ޔުވެންޓަސްގެ އެއްބަސްވުން ކިއެލީނީ އާކޮށްފި

ޔުވެންޓަސްއާއެކު އެ ޓީމުގެ ކެޕްޓަން އަދި އިޓަލީގެ ތަޖުރިބާކާރު ޑިފެންޑަރު ޖިއޯޖިއޯ ކިއަލީނީ ހަދާފައިވާ އެއްބަސްވުން އާކޮށްފިއެވެ.

އުމުރުން 36 އަހަރުގެ ކިއެލީނީ އެންމެ ފަހުން ޔުވެންޓަސްގެ އެއްބަސްވުން އާކުރީ މިދިޔަ އަހަރުގެ ޖޫން މަހުގެ ތެރޭގައި، އިތުރު އެއް އަހަރަށެވެ. އޭގެ ކުރިން ފުޓްބޯޅަ ކުޅުން ހުއްޓާލަން ބޭނުންނުވާ ކަމަށް ކިއެލީނީ ބުނި ނަމަވެސް، އެ ފަހަރު އޭނާ އެއްބަސްވުން އާކުރީ މި އަހަރުގެ ހޫނު މޫސުމުގައި ބޭއްވި ޔޫރޯ ފުޓްބޯޅަ މުބާރާތުގައި ކުޅެން ގަސްތުކޮށްގެންނެވެ.

އިޓަލީއާއެކު މި ފަހަރުގެ ޔޫރޯ ކާމިޔާބުކުރި ކިއެލީނީ ވަނީ ހޯމަ ދުވަހުގެރޭ ޔުވެންޓަސްގެ އެއްބަސްވުން އިތުރު ދެ އަހަރަށް އާކޮށްފައެވެ. އެހެންކަމުން އައު އެއްބަސްވުމާއެކު އޭނާ 2023 ވަނަ އަހަރުގެ ހޫނު މޫސުމުގެ ނިޔަލަށް ޔުވެންޓަސްގައި މަޑުކުރާނެއެވެ. ކިއެލީނީގެ އެއްބަސްވުން އާކުރުމަށްފަހު ޔުވެންޓަސްއިން ނެރުނު ބަޔާނެއްގައި ބުނީ އޭނާއަކީ ޔުވެންޓަސްގެ ދިގު ތާރީޚުގެ ބޮޑު ހިއްސާއެއް އޮންނަ ކުޅުންތެރިއެއް ކަމަށެވެ. އަދި މިދިޔަ 16 އަހަރު ކިއެލީނީ ޔުވެންޓަސްއަށް ކޮށްދިން ޚިދުމަތަށް ބަލާއިރު، އޭނާއަށް އައު އެއްބަސްވުމެއް ހައްގު ކަމަށްވެސް ވަނީ ބުނެފައެވެ.

ލިވޯނޯއިން މީގެ 20 އަހަރު ކުރިން ކެރިއަރު ފަށައި ރޯމާ އާއި ފިއޮރެންޓީނާއަށްވެސް ކުޅުނު ކިއެލީނީ އަކީ 2005 ވަނަ އަހަރުން ފެށިގެން ޔުވެންޓަސްގެ މުހިންމު ކުޅުންތެރިޔެކެވެ. އަދި ފަބިއޯ ކަނަވާރޯ ކުޅުން ހުއްޓާލި ހިސާބުން ފެށިގެން، އޭނާއަކީ އިޓަލީގެ އެންމެ އިތުބާރު ޑިފެންޑަރެވެ. ޔުވަންޓަސްއަށް މިހާތަނަށް ކިއެލީނީ 535 މެޗު ކުޅެދީފައިވާއިރު، އޭނާ ވަނީ 36 ލަނޑު ޖަހާފައެވެ. އަދި ވަނީ ޔުވެންޓަސްއާއެކު އިޓާލިއަން ލީގު ނުވަ ފަހަރު ކާމިޔާބުކޮށްފައެވެ.

މީގެ އިތުރުން އިޓަލީގެ ގައުމީ ޓީމަށް 2004 ވަނަ އަހަރުން ފެށިގެން ކުޅެމުން އަންނަ ކިއެލީނީ ވަނީ ގައުމީ ޓީމުގެ ޖާޒީގައި މިހާތަނަށް 112 މެޗު ކުޅެފައެވެ. އިޓަލީއާއެކު ކިއެލީނީގެ ހަމައެކަނި ކާމިޔާބީއަކީ މި ފަހަރުގެ ޔޫރޯއެވެ.