މޭ 6 ގެ ހަމަލާއާ ގުޅިގެން އަދުހަމާއެކު ވަނީ އިއުތިރާފުގެ އެއްބަސްވުން ހެދިފައި
3 އޯގަސްޓު 2021 | އަންގާރަ 09:55އަދުހަމް އިއުތިރާފްވަނީ ޓެރަރިޒަމްގެ އަމަލެއް ހިންގުމުގެ ދައުވާއާއި، އައިއެސް ޖަމާއަތަށް ތާއީދު ކުރުމުގެ ގޮތުން އަމަލުތައް ހިންގާ ކަމުގެ ދައުވާއަށް
ރައީސް ނަޝީދަށް އަމާޒުކޮށް ދިން ހަމަލާއާ ގުޅިގެން ހައްޔަރު ކުރި 4 މީހުން
މެއި މަހުގެ 6 ވަނަ ދުވަހުގެރޭ ނީލޯފަރު މަގުގައި އައިއޑީއެއް ގޮއްވާލައިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަ ކޮށްލުމަށް ދިން ހަމަލާގައި އަމަލީ ގޮތުން ބައިވެރިވި އަހުމަދު އަދުހަމާއެކު އިއުތިރާފުގެ އެއްބަސްވުމުގައި ސޮއިކޮށްފިއެވެ.
މިކަމާ ގުޅޭގޮތުން ގޮތުން ޕީޖީ އޮފީހުން ބޭއްވި ނޫސްވެރިންގެ ބައްދަލުވުމުގައި ޕްރޮސެކިއުޓަރ ޖެނެރަލް ހުސައިން ޝަމީމު ވިދާޅުވީ، އިއުތިރާފުގެ އެއްބަސްވުން ހަދަން ހުށަހެޅި، ނިމުނީ އިއުތިރާފުވެގެން ކުރިއަށް ގެންދިޔުމަށް ކަަމަށެވެ. އެއާއެކު، ހޯމަ ދުވަހު އިއުތިރާފުގެ އެއްބަސްވުމުގައި ސޮއިކޮށްފައިވާކަމަށެވެ. އަދުހަމާއެކު އިއުތިރާފުގެ އެއްބަސްވުމަކަށް އާދެވުނީ 3 ދުވަސް މަތިން ވާހަކަދައްކައިގެން ކަމަށާއި، އެއްބަސްވެފައިވަނީ، ޓެރަރިޒަމްގެ އަމަލެއް ރޭވުމުގެ ދައުވާ ކުރިއަށް ގެންދިޔުމަށް ކަމަށެވެ. އަދުހަމް އިއުތިރާފްވަނީ ޓެރަރިޒަމްގެ އަމަލެއް ހިންގުމުގެ ދައުވާއާއި، އައިއެސް ޖަމާއަތަށް ތާއީދު ކުރުމުގެ ގޮތުން އަމަލުތައް ހިންގާ ކަމުގެ ދައުވާއަށް ކަމަށް ޕީޖީ ވިދާޅުވިއެވެ. އެ ދެ ދައުވާއަށް އަންނަނީ ޖުމްލަ 23 އަހަރުގެ ޖަލު ހުކުމެއް ކަމަށެވެ.
ޝަމީމް ވިދާޅުވީ، ދައުވާ ކުރަން ކޯޓަށް ހުށަހެޅިއިރު، މި އެއްބަސްވުން ވެސް ކޯޓަށް ހުށަހަޅާފައިވާނެ ކަމަށެވެ. މިކަމަށް ދެން ގޮތެއް ނިންމާނީ ކޯޓު މަރުހަލާގައި ކަމަށް ޝަމީމް ވިދާޅުވިއެވެ.
މި ހަމަލާއާ ގުޅިގެން އަދުހަމްގެ މައްޗަށް ކުށް ސާބިތުވެއްޖެނަމަ 23 އަހަރުގެ ޖަލު ހުކުމެއް އޭނާގެ މައްޗަށް އަންނާނެއެވެ. އަދުހަމްގެ މައްޗަށް ދައުވާ އުފުލާފައިވަނީ، 32/2015 ޓެރަރިޒަމް މަނާ ކުރުމުގެ ގާނޫނާއި، 9/2014 ގާނޫނޫލް އުގޫބާތުގެ މާއްދާތަކުގެ މައްޗަށް ބިނާކޮށް ކަމުގައި ޝަމީމު ވިދާޅުވިއެވެ.
މި މައްސަލާގައި ދެން ދައުވާ ކުރުމަށް ފޮނުވާފައިވަނީ، މުޖާޒު އަހުމަދުގެ މައްޗަށެވެ. އޭނާގެ މައްޗަށް ވެސް ޓެރަރިޒަމްގެ އަމަލެއް ރޭވުމާއި، ކުށެއް ކޮށްފައިވާ މީހެއް ފިލުވަމަށް މަސައްކަތް ކުރުމުގެ ދައުވާ ވަނީ އުފުލާފައެވެ. އޭނާގެ މައްޗަށް ކުށް ސާބިތު ވެއްޖެނަމަ، ޓެރަރިޒަމްގެ އަމަލެއް ރޭވުމުގެ ދައުވާއާ ގުޅިގެން 17 އަހަރާއި 20 އަހަރުގެ ހުކުމެއް އަދި ކުށެއް ކޮށްފައިވާ މީހަކު ފިލުވަން މަސައްކަތް ކުރުމުގެ ދައުވާ އާ ގުޅިގެން 9 މަހާއި 18 މަހުގެ ހުކުމެއް އަންނާނެއެވެ.
ތަހުމީން އަހުމަދު ގެ މައްޗަށް 4 ދައުވާއެއް އުފުލާފައިވާއިރު، ކުށް ސާބިތު ވެއްޖެނަމަ، 49 އަހަރުގެ ހުކުމެއް އޭނާގެ މައްޗަށް އަންނާނެއެވެ.
އަލީ ހައިޝަމްގެ މައްޗަށް އުފުލާފައިވަނީ، ޓެރަރިޒަމްގެ އަމަލެއް ރޭވުމާއި، ގޮވާ ތަކެތި އެއްތަނުން އަނެއްތަނަށް ގެންދިޔުމަށް ރޭވުން، ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާއެވެ. މި ދައުވާތައް ސާބިތުވެއްޖެނަމަ އޭނާގެ މައްޗަށް 46 އަހަރުގެ ހުކުމެއް އަންނާނެކަން ޕީޖީ ފާހަގަކުރެއްވިއެވެ.
ޕީޖީ ޝަމީމު ވިދާޅުވީ، މިހާރު ދައުވާކުރަން ފޮނުވާފައިވާ މީހުންގެ މައްޗަށް ދައުވާތައް ސާބިތުވާނެ ކަމުގެ ޔަގީންކަން އެބައޮތް ކަމަށެވެ.
މި މައްސަލައާ ގުޅިގެން އިތުރު 5 މީހުންގެ ތަހުގީގު ކުރިއަށްދާ ކަމަށާއި، އެ މީހުންގެ މައްޗަށް ވެސް މި އަހަރުގެ ސެޕްޓެމްބަރު ނުވަތަ އޮކްޓޯބަރުގައި ދައުވާ އުފުލޭނެ ކަމަށެވެ.
އައިއީޑީ ގޮއްވާލާފައިވަނީ ކިހިނެތްކަން އޮސްޓްރޭލިއަން ފެޑެރަލް ޕޮލިހުން ހަދާފައި އޮތް އެނަލިސިސް އިން ފެންނަން އެބައޮތް ކަމަށާއި، އެވާހަކަތައް ވެސް ކޯޓު މަރުހަލާގައި ކިޔައިދެއްވާނެކަމަށް ޝަމީމް ވިދާޅުވިއެވެ. މި ހަމަލާއަށް ފައިނޭންސް ކުރި ގޮތާ ބެހޭ ގޮތުން ކުރަމުން އަންނަ ތަހުގީގު ނުނިމޭ ކަމަށާއި، އެއީ ވަކި މައްސަލައެއް ގޮތުގައި ކުރިއަށްދާ ކަމަށް ވިދާޅުވިއެވެ. އަދި މި ތަހުގީގުގައި ޕީޖީގެ ޕްރޮސެކިއުޓަރުން ވެސް ބައިވެރިވާކަމަށް ޕީޖީ ވިދާޅުވިއެވެ.
ރައީސް ނަޝީދަށް އަމާޒުކޮށްދިން ހަމަލާއާ ގުޅިގެން ޖުމްލަ 10 މީހަކު ވަނީ ހައްޔަރުކޮށްފައެވެ.
