މެންޗެސްޓާ ޔުނައިޓެޑުގެ ކުރީގެ ކޯޗު ހޯޒޭ މޮރީނިއޯއަށް މިހާތަނަށް ތިން ހުށަހެޅުމެއް ލިބިފައިވާ ކަމަށާއި، އެ ތިން ހުށަހެޅުމަށްވެސް ނޫނެކޭ ބުނެފައިވާކަމަށް އޭނާ ބުނެފިއެވެ.

ބެއިން ސްޕޯޓްސްއަށް ދިން އިންޓަވިއުއެއްގައި މޮރީނިއޯ ބުނީ، ކުރިމަގުގައި ވާނެގޮތެއް އަދި ނޭގޭ ކަމަށާއި، މިހާތަނަށްވެސް ތިން ހުށަހެޅުމަކަށް ނޫނެކޭ ބުނެފައިވާނެ ކަމަށެވެ.

އެގޮތުން މޮރީނިއޯ ބުނީ، އޭނާއަށް ހުށަހެޅި ތިން ހުށަހެޅުމަކީ އެންމެ ރަނގަޅު ހުށަހެޅުންތަކެއް ނޫން ކަމަށާއި، ހަމަޔަކަށް ކަންކަން އަޅުވަން އަދިވެސް ވަގުތު ބޭނުންވާ ކަމަށެވެ.

މޮރީނިއޯ ބުނީ، ފާއިތުވެދިޔަ ތިން ހަފްތާ ނިމިގެންދިޔައީ ވަރަށް އުފާވެރިކޮށް ކަމަށާއި، އާ ކަންކަން ތަޖުރިބާކުރަން ބޭނުންވާ ކަމަށެވެ. ނަމަވެސް މާޗު މަސް ނިމުމަށްފަހު އުނދަގޫތަކެއް ކުރިމަތިވާނެ ކަމަށް އޭނާ ވަނީ ބުނެފައެވެ.

ރިޕޯޓްތައް ބުނާގޮތުން ރެއާލް މެޑްރިޑުން އަންނަނީ މޮރީނިއޯ ހޯދުމަށް މަސައްކަތް ކުރަމުންނެވެ. ނަމަވެސް މިކަމާ ގުޅޭގޮތުން ރެއާލް އަދި މޮރީނިއޯވެސް އެއްވެސް ވާހަކައެއް ދައްކާފައެއް ނުވެއެވެ.

ޔުނައިޓެޑުގެ ކޯޗުކަމުން މޮރީނިއޯ ވަކިކުރީ އެޓީމު ހޯދަމުންދިޔަ ދަށް ނަތީޖާތަކުގެ ސަބަބުންނެވެ.

މި ސީޒަނުގައި މޮރީނިއޯގެ ކޯޗުކަމުގައި ޔުނައިޓެޑަށް ލިބުނު 26 ޕޮއިންޓަކީ 91-1990 ސީޒަނުން ފެށިގެން އެޓީމު އެންމެ ދަށް ފެށުމެވެ. 2016 ވަނަ އަހަރު މެންޗެސްޓަރ ޔުނައިޓެޑްގެ ކޯޗުކަމާ ހަވާލުވެ، މޮރީނިއޯ ވަނީ އެސީޒަނުގައި ލީގު ކަޕާއި، ޔޫރޮޕާ ލީގު އެޓީމަށް ކާމިޔާބުކޮށްދީފައެވެ. އެ ސީޒަން މެންޗެސްޓަރ އިން ނިންމާލީ ލީގުގެ ހަ ވަނައިގައި އޮވެގެންނެވެ.

އެހެންނަމަވެސް މިދިޔަ އަހަރު އެޓީމު ވަނީ ލީގުގެ ދެވަނަ ހޯދާފައެވެ. ލީގުގެ 1 ވަނަ ހޯދީ މެންޗެސްޓާ ސިޓީއެވެ.