަދަދުވެސް އަންނަނީ އިތުރުވަމުންނެވެ. ފުވައްމުލަކުގެ ފަރަކީ ދުނިޔޭގެ ފެންވަރުގެ ޑައިވިންގ ސްޕޮޓެއް ވެސް މެއެވެ.
