މިހާރު ކުރިއަށްދާ ދުނިޔޭގެ އެންމެ ބޮޑު ކުޅިވަރު އީދު ކަމަށްވާ ޓޯކިއޯ އޮލިމްޕިކް ގޭމްސް 2020 އިން މިހާތަނަށް 90 މީހުން ކޮވިޑް-19 އަށް ޕޮޒިޓިވްވެފައިވާ ކަމަށް އިންޓަނޭޝަނަލް އޮލިމްޕިކް ކޮމިޓީ (އައިއޯސީ) ގެ މީޑިއާއިން ބުނެފިއެވެ.

އޮލިމްޕިކްސްއަށް އެތުލީޓުންނާއެކު ގައުމުތަކުގެ ކޮންޓިންޖެންޓް ވަނީ މިދިޔަ ޖުލައި މަހުގެ އެއްވަނަ ދުވަހުން ފެށިގެން ޖަޕާނަށް ދާން ފަށާފައެވެ.

އެ ދުވަހުން ފެށިގެން ޖުލައި މަސް ނިމުމާ ހަމައަށް 448،815 (ހަތަރު ލައްކަ ސާޅީސް އަށްހާސް އަށްސަތޭކަ ފަނަރަ) މީހުން ކޮވިޑަށް ސްކްރީން ޓެސްޓު ކޮށްފައިވާ ކަމަށް އައިއޯސީގެ މީޑިއާއިން މައުލޫމާތުދެއެވެ. އަދި އޭގެ ތެރެއިން 90 މީހުން ކޮވިޑަށް ޕޮޒިޓިވްވެފައިވާ ކަމަށާއި އޮލިމްޕިކްސްގައި ވައިރަހަށް ޓެސްޓުކުރި މީހުންގެ ތެރެއިން ޕޮޒިޓިވްވި މީހުންގެ ޖުމްލަ އިންސައްތައަކީ 0.02 ކަމަށްވެސް އައިއޯސީގެ މީޑިއާއިން މައުލޫމާތުދެއެވެ.

މީގެ އިތުރުން އޮލިމްޕިކްސްއަށް ދަތުރުކުރި އެތުލީޓުން އެއާޕޯޓުންވެސް ޓެސްޓުކުރި ކަމަށާއި، އޭގެ ތެރެއިން 35 އެތުލީޓަކު ކޮވިޑަށް ޕޮޒިޓިވްވި ކަމަށްވެސް އައިއޯސީގެ މީޑިއާއިން ބުނެއެވެ.

ކޮވިޑާއެކުވެސް މި އަހަރު އޮލިމްޕިކްސް ބާއްވާއިރު، ކޮވިޑުގެ ސަބަބުން އޮލިމްޕިކްސް މި އަހަރަށް ފަސްކުރުމަށް އައިއޯސީން ނިންމީ ގިނަ ގައުމުތަކުން އެކަމަށް ގޮވާލުމުންނެވެ. މިދިޔަ ޖުލައި މަހުގެ 23 ވަނަ ދުވަހު އޮލިމްޕިކްސް ރަސްމީކޮށް ފެށިއިރު، މި މަހުގެ އަށްވަނަ ދުވަހުގެ ނިޔަލަށް އޮލިމްޕިކްސް ކުރިއަށްދާނެއެވެ. އަދި ޕެރަލިމްޕިކްސް ބާއްވަން ތާވަލުކޮށްފައިވަނީ މި މަހުގެ 24 ވަނަ ދުވަހުން ފެށިގެން އަންނަ ސެޕްޓެމްބަރު މަހުގެ ފަސްވަނަ ދުވަހުގެ ނިޔަލަށެވެ.