ގައްދޫ މަގުހެދުމުގެ މަސައްކަތް ހަލުވި މިނެއްގައި ކުރިއަށް
މިއީ 510 ދުވަހުގެ ތެރޭގައި ނިންމުމަށް ހަމަޖެހިފައިވާ މަޝްރޫއެއް
ގދ. ގައްދޫ މަގު ހެދުމުގެ މަޝްރޫއު
ގދ. ގައްދޫ މަގު ހެދުމުގެ މަޝްރޫއު ހަލުވި މިނެއްގައި ކުރިއަށް ދާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން ބުނެފިއެވެ.
އާރްޑީސީން ބުނީ ގައްދޫ މަގުހެދުމުގެ މަޝްރޫޢުގެ ދަށުން ހަދާ ވަތަބަނޑޭރި މަގުގެ ސައިޑްވޯކް ކޮނެ، ކޮންކްރީޓް ކީވޯލް ޝަޓަރިންގެ މަސައްކަތުގެ ތެރެއިން 60 އިންސައްތަ މަސައްކަތް ނިމިފައިވާ ކަމަށެވެ. ގައްދޫ މަގުހެދުމުގެ މަޝްރޫއުގެ ދަށުން މަގުތަކަށް ބޭނުންވާ ޖަންކްޝަން އަދި ކާރބްސުޓޯން އެޅުމުގެ މަސައްކަތް ވެސް ކުރުމަށް ވަނީ ނިންމާފައެވެ.
މީގެ އިތުރުން މަގުތަކުގެ ސައިޑްވޯކް ކޮނެ ކޭބަލް ޖަންކްޝަން ވަޅުލުން ވެސް މި މަސައްކަތުގެ ތެރޭގައި ހިމެނެއެވެ. ގައްދޫ މަގުހެދުމުގެ މަޝްރޫޢުގެ މަސައްކަތްތަކުގެ ތެރޭގައި، ހޮޅި އެޅުމުގެ މަސައްކަތް ވެސް ހިމެނޭ ކަމަށް އާރްޑީސީ އިން ބުނެއެވެ.
މި މަޝްރޫޢުގެ ދަށުން 5.527 ކިލޯމީޓަރުގެ މަގު ހެދިގެން ދާނެއެވެ. އަދި މަގުތަކުގެ ސައިޑްވޯކްސް ހެދުމާއި ތާރު އެޅުމުގެ އިތުރުން ފެންް ހިންދުމުގެ ނިޒާމު ގާއިމުކުރުން ހިމެނެއެވެ. މި މަޝްރޫޢުގެ އަގަކީ 138،738،153.42 (ސަތޭކަ ތިރީސް އަށް މިލިއަން ހަތްލައްކަ ތިރީސް އަށްހާސް އެއް ސަތޭކަ ފަންސާސް ތިން ރުފިޔާ ސާޅީސް ދެ ލާރި) އެވެ.
މިއީ 510 ދުވަހުގެ ތެރޭގައި ނިންމުމަށް ހަމަޖެހިފައިވާ މަޝްރޫޢެކެވެ. ގައްދޫ މަގުހެދުމުގެ މަޝްރޫޢު، މިނިސްޓްރީ އޮފް ނޭޝަނަލް ޕްލޭނިންގް، ހައުސިންގް އެންޑް އިންފްރާންސްޓްރަކްޗަރއިން ރޯޑް ޑިވިލޮޕްމަންޓް ކޯޕަރޭޝަން އާ ހަވާލުކޮށްފައި ވަނީ 2019 ޑިސެމްބަރ 31 ވަނަ ދުވަހުއެވެ.
